مال دارىگەرلەرىنىڭ كاسىبي مەرەكەسى كۇنى باعالى سىيلىقتى باتىس قازاقستان وبلىسىنىڭ اكىمى ناريمان تورەعاليەۆ تابىس ەتتى, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆ ۆەتەريناريا سالاسىن دامىتۋ جونىندە ناقتى تاپسىرما بەرگەن بولاتىن. ورالداعى وقيعا – وسى تاپسىرمانىڭ ورىندالىپ جاتقانىنىڭ ناقتى كورىنىسى. اۋىلدا تۇراتىن ۆەتەرينار ماماندارعا ارنالعان قىزمەتتىك كولىكتەر زاماناۋي ۆەتەريناريالىق قۇرال-جابدىقپەن تولىق جابدىقتالعان. بۇل بولاشاقتا ەلدى مەكەندەردە ۆەتەريناريا قىزمەتى جىلدام ءارى ءتيىمدى بولۋىن قامتاماسىز ەتەدى. سونداي-اق وڭىردە اۋىل شارۋاشىلىعى قاۋىپسىزدىگى ارتىپ, مال اۋرۋلارىنىڭ الدىن الۋعا, ۆەتەريناريالىق باقىلاۋدى كۇشەيتۋگە سەپ بولادى.
- وڭىرىمىزدە ۆەتەريناريالىق ۇيىمداردىڭ ماتەريالدىق-تەحنيكالىق بازاسىن جۇيەلى جاڭعىرتۋعا كىرىستىك. قازىر وبلىستا جاڭادان ۆەتەريناريا بەكەتتەرى, مال قورىمدارى سالىنىپ جاتىر. سوڭعى ەكى جىلدا حالىقتىڭ ءومىرىن قامتاماسىز ەتەتىن سالالاردىڭ ماتەريالدىق-تەحنيكالىق بازاسىن جاقسارتۋ ءۇشىن وبلىستىق بيۋدجەتتەن 10 ملرد تەڭگە ءبولىنىپ, توتەنشە جاعداي, ورمان شارۋاشىلىعى, كوممۋنالدىق شارۋاشىلىق, ۆەتەريناريا, ءبىلىم مەن دەنساۋلىق سالالارىنا 700-گە جۋىق ارنايى تەحنيكا ساتىپ الىنعان ەدى. ال بيىل وبلىس بويىنشا 5 ميلليارد تەڭگەگە جۋىق قاراجاتقا 200-گە جۋىق ارنايى تەحنيكا ساتىپ الماقپىز. سونىڭ اياسىندا جۋىردا «باتىسيرريگاتسيا» مەكەمەسىنە 18 كولىك تاپسىرساق, بۇگىن ۆەتەريناريالىق ستانسالارعا 106 ارنايى تەحنيكا بەرىپ وتىرمىز, - دەدى وبلىس اكىمى ناريمان تورەعاليەۆ.
باتىس قازاقستان وبلىسى