الماتى وبلىسى, قوناەۆ قالاسىنا قاراستى قاپشاعاي سۋ قويماسىنىڭ جاعاجايىندا قايعىلى جاعداي ورىن الدى. وقيعا كەزىندە جاعاجايدا قۇتقارۋشىلار دا, بەينەباقىلاۋ كامەرالارى دا, مەديتسينالىق پۋنكت تە بولماعان, دەپ حابارلايدى Egemen.kz.
قايعىلى وقيعا 6 شىلدە كۇنى وتباسىمەن دەمالۋعا كەلگەن ءماجىلىس دەپۋتاتى باقىتبەك بازاربەكتىڭ كوز الدىندا بولعان.
جاعاجايداعى كۋاگەرلەردىڭ ايتۋىنشا, ايەلدى سۋدان شىعارىپ, العاشقى كومەك كورسەتۋگە تىرىسقانمەن, ونى امان الىپ قالۋ ەش مۇمكىن بولماعان.
جاعاجايدا بولعان ءماجىلىس دەپۋتاتى باقىتجان بازاربەك نىساننىڭ قاۋىپسىزدىك تالاپتارىنا ساي كەلمەيتىنىن, اۋماقتا قۇتقارۋشىلار مەن دارىگەر, بەينەباقىلاۋ مەن قۇتقارۋ قۇرالدارى قاراستىرىلماعانىن اشىنا ايتتى. سونىمەن قاتار بۇل جەر تەلىمى جەكە كاسىپكەرگە جالعا بەرىلگەن, الايدا يەسى كىرەبەرىسكە شلاگباۋم ورناتىپ, اقى الۋمەن عانا شەكتەلگەن.
دەپۋتات بۇل جاعدايعا بايلانىستى ءتيىستى ورگاندارعا سۇراۋ سالىپ, جاعاجاي يەسىنىڭ كىم ەكەنىن انىقتاپ, جاۋاپتىلاردى زاڭ الدىندا جاۋاپقا تارتۋدى تالاپ ەتەتىنىن جەتكىزدى.
قايعىلى جايتقا بايلانىستى الماتى وبلىسى پوليتسيا دەپارتامەنتى جاۋاپ بەرىپ, تەرگەۋ جۇمىستارى باستالعانىن مالىمدەدى.
«وقيعانىڭ بارلىق ءمان-جايىن انىقتاۋعا باعىتتالعان سوتقا دەيىنگى تەرگەۋ جۇرگىزىلىپ جاتىر. پوليتسيا دەمالىس ايماعىندا قۇتقارۋ قۇرالدارىنىڭ, كەزەكشى قۇتقارۋشىلاردىڭ بار-جوعىن, سونداي-اق نىساننىڭ قاۋىپسىزدىك تالاپتارىنا سايكەستىگىن تەكسەرىپ جاتىر. قايتىس بولعان ازاماتشانىڭ تۋىستارى مەن جاقىندارىنا كوڭىل ايتامىز», دەپ مالىمدەدى ۆەدومستۆو وكىلدەرى.
الماتى وبلىسى