قازىر – گرانت كونكۋرسىنا قۇجات قابىلداۋ ۋاقىتى اياقتالىپ, ۇمىتكەرلەر تاقىمىن قىسىپ جۇرگەن شاق. كوپ كۇتتىرگەن ءتىزىم 10 تامىزعا دەيىن شىعىپ قالۋعا ءتيىس. سول تەگىن وقۋعا جولداما الا الماعان جاعدايدا كەيبىر تالاپكەرلەرگە تاعى ءبىر مۇمكىندىك تۋىپ تۇر.
عىلىم جانە جوعارى ءبىلىم مينيسترلىگى جاقىندا «قازاقستان حالقىنا» قوعامدىق قورىنىڭ جاڭا وقۋ جىلىنا 500 گرانت بولگەنىن حابارلادى. بۇل كىمدەرگە بەرىلمەك؟
تالاپكەرلەرگە جوعارى وقۋ ورىندارىندا وقۋعا جاعداي جاسايتىن قايىرىمدىلىق باعدارلاماسىنىڭ شارتى نەگىزىندە ءبىلىم گرانتىنا مىناداي ساناتتاعى تالاپكەرلەر ۇمىتكەر بولا الادى:
1) اۋىلدىق جەرلەردەگى, شاعىن جانە مونوقالالارداعى از قامتىلعان وتباسىلاردان شىققان بالالار;
2) جەتىم بالالار نەمەسە كامەلەتكە تولعانعا دەيىن اتا-اناسىنىڭ قامقورلىعىنسىز قالعاندار;
3) مۇگەدەكتىگى بار ازاماتتار;
4) مۇگەدەك بالالاردى تاربيەلەپ وتىرعان وتباسىلاردان شىققان بالالار;
5) 2022 جىلعى قايعىلى قاڭتار وقيعالارى كەزىندە قازا تاپقان قازاقستان رەسپۋبليكاسى ازاماتتارىنىڭ بالالارى;
6) 2022 جىلعى قايعىلى قاڭتار وقيعالارى كەزىندە جاراقات العان بالالار.
وسى جەردە باعدارلاماعا قاتىسۋدىڭ شەكتى جاسى تولىق 29 جاستى قۇرايتىنىن ەسكەرتە كەتكەن ءجون.
ءبىلىم گرانتى ءبىر رەتتىك تارتىپپەن اتاۋلى گرانت نەگىزىندە ۇسىنىلادى. بۇل گرانت جوعارى ءبىلىمى بار تۇلعالارعا, سونداي-اق رەسپۋبليكالىق نەمەسە جەرگىلىكتى بيۋدجەت قاراجاتى ەسەبىنەن «باكالاۆر» دارەجەسىن الۋ ءۇشىن مەملەكەتتىك ءبىلىم گرانتى تاعايىندالعان تۇلعالارعا ەكىنشى جوعارى ءبىلىم الۋعا جانە ونلاين-وقۋعا بەرىلمەيدى.
گرانت تاعايىندالاتىن ۇمىتكەرلەردىڭ ءتىزىمىن جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمى ياكي فيليالى بيىل ۇبت-دان وتكەن جانە ونىڭ ناتيجەلەرى بويىنشا وقۋعا ءتۇسۋ ءۇشىن قاجەتتى شەكتى بالىن جيناعان (ونىڭ ىشىندە شىعارماشىلىق ەمتيحانداردى ەسكەرە وتىرىپ) تالاپكەرلەر قاتارىنان جاساقتايدى. ءتىزىم جوعارى وقۋ ورنىنىڭ نەمەسە فيليالدىڭ كونكۋرستىق كوميسسياسى وتىرىسىنىڭ حاتتاماسى تۇرىندە راسىمدەلەدى.