قازاقستاندا 2025 جىلى 323 شاقىرىم جىلۋ جەلىسىن كۇردەلى جوندەۋ جانە قايتا قۇرۋعا 129,4 ملرد تەڭگە باعىتتالادى. بۇل تۋرالى ۇكىمەت وتىرىسىندا ەنەرگەتيكا ءمينيسترى ەرلان اقكەنجەنوۆ مالىمدەدى, دەپ جازادى Egemen.kz.
ونىڭ ايتۋىنشا, قارجىنىڭ نەگىزگى بولىگى – 104,2 ملرد تەڭگە رەسپۋبليكالىق بيۋدجەتتەن, ال 25,2 ملرد تەڭگە كاسىپورىنداردىڭ تاريفتىك سمەتاسى ەسەبىنەن بولىنەدى.
««بۇگىنگى تاڭدا ورىنداۋ 66% قۇرايدى. اكىمدىكتەرگە باستالعان جۇمىستاردى جىلىتۋ كەزەڭى باستالعانعا دەيىن اياقتاۋدى تاپسىرۋدى سۇرايمىز», دەدى مينيستر.
بۇدان بولەك, مينيستر بيىل جەدەل شارالار قابىلداۋ ءۇشىن ۇكىمەت رەزەرۆىنەن قوسىمشا 47,6 ملرد تەڭگە بولىنگەنىن اتاپ ءوتتى. بۇل قارجى جىلۋ كوزدەرى مەن جەلىلەرىن سالۋعا, رەكونسترۋكتسيالاۋعا جانە كۇردەلى جوندەۋگە جۇمسالىپ جاتىر. اتاپ ايتقاندا:
جىلۋ كوزدەرىن سالۋعا – 20 ملرد تەڭگە; جىلۋ كوزدەرىن جوندەۋگە جانە قايتا قۇرۋعا – 8,7 ملرد تەڭگە; جىلۋ جەلىلەرىن جوندەۋگە – 5,5 ملرد تەڭگە; جىلۋ جەلىلەرى بويىنشا بيۋدجەتتىك ينۆەستيتسيالىق جوبالارعا – 13,4 ملرد تەڭگە باعىتتالدى.