تەمىرجول تەحنيكاسى جاڭعىرىپ جاتىر

سالاداعى ەلەۋلى جاڭالىق – بيىل استانادا ىسكە قوسىلعان «Stadler Kazakhstan» زاۋىتى. شۆەيتساريالىق تەحنولوگياعا نەگىزدەلگەن بۇل كاسىپورىن – تەمىرجول ماشينا جاساۋىندا ءوندىرىستى وقشاۋلاۋ مەن ترانسفورماتسيانى تەرەڭدەتۋ باعىتىنداعى ماڭىزدى قادام. زاۋىت تەك ءونىم وندىرۋمەن عانا شەكتەلمەي, جاڭا تەحنولوگيالار مەن مامان دايارلاۋ ءىسىن قاتار الىپ جۇرۋگە مۇددەلى. بۇل ءوز كەزەگىندە جەرگىلىكتى قامتۋدى ارتتىرىپ, ەلىمىزدىڭ وندىرىستىك تاۋەلسىزدىگىن نىعايتۋعا ۇلەس قوسادى.

اتالعان كاسىپورىنمەن قاتار, ەلىمىزدە تەمىرجول تەحنيكاسىن شىعارۋمەن اينالىساتىن تاعى ءتورت ءوندىرىس ورنى جۇمىس ىستەپ تۇر. ولار – پەتروپاۆل, ەكىباستۇز, اتىراۋ جانە استانادا ورنالاسقان كاسىپورىندار. بۇل زاۋىتتار ىشكى نارىقتى قامتاماسىز ەتىپ قانا قويماي, ەكسپورتتىق الەۋەتتى دە بىرتىندەپ دامىتىپ كەلەدى.

بۇگىندە قازاقستان تەمىرجول كولىگىن جاڭارتۋعا ەرەكشە نازار اۋدارىپ وتىر. كولىك مينيسترلىگى قىزمەت ەتۋ مەرزىمى ۇزارتىلعان ۆاگونداردى پايدالانۋعا شەكتەۋ ەنگىزۋ باستاماسىن كوتەردى. بۇل – قاۋىپسىزدىك پەن ساپانى ءبىرىنشى ورىنعا قويۋعا باعىتتالعان قادام. قازىرگى ۋاقىتتا ءتيىستى نورماتيۆتىك قۇجات ازىرلەنىپ, كەلىسۋ راسىمدەرىنەن ءوتىپ جاتىر.

شەكتەۋ ەنگىزۋ ارقىلى ەسكى ۆاگوندار بىرتىندەپ نارىقتان شىعارىلىپ, ونىڭ ورنىنا زاماناۋي, ەكولوگيالىق جانە تەحنيكالىق تالاپتارعا ساي جاڭا جىلجىمالى قۇرام ەنگىزىلمەك. بۇل شارا ۆاگوندار پاركىنىڭ جاسارۋى مەن وتاندىق زاۋىتتارعا دەگەن سۇرانىستىڭ ارتۋىنا جول اشادى.

بۇل باستامانى دەر كەزىندە جۇزەگە اسىرۋ ءۇشىن ۇكىمەت تە ءتيىستى تاپسىرمالارىن جەدەلدەتىپ وتىر. ۆيتسە-پرەمەردىڭ تاپسىرماسىنا سايكەس, ۇلتتىق ەكونوميكا مينيسترلىگى نورماتيۆتىك قۇجاتتىڭ جەدەل قابىلدانۋىنا قاجەتتى راسىمدىك كەدەرگىلەردى قىسقا مەرزىم ىشىندە شەشۋگە مىندەتتەلدى. بۇل – ناقتى شەشىمدەر كەزەڭىنە ءوتىپ جاتقان باستامانىڭ جاقىن ارادا ىسكە اسىرىلاتىنىن بىلدىرەدى.