دەرەكتەرگە سۇيەنسەك ەلىمىزدە سوڭعى جىلدارى سالىنعان 1200 مەكتەپتىڭ 217-ءسى – «كەلەشەك مەكتەپتەرى» رەتىندە تىركەلگەن. ونىڭ 105-ءىنىڭ قۇرىلىسى اياقتالعان, ال قالعان 112 مەكتەپ 2025 جىلدىڭ سوڭىنا دەيىن پايدالانۋعا بەرىلەدى. وسىنشاما مەكتەپتەردىڭ سالىنۋى – سوڭعى 30 جىلدا بولماعان سەرپىن, بۇل قالالاردا عانا ەمەس, اۋىلدىق جەرلەردە دە سالىندى. سوندىقتان, بۇل – تاريحي رەكورد. «كەلەشەك مەكتەپتەرىنە» قابىلداۋ – اتا-انانىڭ قالاۋىمەن جۇزەگە اسىپ, كەز-كەلگەن وقۋشى ءوز ۇيىنە جاقىن ورنالاسقان مەكتەپكە قۇجاتتارىن تاپسىرىپ, ءبىلىم الا الادى, ياعني بارلىق بالا ءۇشىن قولجەتىمدى. ەندەشە ەل تاڭداۋىنا يە بولىپ وتىرعان «كەلەشەك مەكتەپتەرى» باسقا وقۋ ورىندارىنان نەسىمەن ەرەكشە؟ بۇل تۋرالى كەڭىنەن تارقاتىپ كورەيىك.
مەملەكەت باسشىسى جولداۋىندا ۇلتتىق جوبا اياسىندا سالىنعان جاڭا مەكتەپتەردىڭ وزىندىك باسقارۋ جۇيەسى بولۋى ءتيىس دەپ ايتقانى ءمالىم.
وقۋ-اعارتۋ مينيسترلىگىنە قاراستى ى.التىنسارين اتىنداعى ۇلتتىق ءبىلىم اكادەمياسىنىڭ (ۇبا) ۆيتسە-پرەزيدەنتى انار تاڭىربەرگەنوۆانىڭ ايتۋىنشا, اتالعان مەكتەپتەردىڭ وقۋ باعدارلاماسى دا جۇيەلى قۇراستىرىلادى.
«ىبىراي التىنسارين اتىنداعى ۇلتتىق ءبىلىم اكادەمياسى اياسىندا 105 مەكتەپتىڭ بازاسى قۇرىلدى. ءار مەكتەپ ديرەكتورى تۋرالى تولىق مالىمەتتەر جيناقتالدى. 2024-2025 وقۋ جىلىنان باستاپ «ورلەۋ» ۇلتتىق بىلىكتىلىكتى ارتتىرۋ ورتالىعىمەن بىرلەسىپ, جىل بويىنا ادىستەمەلىك قولداۋ كورسەتىلىپ جاتىر. مەكتەپ جاڭادان اشىلعان كەزدە وقۋ جوسپارىن قۇرۋ, ۇيىمداستىرۋ جۇمىسىن ۇيلەستىرۋ سياقتى جۇمىستار بىردەن قولعا الىندى. قازىر بۇل پروتسەستەر جالعاسىپ جاتىر», دەيدى ول.
«كەلەشەك مەكتەپتەرىنە» پەداگوگتەردى ىرىكتەۋ №57 بۇيرىق نەگىزىندە جۇرگىزىلەدى. قازىرگى ۋاقىتتا مەملەكەت باسشىسىنىڭ تاپسىرماسىنا سايكەس, بۇل مەكتەپتەرگە جەكە باسقارۋ جۇيەسى ەنگىزىلىپ جاتىر. سوعان بايلانىستى مۇعالىمدەردى ىرىكتەۋ قالاي بولاتىنى, مەكتەپ باسشىلارىن قالاي تاعايىنداۋ قاجەتتىگى, بۇل مەكتەپتەردىڭ ستراتەگيالىق دامۋى قالاي جۇزەگە اساتىنى ازىرلەنىپ جاتىر, بۇل جونىندە TAMS كونفەرەنتسياسىندا پەداگوگتەرگە كەڭىنەن تانىستىرىلادى.
پەداگوگ مارتەبەسى تۋرالى زاڭدا كورسەتىلگەندەي قالالىق بولسىن, اۋىلدىق بولسىن, گيمنازيا بولسىن – ءار پەداگوگ 3 جىلدا ءبىر رەت بىلىكتىلىگىن مەملەكەت قارجىلاندىرۋىمەن ارتتىرا الادى. وسى تۇرعىدان العاندا «كەلەشەك مەكتەپتەرىنىڭ» پەداگوگتەرى دە, قاراپايىم مەكتەپ مۇعالىمدەرى دە بىردەي نەگىزدە وقىتىلادى.
«كەلەشەك مەكتەپتەرىنىڭ» نەگىزگى ەرەكشەلىكتەرى مىناداي, وندا: ءتورت سپورت زالى, كەڭ اۋلالارى, جايلى سىنىپتارى بار, تيپتىك مەكتەپتەرمەن سالىستىرعاندا جالپى قۇرىلىسى 5-20% كولەمدىرەك. سونداي-اق IT تەحنولوگيالارى مەن ستەم-زەرتحانالارى بار. اعاش وڭدەۋ, تىگىن ۇيىرمەلەرى – ياعني, ەرتە كاسىپتىك باعدار بەرەتىن مۇمكىندىكتەر قاراستىرىلعان. ال وقۋشى ورنى – 2 000 بالاعا ەسەپتەلگەن.
ايتا كەتكەن ءجون, «كەلەشەك مەكتەپتەرىمەن» كەمىندە 3 جىل بويى جۇمىس جاسالىپ, اككرەديتاتسيا دەڭگەيىنە جەتكىزىلىپ, ولاردىڭ تاجىريبەسى باسقا مەكتەپتەرگە ماسشتابتالادى. قازىرگى ۋاقىتتا ەلىمىزدە 6 800-دەن استام مەملەكەتتىك مەكتەپ جانە 800-دەي جەكەمەنشىك مەكتەپ بار. وسى مەكتەپتەرگە كەزەڭ-كەزەڭىمەن «كەلەشەك مەكتەپتەرىنىڭ» تاجىريبەسى تاراتىلاتىن بولادى.
ەسكە سالايىق, بۇل مەكتەپتەردىڭ اتاۋى باستاپقىدا «جايلى مەكتەپ» دەپ اتالدى. ويتكەنى اۋەلى ينفراقۇرىلىمىن دامىتۋ كەرەك بولعان. ءسويتىپ عيماراتتارى سالىنىپ, زاماناۋي جابدىقتارمەن قامتىلدى. ال ءبىلىم ساپاسىن جاقسارتۋ كەزەڭىندە «كەلەشەك مەكتەبى» دەپ اتالدى.
ءماجىلىس دەپۋتاتى نۇرگۇل تاۋ اتاۋدىڭ بىلاي وزگەرگەنى دۇرىس باعىت دەپ ەسەپتەيدى.
ء«يا, «جايلى مەكتەپ» – ول تەك كومفورت, ينفراقۇرىلىم, تەحنولوگيا. بىراق كەلەشەككە باعىتتالعان مەكتەپ – بۇل تەك جايلى بولۋمەن شەكتەلمەۋى كەرەك. ءبىز كەلەشەكتە ەلىمىزگە پايدا اكەلەتىن ۇرپاق تاربيەلەۋىمىز قاجەت. سوندىقتان جاي عانا «كومفورتتا وتىرعىزۋ» ەمەس, ساپالى ءبىلىم بەرۋ, تاربيە بەرۋ, كۇشتى مامانداردى تارتۋ باستى نازاردا بولۋى ءتيىس. مىنە, «كەلەشەك مەكتەپتەرى» وسىنداي مازمۇنمەن ەرەكشەلەنۋى كەرەك دەپ ويلايمىن. سوندىقتان بۇل اتاۋ دا, كونتسەپتسيا دا ءوز ورنىندا», دەيدى دەپۋتات.
سول سالىنعان لابوراتوريالاردى, جابدىقتاردى, مەدياتەكالاردى شاڭ باسپاي, بالالار ءۇشىن قولجەتىمدى, ال مۇعالىمدەر تاراپىنان قولدانىلىپ, وقىتۋ ۇدەرىسىنىڭ ءبىر بولىگىنە اينالعان جاعدايدا بۇل مەكتەپتەر شىن مانىندە «كەلەشەك مەكتەپتەرىنە» اينالاتىنى ءسوزسىز.