باتىس قازاقستان وبلىسى مادەنيەت, تىلدەردى دامىتۋ جانە ارحيۆ ءىسى باسقارماسى مەن حالىقارالىق «قازاق ءتىلى» قوعامى ورال قالاسىندا بىرلەسكەن وتىرىس وتكىزىپ, ىنتىماقتاستىق جونىندە مەموراندۋمعا قول قويدى دەپ حابارلايدى Egemen.kz.
جيىن بارىسىندا وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى قۋانىشبەك مۇقانعاليەۆ مەملەكەتتىك ءتىلدى دامىتۋ بارىسىندا وڭىردە جاسالىپ جاتقان جۇمىستاردى اتاپ ءوتتى. بيىل جىل باسىندا عانا «قازاق ءتىلى» قوعامىنىڭ وبلىستىق فيليالىنا توراعا بولىپ تاعايىندالعان ايداربەك اقبولاتوۆ فيليالدىڭ وسى كەزگە دەيىن اتقارعان جۇمىسى جانە الداعى جارتىجىلدىققا ارنالعان جوسپار جايلى باياندادى. ال استانادان كەلگەن حالىقارالىق «قازاق ءتىلى» قوعامىنىڭ ۆيتسە-پرەزيدەنتى شەرۋباي قۇرمانباي ۇلى مەملەكەتتىك ءتىل – ەل بىرلىگىنىڭ نەگىزى ەكەنىن ايتىپ, وڭىردە جانە ەلىمىزدە كەزدەسىپ جاتقان كەيبىر قيىندىقتارعا توقتالدى.
- حالىقارالىق «قازاق ءتىلى» قوعامى قۇرىلعالى بەرى وتكەن 40 جىلعا تاياۋ ۋاقىتتا بۇكىلقازاقتىق سيپات الىپ, ەرەكشە ورلەگەن كەزەڭى دە, كەرىسىنشە بار-جوعى بەلگىسىز بولىپ قالعان ۋاقىتى دا بولدى. ەندىگى ۋاقىتتا ءتىل ماسەلەسىن ۇرانداتپاي, جالاۋلاتپاي, ناعىز ەرىكتى, ىنتالى مامانداردىڭ كومەگىمەن جۇمىس ىستەيتىن بولامىز. بۇگىندە ءىس باسىنا جوو عالىمدارى, ءتىل ماماندارى كوبىرەك تارتىلىپ جاتقانى سوندىقتان. ەڭ اۋەلى قازاق ءتىلىن وقىتۋ ادىستەمەسىن جولعا قويىپ, ءتىلدىڭ مازمۇنىن بايىتۋعا كۇش سالامىز. سوڭعى كەزدە ايگىلى ديسنەي كورپوراتسياسى شىعارعان مۋلتفيلمدەردىڭ قازاق تىلىنە اۋدارىلۋى وسىنىڭ ناتيجەسى. سونداي-اق ءتىلىمىزدى زاماناۋي تەحنولوگيالىق ۇردىسكە ساي ەتىپ دامىتۋ ماسەلەسى دە وزەكتى بولىپ تۇر. ءتىل ماسەلەسىندە اقجايىق وڭىرىندە دە كەيبىر تۇيتكىلدى جايتتەردىڭ بار ەكەنىن بىلەمىن. ءبىزدىڭ كوزقاراسىمىز – بۇل سالادا كيكىلجىڭ تۋدىرماي, الدىن-الا زاڭ اياسىندا ساۋاتتى جۇمىس ىستەۋ قاجەت, - دەدى شەرۋباي قۇرمانباي ۇلى.
جيىنعا قاتىسقان زيالى قاۋىم وكىلدەرى دە ورتاق ماسەلەگە وي قوسىپ, ءوز پىكىرىن ايتتى. وتىرىستىڭ سوڭىندا حالىقارالىق «قازاق ءتىلى» قوعامى مەن باتىس قازاقستان وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسى اراسىندا مەملەكەتتىك ءتىلدى دامىتۋ بويىنشا ءوزارا ىنتىماقتاستىق تۋرالى مەموراندۋمعا قول قويىلدى.
باتىس قازاقستان وبلىسى