ۋنيۆەرسيتەتتەردە اكادەميالىق كەزەڭدى باستاۋعا دايىندىق پىسىقتالدى. جاڭا وقۋ جىلىندا ەلىمىزدىڭ جوعارى وقۋ ورىندارىندا جاساندى ينتەللەكتىنى قولدانۋ بارلىق ماماندىقتا وقىتىلادى. ەندى ستۋدەنتتەردىڭ تاربيەسىنە, الەۋمەتكە قوسىلۋىنا ايرىقشا كوڭىل بولىنەدى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ايتىلدى.
ءباسپاسوز جيىنىندا ءسوز العان عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا جاساندى ينتەللەكت كۋرستارى بارلىق ۋنيۆەرسيتەتتە مىندەتتى پانگە اينالعانىن ايتتى.
«پرەزيدەنتىمىز قاسىم-جومارت توقاەۆتىڭ تاپسىرماسىمەن «AI-Sana» باعدارلاماسى وسى جىلى ىسكە قوسىلدى. باعدارلاما ستۋدەنتتەردىڭ ءبىلىمدى قوعام مەن بولاشاق ەكونوميكاسى ءۇشىن قۇندى جوبالارعا اينالدىرا الۋىنا جاعداي جاسايدى. ءاربىر ستۋدەنت ءوز ماماندىعىندا جاساندى ينتەللەكتىنى قولدانۋدى مەڭگەرىپ, بولاشاقتا جاڭا تەحنولوگيالار جاساپ نەمەسە ستارتاپتار اشا الادى. باعدارلاما بازالىق وقىتۋ, تەرەڭدەتىلگەن دايىندىق, جوبالار ازىرلەۋ, اكسەلەراتسيا سەكىلدى بىرنەشە كەزەڭنەن تۇرادى. بۇگىندە جاساندى ينتەللەكت كۋرستارى بارلىق ۋنيۆەرسيتەتتە مىندەتتى پانگە اينالدى. 93 جوعارى وقۋ ورنى ءوز باعدارلامالارىن بەيىمدەدى, ال 20 ۋنيۆەرسيتەت 25 جاڭا ءبىلىم باعدارلاماسىن اشتى. بۇل قادامدار وتاندىق ءبىلىم جۇيەسىن نىعايتىپ, ۇزدىك حالىقارالىق تاجىريبەلەردى ەنگىزۋگە, شەتەلدىك ستۋدەنتتەردى كوبەيتۋگە مۇمكىندىك بەرەدى», دەدى سپيكەر.
گ.كوبەنوۆانىڭ ايتۋىنشا, جاز ايلارىندا جوعارى وقۋ ورىندارىنىڭ 58 نىسانى كۇردەلى جوندەۋدەن, 560-تان استام نىسان اعىمداعى جوندەۋدەن وتكىزىلدى. سونىمەن قاتار وقۋ عيماراتتارى مەن جاتاقحانالاردا بەينەباقىلاۋ جۇيەلەرى, تۋرنيكەتتەر, دابىل تۇيمەلەرى, ورتكە قارسى قۇرالدار ورنالاستىرىلعان. 80-نەن استام ۋنيۆەرسيتەتتىڭ نىساندارىندا تەرروريستىك قاۋىپسىزدىك پاسپورتتارى بەكىتىلگەن, سونداي-اق ليتسەنزياسى بار كۇزەت اگەنتتىكتەرىمەن كەلىسىم جاسالعان. جالپى, جوعارى وقۋ ورىندارى جاڭا وقۋ جىلىن باستاۋعا دايىن.
وسىدان سوڭ جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ مىندەتىن اتقارۋشى اقەركە ابىلايحان جوعارى ءبىلىم سالاسىندا ەڭ وزەكتى ماسەلەلەردىڭ ءبىرى سانالاتىن جاتاقحانامەن قامتۋ جاعدايىن باياندادى.
«وقۋ جىلى باستالارداعى ماڭىزدى ماسەلەلەردىڭ ءبىرى – جاتاقحانامەن قامتاماسىز ەتۋ. وتكەن وقۋ جىلىندا جاتاقحاناعا دەگەن تاپشىلىق استانا, الماتى قالالارىندا عانا بايقالدى. بيىل الماتى قالاسىنىڭ جوعارى وقۋ ورىندارىنان باسقا وڭىرلەردە جاتاقحاناعا دەگەن تاپشىلىق جوق. 2025 جىلعا 10 276 ورىندىق 29 جاتاقحانانى ىسكە قوسۋ جوسپارلانعان. قازىرگى تاڭدا 3 180 ورىندىق 4 جاتاقحانا پايدالانۋعا بەرىلدى. جاقىن ارادا 4 877 ورىندىق 18 جاتاقحانانىڭ ءوز تۇرعىندارىنا ەسىك اشۋىن كۇتىپ وتىرمىز. ودان باسقا, جىلدىڭ سوڭىنا دەيىن 2 219 ورىندىق 7 جاتاقحانا ىسكە قوسىلادى. مينيسترلىك جىلداعىداي بيىل دا احۋال, داعدارىس ورتالىقتارىن ۇيىمداستىردى. احۋال ورتالىعى ستۋدەنتتەردى جاتاقحانالارداعى ورىندار تۋرالى حاباردار ەتەدى, داعدارىس ورتالىقتارى فورس-ماجور جاعدايلارىندا تۇرعىن ورىنمەن قامتاماسىز ەتەدى. رەسپۋبليكالىق احۋال ورتالىعىندا ستۋدەنتتەر مەن ولاردىڭ اتا-انالارىنا جاتاقحانالار, جوو قابىلداۋ تۋرالى اقپاراتتى بەرۋ ءۇشىن 10 ادام قىزمەت كورسەتتى. ال داعدارىس ورتالىعىندا 55 ورىندىق جاتاقحانا رەزەرۆتە تۇر. سونداي-اق بارلىق جوعارى وقۋ ورنىندا كومەككە مۇقتاج ستۋدەنتتەردى قولداۋ ءۇشىن احۋال ورتالىقتارى, جوبا كەڭسەلەرى جۇمىس ىستەيدى», دەدى سپيكەر.
ا.ابىلايحاننىڭ ايتۋىنشا, ستۋدەنتتەردى قوعامعا الەۋمەتتەندىرۋ بويىنشا كەشەندى جۇمىس جۇرگىزىلىپ جاتىر. جوو-لاردا بۇگىندە 200-گە جۋىق پسيحولوگ مامان جۇمىس ىستەيتىن پسيحولوگيالىق قىزمەت قۇرىلعان. جاستاردىڭ ادالدىق قاسيەتتەرىن دامىتۋمەن اينالىساتىن 51 كومپلاەنس-وفيتسەر دايارلانىپ شىقتى. قازىرگى تاڭدا جوو ءبىلىم الۋشىلارى اراسىندا ابايدىڭ «تولىق ادام» ءىلىمى نەگىزگى 3 باعىت بويىنشا جۇزەگە اسىرىلىپ وتىر, بۇل – «ىستىق قايرات – نۇرلى اقىل – جىلى جۇرەك». مەملەكەت باسشىسىنىڭ «ادىلەتتى قازاقستان – ادال ازامات» قاعيداتتارىن ۇسىنۋى وسى اباي يدەولوگياسىن ىلگەرىلەتۋدىڭ ءبىر باستاماسى بولدى.