جاپونيانىڭ سىرتقى ىستەر ءمينيسترى تاكەشي يۆەيا مەن قازاقستاننىڭ سىرتقى ىستەر ءمينيسترى مۇرات نۇرتىلەۋ دۇيسەنبى كۇنى جاپونيا مەن ورتالىق ازيانىڭ بەس مەملەكەتى اراسىندا جوعارى دەڭگەيدەگى سامميت وتكىزۋدى جانداندىرۋعا ۋاعدالاستى, دەپ جازادى Egemen.kz.
بۇل باستاما وتكەن جىلى «ورتالىق ازيا پليۋس جاپونيا» ديالوگتىق الاڭى اياسىندا كوتەرىلگەن ەدى. التى ەلدىڭ كوشباسشىلارى قازاقستاندا كەزدەسۋ وتكىزۋگە كەلىسكەن بولاتىن. الايدا, جاپونيانىڭ سول كەزدەگى پرەمەر-ءمينيسترى فۋميو كيشيدا ەلدىڭ تىنىق مۇحيتى جاعالاۋىنداعى نانكاي جازىعىندا بولۋى ىقتيمال جويقىن زىلزالاعا بايلانىستى سوڭعى ساتتە ساپاردان باس تارتقاننان كەيىن جيىن كەيىنگە شەگەرىلگەن ەدى.
قازاقستاندا وتكەن كەزدەسۋ بارىسىندا تاكەشي يۆەيا مۇرات نۇرتىلەۋگە جاپونيا تاراپىنان ىنتىماقتاستىقتى ودان ءارى نىعايتۋعا نيەتتى ەكەنىن جەتكىزدى. ونىڭ ايتۋىنشا, مينەرالدىق رەسۋرستاردى يگەرۋ, جاپون كومپانيالارىن ايماقتىق نارىققا تارتۋ, سونداي-اق ەكونوميكاداعى ارىپتەستىكتى كەڭەيتۋ كۇن تارتىبىندەگى ماڭىزدى باعىتتاردىڭ ءبىرى بولماق.
ءوز كەزەگىندە مۇرات نۇرتىلەۋ قازاقستاننىڭ جاپونيامەن ساۋدا, ينۆەستيتسيا جانە ەكونوميكالىق ىنتىماقتاستىق سالالارىن تەرەڭدەتۋگە مۇددەلى ەكەنىن اتاپ ءوتتى. ءمينيستردىڭ پىكىرىنشە, بۇل بايلانىستار تەك ەكىجاقتى قارىم-قاتىناستى عانا ەمەس, بۇكىل ورتالىق ازيا ايماعى ءۇشىن جاڭا مۇمكىندىكتەر اشپاق.