اتىراۋ قالالىق پروكۋراتۋراسى مەكتەپتەردە ۇجىمدىق شارتتىڭ ورىندالۋىنا تالداۋ جۇرگىزۋ بارىسىندا 80-نەن استام پەداگوگتىڭ كونستيتۋتسيالىق قۇقىعىن قالپىنا كەلتىردى, دەپ حابارلايدى Egemen.kz.
«تالداۋ ناتيجەسىندە ءبىلىم بەرۋ ۇيىمدارىنىڭ ۇجىمدىق شارتتارىندا زەينەت جاسىنا جەتكەن قىزمەتكەرلەرگە الدىن الا حاباردار ەتىپ, ءبىر لاۋازىمدىق جالاقى مولشەرىندە وتەماقى تولەۋ قاراستىرىلعانى انىقتالدى. الايدا بىرقاتار مەكتەپتەر مەن بالاباقشالاردا بۇل تالاپ ورىندالماعان. پروكۋرورلىق قاداعالاۋ اكتىسى نەگىزىندە 80-نەن استام مۇعالىمگە 11 ملن تەڭگەدەن اساتىن وتەماقى تولەنىپ, قىزمەتكەرلەردىڭ قۇقىقتارى تولىق كولەمدە قالپىنا كەلتىرىلدى», دەپ حابارلادى وبلىستىق پروكۋراتۋرادان.
وسىعان بايلانىستى 33 لاۋازىمدى تۇلعا قاتاڭ تارتىپتىك جاۋاپكەرشىلىككە تارتىلعان.