مەملەكەت باسشىسىنىڭ جىل سايىن 150 مىڭ گەكتار جەرگە سۋ ۇنەمدەۋ تەحنولوگيالارىن ەنگىزۋ جونىندەگى تاپسىرماسىن ورىنداۋ شەڭبەرىندە سۋ رەسۋرستارى جانە يرريگاتسيا مينيسترلىگى شارۋالاردى زاماناۋي سۋارۋ جۇيەلەرىنە كوشۋگە ىنتالاندىرۋ تەتىكتەرىن ازىرلەدى. سالا مينيسترلىگى فەرمەرلەرگە سۋ ۇنەمدەۋ تەحنولوگيالارىن ساتىپ الۋ-ورناتۋ بويىنشا جانە ينفراقۇرىلىم تارتۋ كەزىندە ۇڭعىما بۇرعىلاۋعا جۇمسالعان شىعىنداردىڭ وتەماقى مولشەرىن 50%-دان 80%-عا دەيىن ۇلعايتتى, دەپ جازادى Egemen.kz.
سونىمەن قاتار تاريف قۇنىنا قاراي سۋارۋ سۋىنا سارالانعان سۋبسيديالار ەنگىزىلدى. سۋ ۇنەمدەۋ تەحنولوگيالارىن قولدانعان جاعدايدا سۋبسيديا كولەمى 60%-دان 85%-عا دەيىن وسەدى, ال قولدانباعان جاعدايدا – تاريفكە بايلانىستى 50–75%-دان 30–55%-عا دەيىن تومەندەيدى.
سالا مينيسترلىگىنىڭ مالىمەتىنشە سونداي-اق لازەرلىك تەگىستەۋشى ساتىپ الۋعا بەرىلەتىن سۋبسيديا ەگىس القابى كەمىندە 200 گەكتار بولاتىن شارۋاشىلىقتارعا عانا تولەنەدى دەگەن تالاپ الىنىپ تاستالدى. لازەرلىك تەگىستەۋ سۋارمالى سۋدىڭ القاپ اۋماعىنا بىركەلكى تارالۋىنا مۇمكىندىك بەرىپ, سۋدى 30%-عا دەيىن ۇنەمدەۋگە جاعداي جاسايدى. بۇل اسىرەسە قۋاڭشىلىققا بەيىم وڭىرلەر ءۇشىن وزەكتى. مۇنداي تەحنولوگيا ەلىمىزدەگى كۇرىش القاپتارىندا بەلسەندى قولدانىلادى.
ناتيجەسىندە 2024 جىلى سۋ ۇنەمدەۋ تەحنولوگيالارى 158 مىڭ گەكتار جەرگە ەنگىزىلدى, ونىڭ شامامەن 130 مىڭ گەكتارى – وڭتۇستىك وڭىرلەردە تۇر. جالپى سۋ ۇنەمدەۋ تەحنولوگيالارى قولدانىلعان جەر كولەمى 470,2 مىڭ گەكتارعا جەتكەن. وسى جىل باسىنان بەرى ەلىمىزدە سۋ ۇنەمدەۋ تەحنولوگيالارىن قولدانۋدىڭ جالپى اۋماعى 580 مىڭ گەكتاردان استى.
«مەملەكەت باسشىسى سۋ ۇنەمدەۋ تەحنولوگيالارىنا كوشۋدىڭ ماڭىزدىلىعىن بىرنەشە رەت اتاپ ءوتتى. كليماتتىڭ وزگەرۋى جاعدايىندا بۇل – ەلدىڭ سۋ قاۋىپسىزدىگىن قامتاماسىز ەتۋ ءۇشىن قاجەت شارا. وبلىس اكىمدىكتەرىمەن بىرلەسىپ, 2030 جىلعا دەيىن ەگىس القاپتارىندا سۋ ۇنەمدەۋ جۇيەلەرىن ەنگىزۋ جوسپارىن ازىرلەپ, بەكىتتىك, ناتيجەسىندە 2030 جىلدىڭ سوڭىنا دەيىن جىلىنا 2,2 ملرد تەكشە مەتر سۋ ۇنەمدەۋدى كوزدەپ وتىرمىز», دەدى سالا ءمينيسترى نۇرجان نۇرجىگىتوۆ.