پرەزيدەنت كولىك سالاسىنىڭ قىزمەتكەرلەرىن ماراپاتتاۋ سالتاناتىندا الداعى ماڭىزدى مىندەت – اۋە ارقىلى جۇك تاسىمالىن دامىتىپ, قازاقستاندى ايماقتاعى جەتەكشى اۆياتسيالىق حابقا اينالدىرۋ ەكەنىن اتاپ ءوتتى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«ۇكىمەت ۇلتتىق جۇك تاسىمالداۋشى اۋە كومپانياسىن قۇرۋ تۋرالى جوسپارىن مالىمدەدى. جالپى, ەلىمىزدەگى ازاماتتىق اۆياتسيا مەن اۋە ارقىلى جۇك تاسىمالىن دامىتۋ ماسەلەسى تەك كولىك قىزمەتى رەتىندە قاراستىرىلمايدى. ونىڭ اۋقىمى ودان الدەقايدا كەڭ. بۇل – ەلىمىزدىڭ ەكونوميكالىق وسىمىنە, حالىقارالىق ارەناداعى ورنىنا جانە ەگەمەندىگىنە تىكەلەي اسەر ەتەتىن ستراتەگيالىق ۆەكتور», دەدى پرەزيدەنت.
مەملەكەت باسشىسى اۆتوكولىك جولدارىنىڭ ساپاسىن جاقسارتۋعا قاتىستى اۋقىمدى جۇمىس جۇرگىزىلىپ جاتقانىنا نازار اۋداردى.
«بىلتىر 7 مىڭ شاقىرىم اۆتوكولىك جولى پايدالانۋعا بەرىلدى. تالدىقورعان – وسكەمەن, قاراعاندى – الماتى, اقتوبە – اتىراۋ – استراحان باعىتىنداعى كۇرە جولدار جاڭعىرتىلدى. جەرگىلىكتى اۆتوكولىك جولدارى دا جوندەلىپ جاتىر. مۇنداي اۋقىمدى جۇمىس ەل تاريحىندا ءبىرىنشى رەت ىسكە اساتىن بولدى. بۇدان بولەك, باسقا دا ءىرى جوبالار جۇزەگە اسىرىلىپ جاتىر. وتكەن جىلى حالىق كوپتەن كۇتكەن بۇقتىرما سۋ قويماسىنداعى كوپىر اشىلدى. بۇل – قازاقستانداعى ەڭ ۇزىن كوپىر. وسى وتكەل ەكى وبلىستى جانە جەتى اۋداندى بايلانىستىرادى, سونداي-اق قىتاي مەن رەسەيدى جالعايدى. شاقپاق بابا اسۋىندا ەلىمىزدەگى ەڭ العاشقى تۋننەل ىسكە قوسىلدى. شىن مانىندە, «جول – تىرشىلىك كوزى, جول بار جەردە قايناعان ءومىر بار» دەپ بەكەر ايتىلماعان. وسى نىسانداردىڭ يگىلىگىن ەڭ الدىمەن حالىق كورەدى. ساپالى جول ازاماتتاردىڭ ءال-اۋقاتىن ارتتىرۋعا ىقپال ەتەدى. جالپى, قازاقستاندا كولىك-ترانزيت سالاسى قارقىندى دامۋدا. بۇل – وزدەرىڭىز سياقتى ازاماتتاردىڭ قاجىرلى ەڭبەگىنىڭ جەمىسى. قازىر وسى سالادا 770 مىڭنان استام ادام جۇمىس ىستەيدى. سىزدەر ادال قىزمەت ەتىپ, ەلىمىزدى كوركەيتۋگە مول ۇلەس قوسىپ جۇرسىزدەر. مەن بۇگىن بارلىق كولىك سالاسى قىزمەتكەرلەرىنە شىنايى ريزاشىلىعىمدى بىلدىرەمىن. ءبىز ءبىر ەل بولىپ زاڭ مەن تارتىپكە باعىناتىن ادىلەتتى قازاقستاندى قۇرىپ جاتىرمىز. بۇل – مەملەكەتىمىزدىڭ بولاشاعى ءۇشىن وتە ماڭىزدى جۇمىس, ونى مىندەتتى تۇردە ورىنداۋىمىز كەرەك. كولىك سالاسى ماماندارى ءوز مىندەتتەرىن ءمىنسىز اتقارىپ, مەملەكەتتىك ماڭىزى بار ىسكە بەلسەندى تۇردە اتسالىسىپ كەلەدى. الداعى ۋاقىتتا دا ەل يگىلىگىنە قىزمەت ەتەسىزدەر دەپ سەنەمىن. «ەڭبەك ەتكەن ەلدەن ىرىس كەتپەيدى» دەيدى حالقىمىز. ەڭبەكقورلىق پەن كاسىبيلىك – وركەنيەتتى قوعامعا ءتان قاسيەتتەر. ەڭبەك ادامى ەڭ جوعارى ماراپاتقا لايىقتى», دەدى قاسىم-جومارت توقاەۆ.