قوعام سەنىمىن كۇشەيتۋ ماڭىزى

سوت ورىنداۋشىلارىنىڭ جۇمىسىن ارتتىرۋ تسيفرلاندىرۋ, كاسىبي بىلىكتىلىكتى ارتتىرۋ جانە جاۋاپكەرشىلىكتى كۇشەيتۋ ارقىلى جۇزەگە اسۋى مۇمكىن. سونىمەن قاتار وسى سالانى رەتتەيتىن زاڭنامانى جەتىل­دىرۋ, مامانداردى دايارلاۋ مەن ىرىكتەۋ ما­سە­لەلەرىنە دە ەرەكشە نازار اۋدارىلماق.

ە.بولگەرتتىڭ ايتۋىنشا, جەكە سوت ورىن­داۋشىلارى جۇيەسى ادىلدىكتى قامتا­ما­سىز ەتۋدە جانە ازاماتتاردىڭ بۇزىلعان قۇقىقتارىن قالپىنا كەلتىرۋدە ماڭىزدى ءرول اتقارادى. دەپۋتات قازىرگى تاڭدا سوت ورىنداۋشىلارىنا قويىلاتىن كاسىبي تالاپتاردى ارتتىرىپ قانا قويماي, ولاردىڭ جۇمىسىنا قوعامنىڭ سەنىمىن كۇشەيتۋ دە اسا ماڭىزدى ەكەنىن جەتكىزدى.

«جەكە سوت ورىنداۋشىلارىنىڭ جۇيەسى اشىق, ءتيىمدى جانە ازاماتتار­دىڭ مۇددەسى ءۇشىن جۇمىس ىستەۋگە ءتيىس. كاسىبي ستاندارتتاردى كوتەرۋ, حالىقپەن ءوزارا ءىس-قيمىلدى جاقسارتۋ جانە جاۋاپكەرشىلىكتى ارتتىرۋ باعىتىندا ناقتى قادامدار قاجەت. تەك وسىلاي عانا ءبىز قوعامنىڭ سەنىمىن نىعايتىپ, سوت شەشىمدەرىنىڭ ءادىل ورىندالۋىن قامتاماسىز ەتە الامىز», دەدى سەناتور.

ال سەنات دەپۋتاتى ق.تاستەكەەۆ سەمەي قالاسىنداعى مەديتسينالىق ۋنيۆەرسيتەت گوسپيتالىنىڭ جۇمىسى, جاڭا انگيوگرافتىڭ مۇمكىندىكتەرى جانە بۇل قۇرىلعىنىڭ پاتسيەنتتەردى دياگ­نوستيكالاۋ مەن ەمدەۋدەگى ماڭىزىمەن تانىس­تى. مەديتسينالىق پەرسونالمەن كەزدەسۋ بارى­سىندا پارلامەنتشى سەناتتىڭ زاڭ شى­عارۋ قىزمەتى جانە مەديتسينا قىز­مەت­كەرلەرىنىڭ قۇقىقتارى مەن قاۋىپسىزدىگىن كۇشەيتۋگە باعىتتال­عان جوسپارلانعان تۇزەتۋلەر تۋرالى اقپارات بەردى.

بۇعان قوسا, سەناتور «Amanat» پارتيا­سى وبلىستىق فيليالىنىڭ توراعاسىمەن كەزدەسىپ, وڭىرلىك باعدارلامالاردىڭ جۇزەگە اسىرىلۋى, ولاردىڭ تۇرعىندار ءۇشىن ماڭىزى, وزەكتى ماسەلەلەر جانە الداعى دامۋ جوسپارلارى جونىندە پىكىر الماستى. دەپۋتات ءوڭىردىڭ الەۋ­مەت­تىك-ەكونوميكالىق دامۋى, حالىق­تىڭ ءال-اۋقاتىن ارتتىرۋ جانە ينفراقۇرى­لىم­دىق جوبالاردى ءتيىمدى ىسكە اسىرۋ – نەگىزگى باسىمدىقتىڭ ءبىرى ەكەنىن اتاپ ءوتتى.