اتىراۋ وبلىسىندا جىل باسىنان بەرى جۇمىسشىلاردىڭ ەڭبەك قۇقىعىن قورعاۋ ءۇشىن 139 تەكسەرۋ جۇرگىزىلگەن. سونىڭ ناتيجەسىندە 140 زاڭ بۇزۋشىلىق انىقتالعان, دەپ جازادى Egemen.kz.
مەملەكەتتىك ەڭبەك ينسپەكتسياسى كوميتەتى اتىراۋ وبلىسى بويىنشا دەپارتامەنتىنىڭ باسشىسى يگىلىك اۋباكىروۆتىڭ دەرەگىنە قاراعاندا, جۇمىسشىلاردان 1300-دەن استام ءوتىنىش تىركەلگەن.
«ەڭبەك ينسپەكتورلارى 962 ادامنىڭ ەڭبەك قۇقىعىن قالپىنا كەلتىرىپ, 40 جۇمىسشىنىڭ 36 ملن تەڭگەگە جۋىق جالاقى بەرەشەگىن ءوندىردى. جۇمىس بەرۋشىلەرگە 92 نۇسقاما بەرىلىپ, 61 زاڭدى تۇلعاعا 10 ملن تەڭگەدەن استام ايىپپۇل سالىندى. وبلىستا ۇجىمدىق شارتپەن قامتۋ دەڭگەيى ءىرى كاسىپورىنداردا 78,2%, ورتا كاسىپورىنداردا 77,1%, شاعىن كاسىپورىنداردا 33,9% قۇراپ وتىر», دەيدى يگىلىك اۋباكىروۆ.
ونىڭ ايتۋىنشا, بيىل التى ايدا 36 وندىرىستىك جازاتايىم وقيعا تىركەلگەن. وسىنداي وقيعالاردىڭ الدىن الۋ ءۇشىن تاۋەكەل كارتاسى ارقىلى مونيتورينگ جۇرگىزۋ قولعا الىنعان.