ەلوردادا تاعى ءبىر جولاۋشىلار اۆتوبۋسى اپاتقا ۇشىرادى. وقيعا سالدارىنان بىرنەشە ادام ءتۇرلى دەنە جاراقاتتارىن الىپ, اۋرۋحاناعا جەتكىزىلگەن, دەپ حابارلايدى Egemen.kz.
قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە, وقيعا ورنىنا جەدەل جاردەم قىزمەتى دەرەۋ جەتىپ, زارداپ شەككەن جولاۋشىلارعا العاشقى مەديتسينالىق كومەك كورسەتىلگەن. ۇشەۋى العاشقى كومەكتەن كەيىن ۇيلەرىنە جىبەرىلگەن. ال تراۆماتولوگيا ورتالىعىنا جەتكىزىلگەن تاعى ءبىر ازاماتتىڭ جاعدايى قالىپتى, ومىرىنە قاۋىپ ءتونىپ تۇرعان جوق.
استانا قالالىق پوليتسيا دەپارتامەنتىنىڭ الدىن الا مالىمەتى بويىنشا, جول اپاتىنا اۆتوبۋس جۇرگىزۋشىسىنىڭ كىناسى سەبەپ بولعان. ول قيىلىستا كەلە جاتقان Ford ماركالى كولىككە جول بەرمەي, سوقتىعىسقا جول اشقان.
قازىرگى ۋاقىتتا وقيعاعا بايلانىستى تەرگەۋ جۇمىستارى جۇرگىزىلىپ جاتىر.