كامەرۋن پرەزيدەنتى پول بييا بيىل قازان ايىندا وتەتىن پرەزيدەنتتىك سايلاۋعا قاتىساتىنىن ءمالىم ەتتى. بۇل تۋرالى ول 13 ماۋسىم كۇنى الەۋمەتتىك جەلىدەگى پاراقشاسىندا حابارلادى. 92 جاستاعى مەملەكەت باسشىسى بۇل شەشىمىن «حالىقتىڭ كوپتەگەن ءارى تاباندى وتىنىشتەرىمەن» بايلانىستىردى, دەپ جازادى Egemen.kz.
«حالقىما قىزمەت ەتۋگە دەگەن جىگەرىم ەلىمىزدەگى جاعدايدىڭ وزەكتىلىگىنە ساي كەلەدى», دەپ جازدى ول.«حالقىما قىزمەت ەتۋگە دەگەن جىگەرىم ەلىمىزدەگى جاعدايدىڭ وزەكتىلىگىنە ساي كەلەدى», دەپ جازدى ول.پول بييا كامەرۋندى 1982 جىلدان بەرى باسقارىپ كەلەدى. ول كەزدە 49 جاستاعى پرەمەر-مينيستر بولاتىن. سودان بەرى ەل تىزگىنىن ەشكىمگە بەرگەن ەمەس. الداعى سايلاۋ ونىڭ سەگىزىنشى رەت قاتىسۋى بولماق.
وسى ۋاقىت ىشىندە حالىقارالىق ۇيىمدار مەن وپپوزيتسيا وكىلدەرى سايلاۋدىڭ ءادىل وتپەۋى, ساياسي قارسىلاستاردىڭ قىسىمعا ۇشىراۋى جانە جەمقورلىق دەڭگەيىنىڭ جوعارى بولۋى جونىندە بىرنەشە رەت سىن ايتقان. Transparency International ۇيىمىنىڭ 2024 جىلعى ەسەبىندە كامەرۋن جەمقورلىقتى قابىلداۋ يندەكسىندە 180 ەلدىڭ ىشىندە 140-ورىندا تۇر.
پرەزيدەنتتىڭ سايلاۋعا قايتا ءتۇسۋى قوعامدا ءتۇرلى پىكىر تۋدىردى. كەيبىر تۇرعىندار بۇل شەشىمدى تۇسىنبەيتىنىن ايتسا, ەندى بىرەۋلەر بيلىككە جاڭا بۋىن كەلۋى قاجەت ەكەنىن جەتكىزدى.
بييانىڭ نەگىزگى قارسىلاستارى قاتارىندا:
• 2018 جىلعى سايلاۋدا وپپوزيتسيا اتىنان قاتىسقان موريس كامتو;
• جۋىردا بيلىك كواليتسياسىنان شىققان مينيستر يسسا چيروما باكاري;
• بۇرىنعى پرەمەر-مينيستر بەللو بۋبا مايگاري جانە باسقا دا ۇمىتكەرلەر بار.
ايتا كەتەيىك, كامەرۋنداعى پرەزيدەنت سايلاۋى 2025 جىلعى قازان ايىنا جوسپارلانعان.