ۇستىمىزدەگى جىلدىڭ ماۋسىم ايىنىڭ اياعىنان باستاپ كەدەن وداعى قىزمەتى تۋرالى حالىققا جان-جاقتى تولىققاندى تۇسىنىك بەرەتىن قر قم كبك call – ورتالىعى جۇمىسىن باستادى. بۇل تۋرالى كەشە كەدەندىك باقىلاۋ كوميتەتى توراعاسىنىڭ ورىنباسارى ءو.بەيىسبەكوۆ حابارلادى.
قازىر كەدەن وداعى تۋرالى الىپ-قاشپا اڭگىمەلەر كوپ. بىراق ءومىر شىندىعى اتالعان وداقتىڭ وعان قاتىساتىن ەلدەرگە بەرەرى مول ەكەندىگىن كۇننەن كۇنگە ايقىنداي تۇسۋدە. ال قاراپايىم ازاماتتاردىڭ جاڭا وداق تۋرالى سۇراقتارىنىڭ بولۋى ورىندى. مىنە, حالىقتىڭ وسىنداي كوكەيكەستى سۇراقتارىنا ناقتى جاۋاپ الۋ ءۇشىن جوعارىدا اتالعان ورتالىق قىزمەت كورسەتۋگە كىرىستى. كەز كەلگەن ادام كەدەن وداعى تۋرالى ءوزىن تولعاندىرعان سۇراقتارىن نەمەسە كەدەن وداعى كودەكسىنىڭ ەرەجەلەرى بۇزىلعاندىعىن بايقاعان جاعدايدا بۇل تۋرالى ءمالىمەتتەردى وسىندا جولداۋىنا بولادى.
كەدەن وداعىن قالىپتاستىرۋ 2009 جىلعى 9 ماۋسىمدا ۇكىمەت باسشىلارى دەڭگەيىندە مەملەكەتارالىق كەڭەس بەلگىلەگەن كەزەڭ مەن مەرزىمگە سايكەس جۇرگىزىلۋدە. كەدەن وداعى – بۇل بىرىڭعاي كەدەندىك اۋماقتى كوزدەيتىن تاراپتاردىڭ ساۋدا-ەكونوميكالىق ىقپالداستىعىنىڭ نىسانى بولىپ تابىلادى. ايتا كەتۋ كەرەك, ونىڭ اياسىندا, ياعني تاۋارلاردىڭ ءوزارا ساۋداسىندا كەدەندىك باج جانە ەكونوميكالىق شەكتەۋلەر قولدانىلمايدى. سوندىقتان بۇل ورايدا تاراپتار بىرىڭعاي كەدەندىك ءتاريفتى جانە ءۇشىنشى ەلدەرمەن ساۋدانى رەتتەۋدىڭ ءبىرتۇتاس شارالارىن قابىلدايدى. كەدەن وداعىن قالىپتاستىرۋ 2007 جىلعى 6 قازاندا “كەدەن وداعىنىڭ بىرىڭعاي كەدەندىك اۋماعىن قۇرۋ جانە قالىپتاستىرۋ تۋرالى شارتقا” جانە 2009 جىلعى 19 جەلتوقساندا “بەلارۋس رەسپۋبليكاسىنىڭ, قازاقستان رەسپۋبليكاسىنىڭ جانە رەسەي فەدەراتسياسىنىڭ بىرىڭعاي ەكونوميكالىق كەڭىستىگىن قالىپتاستىرۋ جونىندەگى ءىس-قيمىل جوسپارىنا” قول قويىلۋدان باستاۋ العان ەدى. سونىڭ نەگىزىندە ونىڭ ستراتەگياسى مەن الداعى كەزەڭدەرى بەلگىلى بولدى. اتاپ ايتقاندا, باستاپقى الدىن الا كەزەڭ – 2010 جىلعى 1 قاڭتارعا دەيىن بولدى, ونى وتتىك. سودان كەيىنگى كەزەڭ, ياعني ءبىرىنشى كەزەڭ – 2010 جىلعى 1 شىلدەگە دەيىن بولاتىن, ونى دا ارتقا تاستادىق. ءسويتىپ, مىنە, كەدەن وداعىنىڭ 2011 جىلدىڭ 1 شىلدەسىنە دەيىن سوزىلاتىن ەكىنشى كەزەڭىنە دە اياق باستىق.
ال 1 شىلدەدەن باستاپ جاڭا كەدەن كودەكسى قولدانىسقا ەنگىزىلىپ, سوعان بايلانىستى ىشكى شەكارادا ءوزارا ساۋدادا كەدەندىك رەسىمدەۋ جويىلدى. بىراق, كەدەندىك باقىلاۋ رەسەي جانە قازاقستان جاعىندا دا ازىرگە قالاتىندىعىن ەستەن شىعارماعان ءجون. ونىڭ وزىندىك ءتارتىبى بەلگىلەنگەن. كەدەن وداعىنىڭ ەكىنشى كەزەڭى اياقتالعاندا كەدەندىك باقىلاۋ تولىعىمەن الىنىپ, شەكارا قىزمەتى قالادى. قازىر سول 2011 جىلدىڭ 1شىلدەسىنە دەيىن بەكىتىلگەن جوسپارعا سايكەس كەدەندىك جانە مەملەكەتتىك باقىلاۋدىڭ باسقا تۇرلەرىن سىرتقى شەكاراعا اۋىستىرۋ ماسەلەلەرى قاراستىرىلىپ جاتىر. سانيتارلىق, فيتوسانيتارلىق جانە ۆەتەرينارلىق باقىلاۋ سالاسىنداعى, سونداي-اق تەحنيكالىق رەتتەۋدە رۇقسات بەرۋ قۇجاتتارىن ءوزارا تانۋ جۇزەگە اسىرىلاتىن بولادى. وسىلايشا ەۋرازەق اتالعان مەملەكەتتەرىنىڭ كەدەن وداعى جۇمىس ىستەۋىنىڭ نەگىزگى تەتىگى قولدانىسقا ەنگىزىلەدى. ءسويتىپ, 2011 جىلعى 1 شىلدەدە بىرىڭعاي كەدەن اۋماعىن قالىپتاستىرۋدى اياقتاۋ جوسپارلانىپ وتىر.
الەكساندر تاسبولاتوۆ.