قازاقستاندىق وقۋشىلار تاعى ءبىر مارتە الەمدىك ءبىلىم ارەناسىندا وزا شاۋىپ, ەلىمىزدىڭ مارتەبەسىن اسقاقتاتتى. 5–14 شىلدە ارالىعىندا بىرىككەن اراب امىرلىكتەرىندە وتكەن حالىقارالىق حيميا وليمپياداسىندا (International Chemistry Olympiad, IChO-2025) قازاقستان ۇلتتىق قۇراماسىنىڭ بارلىق مۇشەسى جۇلدەگەر اتاندى. ولاردىڭ ەكەۋى – التىن مەدال يەگەرلەرى, دەپ حابارلايدى Egemen.kz.
قر وقۋ-اعارتۋ مينيسترلىگىنىڭ حابارلاۋىنشا, بيىلعى وليمپياداعا 93 ەلدەن 360-تان استام ۇزدىك وقۋشى قاتىسىپ, حيميا عىلىمىنداعى ءبىلىمىن سىنعا سالعان. قازاقستان نامىسىن قورعاعان ءتورت وقۋشى كەرەمەت ناتيجە كورسەتىپ, حالىقارالىق ارەنادا ەلىمىزدىڭ جاس حيميكتەرىنىڭ كوشباسشىلىق پوزيتسياسىن تاعى ءبىر دالەلدەگەن.
جۇلدەگەرلەر:
كيريلل كيم – استانا قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى; ابىلاي كابدۋلحادىر – استانا قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى; ەڭلىك باقىتبەكوۆا – الماتى قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى; اڭسار جاقسىلىقوۆ – اقتوبە وبلىسىنداعى ء«بىلىم-يننوۆاتسيا» ليتسەيىنىڭ 10-سىنىپ وقۋشىسى.ۇلتتىق قۇرامانىڭ عىلىمي جەتەكشىلەرى:
سانجار بەگداير – KAIST (Korea Advanced Institute of Science and Technology) ماگيسترانتى, حالىقارالىق جانە رەسپۋبليكالىق وليمپيادالاردىڭ جەڭىمپازى; رينات يليۋسيزوۆ – حالىقارالىق جانە رەسپۋبليكالىق ءبىلىم دودالارىنىڭ بىرنەشە دۇركىن جەڭىمپازى.وقۋ-اعارتۋ ءمينيسترى عاني بەيسەمباەۆ بۇل جەتىستىك قازاقستاندىق ءبىلىم ساپاسىنىڭ جوعارى دەڭگەيىن تاعى ءبىر مارتە دالەلدەگەنىن اتاپ ءوتتى.
«بۇل جەڭىس – جاس بۋىننىڭ جارقىن بولاشاعىنا جول اشاتىن بەرىك نەگىز دەپ سەنەمىن. جەتىستىكتەرىڭىز ەسەلەنە بەرسىن, الار اسۋلارىڭىز بيىك بولسىن! ەلىمىزدىڭ دامۋىنا ۇلەس قوساتىن ءبىلىمدى دە تالاپتى ازامات بولىپ وسۋلەرىڭىزگە تىلەكتەسپىن», دەپ جازدى مينيستر ءوزىنىڭ رەسمي پاراقشاسىندا.ۇلتتىق قۇرامانىڭ دايىندىق بارىسى قر وقۋ-اعارتۋ مينيسترلىگىنە قاراستى «دارىن» رەسپۋبليكالىق عىلىمي-پراكتيكالىق ورتالىعىنىڭ قولداۋىمەن ۇلتتىق قۇراما حالىقارالىق وقۋ-جاتتىعۋ جيىندارىنا قاتىسىپ, 2024–2025 وقۋ جىلىندا ەۋروپالىق جانە حالىقارالىق وليمپيادالاردا 100% ناتيجە كورسەتىپ وتىر.