قر پرەزيدەنتى جانىنداعى ورتالىق كوممۋنيكاتسيالار قىزمەتى وتكىزگەن پودكاستتا بىرىڭعاي ەسەپكە الۋ جۇيەسىن ەنگىزۋ ماسەلەسى كوتەرىلدى, دەپ جازادى Egemen.kz.
تۋريزم جانە سپورت مينيسترلىگى ويىن بيزنەسىن جانە لوتەرەيانى رەتتەۋ كوميتەتىنىڭ توراعاسى ادىلەت تۇرعانباەۆتىڭ ايتۋىنشا, وتكەن جىلى ويىن بيزنەسىنە قاتىستى زاڭناماعا تۇزەتۋلەر قابىلدانعان كەزدە بىرىڭعاي ەسەپكە الۋدىڭ جۇيەسىن (بەج) ەنگىزۋ كوزدەلگەن. بۇل – بۋكمەكەرلىك كەڭسەلەر مەن ولاردىڭ كليەنتتەرى اراسىنداعى ترانزاكتسيانى, سونداي-اق ءباس تىگۋدىڭ بۇكىل تاريحىن جازاتىن پلاتفورما.
«پلاتفورمانىڭ باستى مىندەتى - كليەنتتەردى سايكەستەندىرۋ جانە ادامنىڭ زاڭ بويىنشا ويناۋعا قۇقىعى بولسا عانا ءباس تىگۋگە مۇمكىندىك بەرۋ. ءبىز حالىقارالىق تاجىريبەنى زەرتتەدىك. قازىر تەحنولوگيالاردىڭ دامۋىمەن ونلاين-ستاۆكالار مەن ونلاين-ويىندار, سونىڭ ىشىندە بۋكمەكەرلىك بيزنەستىڭ دامىپ كەلە جاتقانىن ەسكەرە وتىرىپ, دامىعان ەلدەر وسى سالانى رەتتەۋدى مەملەكەتكە بەرۋ جولىن تاڭدادى. مەملەكەت بارلىق وپەراتسيانى ونلاين رەجيمدە باقىلايدى. يتاليا, يسپانيا, فرانتسيا, گەرمانيا, اقش-تىڭ كەيبىر شتاتتارىندا وسىلاي جاسالادى», دەدى ادىلەت تۇرعانباەۆ.
مەملەكەت ونلاين-رەجيمدە بارلىق وپەراتسيانى كورىپ, ولاردىڭ زاڭدىلىعىن باقىلاپ, زاڭسىز قىزمەت تۇرلەرىمەن, ونىڭ ىشىندە اقشا قاراجاتىن جىلىستاتۋمەن اينالىسۋعا جول بەرمەيتىن ونلاين-باقىلاۋ قۇرالدارىن ەنگىزەدى. بۋكمەكەرلىك كەڭسەلەر سياقتى جوعارى تەحنولوگيالىق بيزنەستى مەملەكەت تەك وزىق تەحنولوگيالاردى قولدانا وتىرىپ جانە ءوز جۇمىسىن تسيفرلاندىرۋ ارقىلى عانا رەتتەي الادى.
تسم وكىلىنىڭ ايتۋىنشا, رەسمي دەرەكتەر بويىنشا ەلدەگى زاڭدى ويىن نارىعىنىڭ اينالىمى 1,3 ترلن تەڭگەنى قۇرايدى. وندا 2,5 ملن جۋىق كليەنت تىركەلگەن. ونىڭ ىشىندە 450 مىڭعا جۋىق قازاقستاندىق تۇراقتى تۇردە وينايدى. ال وتكەن جىلعى زەرتتەۋ دەرەكتەرى بويىنشا, 500 مىڭ ادام زاڭسىز بۋكمەكەرلىك كەڭسەلەردە ويناعان. ولار سالىق تولەمەيدى, ال قارجى شەتەلگە – وففشورلارعا كەتەدى.
ونلاين-جۇيەنىڭ مىندەتى زاڭدى سەكتوردى رەتتەپ, باقىلاۋ عانا ەمەس, جاساندى ينتەللەكت ارقىلى زاڭسىز سايتتاردى انىقتاپ, بۇعاتتاۋ جانە ازاماتتار مەن ەل ەكونوميكاسىن قارجىنى سىرتقا شىعارماۋدان قورعاۋ.
«بىرىڭعاي ەسەپكە الۋ جۇيەسى – بارلىق قاجەتتى تەكسەرۋدەن وتەتىن مەملەكەتتىك اقپاراتتىق جۇيە. جۇيە ءۇش كومپونەنتتەن تۇرادى: ءبىرىنشىسى – قۇمار ويىندارعا قول جەتكىزۋدى باقىلاۋ جانە ولارعا تاۋەلدى بولۋ قاۋپى بار ازاماتتاردىڭ ساناتتارىنا قولجەتىمدىلىكتى بۇعاتتاۋ, ەكىنشىسى - زاڭسىز نارىقپەن كۇرەسۋ, كۇنىنە 1000-عا دەيىن زاڭسىز ينتەرنەت-رەسۋرستاردى بۇعاتتاۋ, ءۇشىنشى كومپونەنت - ويىنشىلاردىڭ مۇددەلەرىن قورعاۋ ءۇشىن ستاۆكالاردى وڭدەۋ», دەپ ءتۇسىندىردى تۋريزم جانە سپورت مينيسترلىگى ويىن بيزنەسىن جانە لوتەرەيانى رەتتەۋ كوميتەتىنىڭ توراعاسى.