الماتىدا حالىقارالىق جاستار كۇنىنە ارنالىپ وتكىزىلگەن «Alma love» ونكۇندىگى ءوز مارەسىنە جەتتى. ايرىقشا جوبا قالا اكىمدىگى جاستار ساياساتى باسقارماسىنىڭ قولداۋىمەن العاش رەت اۋقىمدى دەڭگەيدە جۇزەگە اسىرىلىپ وتىر. ەلدەگى جوعارى وقۋ ورىندارىنىڭ ۇشتەن ءبىرىن قۇرايتىن مەگاپوليستە 150 مىڭنان استام ستۋدەنت ءبىلىم الاتىنىن ەسكەرسەك, بىرەگەي باستاما ستۋدەنتتەردىڭ ءوز ماقساتتارىن جۇزەگە اسىرۋىنا ۇلكەن مۇمكىندىك سىيلادى.
بالۋان شولاق اتىنداعى سپورت جانە مادەنيەت سارايىندا قورىتىندىلانعان ءىس-شارانى 5 مىڭنان استام كورەرمەن تاماشالادى. ونكۇندىك اياسىندا ۇيىمداستىرىلعان 10 ءىرى جوبا شىعارماشىلىق, سپورت, ءبىلىم, ۆولونتەرلىك جانە ەكولوگيا باعىتتارىن قامتىدى. ون كۇن ىشىندە كۆەست ويىندار, «Jastar Talks» موتيۆاتسيالىق كەزدەسۋلەرى, ەكولوگيالىق چەللەندجدەر, بي جارىسى, جاستار كورمەسى جانە «جايدارمان» ويىندارى 30 مىڭنان استام ارمانشىل جاستى ءبىر الاڭدا توعىستىرا الدى.
«بيىلعى «Alma love» ونكۇندىگى – جاستاردىڭ الەۋەتىن اشۋعا, شىعارماشىلىق يدەيالارىن جۇزەگە اسىرۋعا ارنالعان ەرەكشە جوبا بولدى. ءبىز 10 كۇن بويى ءتۇرلى باعىتتاعى ءىس-شارالاردى ۇيىمداستىرىپ, جاڭا ەسىمدەردىڭ جارقىراۋىنا جول اشتىق. بۇل – ءبىر فەستيۆال اياسىندا قالا تاريحىندا العاش رەت وسىنداي اۋقىمداعى جوبانى جۇزەگە اسىرۋىمىز. جاستار – الماتىنىڭ دامۋى مەن جاڭارۋىنا سەرپىن بەرەتىن كۇش. ءبىز ولاردىڭ باستامالارىن ءاردايىم قولداۋعا دايىنبىز», دەيدى الماتى قالاسى جاستار ساياساتى باسقارماسىنىڭ باسشىسى ازيز قاجدەنبەك.
قاي ەلدىڭ دە جارقىن بولاشاعى – جان-جاقتى ءبىلىمدى, ۇشقىر ويلى تالانتتى جاستار. اتالعان جوبانىڭ باستى ماقساتى ءار سالاداعى دارىندى جاستاردىڭ باسىن قوسىپ, ولاردىڭ ارمان-ماقساتتارىنا باسپالداق بولۋ دەيدى ۇيىمداستىرۋشىلار. اتالعان جوبانى ۇتىمدى يدەياسىمەن كوزگە تۇسكەندەر ءۇشىن ءوز ارماندارىن ىسكە اسىرۋدىڭ تاپتىرماس مۇمكىندىگى دەپ اتاۋعا بولادى.
گراند فينالدا الماتىنىڭ دامۋىنا ءتۇرلى سالا بويىنشا ۇلەس قوسقان جاس كوشباسشىلار مەن ۆولونتەرلەرگە الماتى قالاسىنىڭ اكىمى اتىنان العىسحات تابىستالدى. ولاردىڭ قاتارىندا ەكوۆولونتەر, «پروەكت ۆيرۋس» ەكولوگيالىق باستاماسىنىڭ جەتەكشىسى دۋلات نابيەۆ تە بار.
«جاستاردىڭ باستاماسى – قوعامنىڭ قوزعاۋشى كۇشى. ءبىز تابيعاتتى قورعاپ, ەكولوگيالىق مادەنيەتتى قالىپتاستىرۋ ارقىلى بولاشاعىمىزعا ينۆەستيتسيا قۇيىپ وتىرمىز. بىزگە جاسالعان قولداۋ – جاس بەلسەندىلەردىڭ تاباندى ەڭبەگىنىڭ ناتيجەسى», دەيدى د.نابيەۆ.
كەش بارىسىندا دوسەكەش, قاناي, ەركەش حاسەن, قايرات نۇرتاس سىندى وتاندىق ەسترادا انشىلەرى ونەر كورسەتتى. كورەرمەندەرگە ەرەكشە شوۋ باعدارلامالار ۇسىنىلىپ, جاس ونەرپازداردىڭ قاتىسۋىمەن وربىگەن ساحنالىق قويىلىمدار جىلى اسەر سىيلادى.
الماتى