مەملەكەت باسشىسى مەن Sany Group Co. Ltd. كورپوراتسياسى ديرەكتورلار كەڭەسىنىڭ توراعاسى سيان ۆەنبو اڭگىمەلەسۋ بارىسىندا «جاسىل» ەنەرگەتيكا, ماشينا جاساۋ سالالارىندا بىرلەسكەن جوبالاردى ىسكە اسىرۋ, سونداي-اق عىلىمي-زەرتتەۋ جۇمىستارى جانە يننوۆاتسيالىق تەحنولوگيالار بويىنشا سەرىكتەستىك ورناتۋ ماسەلەلەرىن تالقىلادى, دەپ جازادى Egemen.kz.
قاسىم-جومارت توقاەۆ Sany Group كورپوراتسياسىنىڭ قازاقستان نارىعىنداعى قىزمەتىن جانداندىرۋعا ۇمتىلىسىن جوعارى باعالادى. كورپوراتسيا ەلىمىزدە ارنايى تەحنيكالاردىڭ وزىق ءوندىرىسىن جولعا قويۋعا نيەتتى.
پرەزيدەنت بۇگىن جامبىل وبلىسىندا جەل گەنەراتورلارىنا ارنالعان قوسالقى بولشەكتەر شىعاراتىن زاۋىتتىڭ ىسكە قوسىلۋىن ىنتىماقتاستىقتى ودان ءارى تەرەڭدەتۋ جولىنداعى ماڭىزدى قادام دەپ اتادى.
سيان ۆەنبو قىتايلىق كورپوراتسيانىڭ قازاقستانداعى جۇمىس جوسپارىن تانىستىردى. اتاپ ايتقاندا, Sany Group كومپانياسى قۋاتتىلىعى 1 گۆت بولاتىن جەل ەلەكتر ستانساسىن سالىپ جاتىر.