ءىىم ارنايى وپەراتسياسىنىڭ ناتيجەسىندە قاراساي اۋدانىنان ءىرى كولەمدەگى سينتەتيكالىق ەسىرتكى وندىرىسىمەن اينالىسقان جاسىرىن زەرتحانا تابىلىپ, جۇمىسىن توقتاتتى. زاڭسىز اينالىمنان ميلليونداعان دوللارعا باعالاناتىن ەسىرتكى زاتتارى تاركىلەندى, دەپ جازادى Egemen.kz.
الماتى وبلىسى, قاراساي اۋدانىنىڭ «تۇرار باقشاسى» اۋىلىندا جاسىرىن سينتەتيكالىق ەسىرتكى زەرتحاناسىنىڭ جۇمىسى توقتاتىلدى. بۇل – ىشكى ىستەر مينيسترلىگىنىڭ شۋ قالاسىنان باستاپ جۇرگىزگەن «باقىلاناتىن جەتكىزۋ» ءادىسى ارقىلى جۇزەگە اسقان ارنايى وپەراتسياسىنىڭ ناتيجەسى.
وپەراتسيا كەزىندە كورشى مەملەكەتتىڭ ەكى ازاماتى قولعا ءتۇستى. تەرگەۋ دەرەكتەرىنە قاراعاندا, ولار «مەفەدرون» ەسىرتكىسىن ءوندىرىپ, ونى تاراتۋ ماقساتىندا ارەكەت ەتكەن. ءىىم ەسىرتكى قىلمىسىنا قارسى ءىس-قيمىل كوميتەتى توراعاسىنىڭ مىندەتىن اتقارۋشى دانيار مەيرحاننىڭ ايتۋىنشا, تاركىلەنگەن 11 كگ ەسىرتكى 35 مىڭنان استام دوزاعا تەڭ. بۇل كولەڭكەلى نارىقتاعى باعامەن 1,6 ميلليون دوللارعا پارا-پار.
زەرتحاناعا جۇرگىزىلگەن ءتىنتۋ كەزىندە 20 ليتر جانە 115 كەلى پسيحوتروپ زات, سونداي-اق 2 توننادان اسا پرەكۋرسور تابىلعان. مامانداردىڭ ەسەبىنشە, ءدال وسى شيكىزاتتان تاعى شامامەن 120 كەلى سينتەتيكالىق ەسىرتكى ازىرلەنبەك بولعان.
جالپى العاندا, كولەڭكەلى ەسىرتكى بيزنەسىنە كەلتىرىلگەن زالال 17,5 ميلليون دوللارعا باعالانىپ وتىر. قازىر كۇدىكتىلەر ۋاقىتشا ۇستاۋ يزولياتورىنا قامالىپ, تەرگەۋ امالدارى جالعاسىپ جاتىر.