2026 جىلدىڭ 1 قاڭتارىنان باستاپ ەلىمىزدە جاڭا سالىق كودەكسى كۇشىنە ەنەدى. سونىڭ اياسىندا ازاماتتار زەينەتاقى تولەمدەرىنەن جەكە تابىس سالىعىن (جتس) مۇلدە تولەمەيتىن بولادى. دەگەنمەن, بۇل جەڭىلدىككە دەيىن دە مەملەكەت الەۋمەتتىك تۇرعىدان وسال ازاماتتارعا بىرقاتار جەڭىلدىك ۇسىنىپ وتىر, دەپ جازادى Egemen.kz.
بۇعان دەيىن تۇرعىن ءۇي ساتىپ الۋ نەمەسە ەمدەلۋ ءۇشىن ەڭبەك جانە حالىقتى الەۋمەتتىك قورعاۋ قورىنان بىرجولعى زەينەتاقى تولەمىن العان كەزدە الەۋمەتتىك وسال ساناتتاعى ادامداردان 10% كولەمىندە جتس بىردەن ۇستالىپ كەلدى. الايدا 2024 جىلدىڭ 1 قاڭتارىنان باستاپ وزگەرىس ەنگىزىلىپ, 882 ايلىق ەسەپتىك كورسەتكىشكە (شامامەن 3,4 ملن تەڭگە) دەيىنگى سوماعا ستاندارتتى شەگەرىم قولدانۋ ءتارتىبى بەكىتىلدى. ياعني بۇل مولشەرگە دەيىنگى زەينەتاقى تولەمى سالىقتان بوساتىلادى.
ەڭ باستى جاڭالىق – وسى جەڭىلدىكتى بۇرىن پايدالانا الماعاندار ءۇشىن دە مۇمكىندىك اشىلىپ وتىر. ەگەر ازامات ءبىر جولعى زەينەت اقى تولەمىن 2021–2022 جىلدارى العان بولسا جانە جتس-تى قايتارۋ تۋرالى ءوتىنىش بەرىپ ۇلگەرمەگەن بولسا, ەندى وعان 5 جىل مەرزىم بەرىلدى (بۇرىن بۇل 3 جىلمەن شەكتەلەتىن). بۇل وزگەرىس 2025 جىلدىڭ 15 شىلدەسىنەن باستاپ كۇشىنە ەندى.
سالىقتى قايتارىپ الۋعا ءبىرىنشى, ەكىنشى جانە ءۇشىنشى توپتاعى مۇگەدەكتىگى بار ازاماتتار, مۇمكىندىگى شەكتەۋلى بالا تاربيەلەپ وتىرعان اتا-انالار مەن قامقورشىلار, جەتىم بالالاردى تاربيەلەۋشى وتباسىلار, سوعىس ارداگەرلەرى جانە باسقا دا ساناتتاعى ادامدار قۇقىلى.
ءوتىنىشتى بىرىڭعاي جيناقتاۋشى زەينەتاقى قورىنىڭ كەز كەلگەن بولىمشەسىنە بەرۋگە بولادى. ەگەر ءوتىنىش قاناعاتتاندىرىلسا, ارتىق تولەنگەن سالىق زەينەتاقى شوتىنا قايتارىلادى نەمەسە بولاشاقتا تولەنەتىن زەينەتاقى تولەمدەرىنەن ۇستالىپ قالمايدى.
ايتا كەتۋ كەرەك, بۇل ەرەجە تەك 2025 جىلدىڭ سوڭىنا دەيىن قولدانىلادى. ال 2026 جىلدان باستاپ كۇشىنە ەنەتىن جاڭا سالىق كودەكسى بويىنشا بارلىق زەينەتاقى تولەمدەرى جەكە تابىس سالىعىنان تولىق بوساتىلادى. بۇل – الەۋمەتتىك ادىلەتتىلىكتى نىعايتۋ جولىنداعى ماڭىزدى قادام.