قر قارجى نارىعىن رەتتەۋ جانە دامىتۋ اگەنتتىگى بانكتىك جانە ميكروقارجىلىق قىزمەت سالاسىنا قاتىستى باقىلاۋدى كۇشەيتەتىن جاڭا قاۋلى جوباسىن دايىندادى. جوبا قازىرگى ۋاقىتتا اشىق نورماتيۆتىك-قۇقىقتىق اكتىلەر پورتالىندا قوعامدىق تالقىلاۋعا شىعارىلعان. بۇل تۋرالى Egemen.kz اقپارات اگەنتتىگى حابارلايدى.
قۇجاتقا سايكەس, ەندى ينتەرنەت ارقىلى راسىمدەلگەن, كەپىلسىز تۇتىنۋشىلىق نەسيە سوماسى 150 اەك-تەن (ياعني 690 مىڭ تەڭگەدەن) اسقان جاعدايدا, قاراجات كەلىسىمشارتقا قول قويىلعاننان كەيىن 24 ساعات ىشىندە اۋدارىلمايدى. قاراجات تەك قارىز الۋشى كەلىسىمدى راستاعان سوڭ (مىسالى, eGov پورتالى ارقىلى) عانا بەرىلەدى.
سونىمەن قاتار "سۋىتۋ" نەمەسە كىدىرىس مەحانيزمى ەنگىزىلەدى. ەگەر ءبىر كۇن ىشىندە ازامات بىرنەشە ميكروكرەديت راسىمدەپ, ولاردىڭ جيىنتىق سوماسى 150 اەك-تەن اسىپ كەتسە, بانك نەمەسە ميكروقارجى ۇيىمى قوسىمشا نەسيە بەرۋدى توقتاتۋعا مىندەتتەلەدى.
العاش رەت ءىرى كولەمدە نەسيە راسىمدەيتىندەر ءۇشىن, سونداي-اق 21 جاسقا دەيىنگى جانە 55 جاستان اسقان ازاماتتار ءۇشىن جاڭا تالاپتار ەنگىزىلمەك. بۇل ساناتتاعى ازاماتتار نەسيە شارتىن تەك بانكتىڭ نەمەسە ميكروقارجىلىق ۇيىمنىڭ بولىمشەسىندە جەكە ءوزى قاتىسىپ, جازباشا كەلىسىم بەرگەن سوڭ عانا قول قويا الادى.
جاڭا جوبادا بانكتىك نەمەسە ميكروقارجىلىق ومبۋدسمەن لاۋازىمىنا ۇمىتكەرلەرگە دە ناقتى تالاپتار بەلگىلەنگەن. ەندى بۇل قىزمەتكە ۇمىتكەرلەر قازتەست جۇيەسى بويىنشا قازاق ءتىلىن B2 دەڭگەيىنەن تومەن ەمەس دەڭگەيدە مەڭگەرگەنىن دالەلدەۋى ءتيىس.