جەتىسۋ وبلىسىندا بيىل اۋىل شارۋاشىلىعى داقىلدارى 510,7 مىڭ گەكتارعا ەگىلدى. ونىڭ 200,2 مىڭ گەكتارى سۋارمالى القاپ. ەگىستىك 6 سۋ قويماسى مەن 12 وزەن ارقىلى سۋارىلادى. قازىر قويمالار ورتا ەسەپپەن 45%-عا تولىپ, سۋارۋ رەجيمىندە جۇمىس ىستەپ تۇر, دەپ جازادى Egemen.kz.
اۋا رايىنىڭ ىستىق بولۋىنا بايلانىستى وزەندەردەگى سۋ كولەمى ازايعانىمەن, شارۋاشىلىقتارعا قاجەتتى سۋ جەتكىزىلىپ, داقىلدار ءۇشىنشى رەت سۋارىلىپ جاتىر.
وبلىستا سۋ ۇنەمدەۋ تەحنولوگيالارىن ەنگىزۋ قارقىندى جۇرۋدە. 2025 جىلى مۇنداي ادىستەر 55,2 مىڭ گەكتارعا دەيىن جەتكىزىلمەك. بۇگىندە 35,9 مىڭ گەكتارعا ەنگىزىلسە, ونىڭ 13,3 مىڭ گەكتارى تامشىلاتىپ, 22,6 مىڭ گەكتارى جاڭبىرلاتىپ سۋارۋعا نەگىزدەلگەن.
سونىمەن قاتار 4,8 مىڭ گەكتار القاپقا سۋدى 30%-عا دەيىن ۇنەمدەيتىن ديسكرەتتىك ءتاسىل ەنگىزىلدى. بۇل قاراپايىم ءارى ءتيىمدى ءادىستى شارۋالار بەلسەندى تۇردە قولدانا باستادى.