«تازا قازاقستان» ەكولوگيالىق اكتسياسى جامبىل وبلىسىندا ۇزدىكسىز جالعاسىپ جاتىر. جالپىۇلتتىق سيپات العان ناۋقانعا بارلىق سالا وكىلدەرى مەن قالا, اۋدان, اۋىل تۇرعىندارى ۇلەس قوسىپ, قورشاعان ورتانىڭ تازالىعى جولىندا جۇمىلعان جۇدىرىقتاي بىرلىك تانىتىپ وتىر.
اكتسياعا جىل باسىنان بەرى ءوڭىر باسشىسى ەربول قاراشوكەەۆ باستاپ, حالىق قالاۋلىلارى, زيالى قاۋىم وكىلدەرى, سان سالانىڭ قىزمەتكەرلەرى كوپ ۇلەس قوستى. وبلىس ورتالىعى تاراز قالاسىنداعى بىرقاتار شاعىن اۋداندا مىڭداعان كوشەت وتىرعىزىلدى. ءبىرشاما ۋاقىت بۇرىن تاراز قالاسىنداعى «اۋليەاتا» اۋدانىنىڭ «مىڭبۇلاق» شاعىن اۋدانىندا «تازا اۋلا» اكتسياسى ۇيىمداستىرىلدى. ناۋقانعا جاستارمەن بىرگە شاعىن اۋدان تۇرعىندارى ءبىر كىسىدەي قاتىسىپ, تازالىق جۇمىسىن جۇرگىزدى.
«بەلسەندى جاستار ەكولوگيالىق اكتسياعا قاتىسۋدان ەشقاشان باس تارتقان ەمەس. وبلىس ورتالىعى تاراز قالاسىنىڭ مۇنتازداي تازا بولماۋى – بارىمىزگە سىن. ويتكەنى كونە تاراز – ەلىمىزدەگى جاسىل قالالاردىڭ ءبىرى. ناۋقانعا شاھار تۇرعىندارىنىڭ كوپتەپ اتسالىسىپ جاتقانى كوڭىل قۋانتادى. جەرگىلىكتى تۇرعىندار تابيعاتتى ايالاۋدى, قورشاعان ورتاعا قامقورلىقپەن قاراۋدى ءومىر سالتىنا اينالدىردى. «تازا اۋلا» اكتسياسى بارىسىندا تۇرعىنداردىڭ كونە شاھاردىڭ تازالىعىنا جاۋاپكەرشىلىكپەن قارايتىنىن ايقىن سەزىندىك. تازالىق – مادەنيەتتىڭ, وركەنيەتتىڭ بەلگىسى. قالا حالقى مۇنى جان جۇرەگىمەن ءتۇيسىنىپ, وبلىس ورتالىعىن قوقىستان تازارتۋعا جوعارى جاۋاپكەرشىلىكپەن اتسالىستى», دەدى تاراز قالالىق جاستار رەسۋرستىق ورتالىعى ديرەكتورىنىڭ ورىنباسارى كامال تۇرلىحان.
اپتاپ ىستىعى اپشىنى قۋىراتىن جاز مەزگىلىنىڭ قىتىمىر مىنەزىنە قاراماستان, بايزاق اۋدانىنىڭ حالقى سارىكەمەر اۋىلىنداعى اعادىل سۋحانباەۆ اتىنداعى ساياباقتى قوقىستان تازارتتى. قوردايلىقتار دا ەكولوگيالىق اكتسياعا مۇمكىندىگىنشە ۇلەس قوستى. مەركى اۋدانىنىڭ بەلسەندىلەرى تاۋ شاتقالدارىنا تولىپ قالعان قوقىستاردى جينادى. تۇرار رىسقۇلوۆ اۋدانىنىڭ ازاماتتارى «جەڭىس» ساياباعىندا تازالىق جۇمىسىن جۇرگىزدى.
«تازالىق اۋلادان باستالادى. ءاربىر ادام ءوزى تۇراتىن ءوڭىردىڭ تازالىعىنا جاۋاپكەرشىلىكپەن قاراسا, ەكولوگيالىق مادەنيەت قالىپتاسادى. «تازا قازاقستان» ەكولوگيالىق اكتسياسى بارشا ازاماتتىڭ قورشاعان ورتاعا قۇرمەتپەن قاراۋىنا سەپ بولدى. ونى كوزبەن كورىپ ءجۇرمىز. اۋدان ورتالىعىنىڭ تازالىعى بارىمىزگە سىن», دەيدى قۇلان اۋىلىنىڭ تۇرعىنى گۇلايحان ماراتقىزى.
جەرگىلىكتى اتقارۋشى بيلىك وكىلدەرى كەلتىرگەن رەسمي دەرەككە جۇگىنسەك, كوكتەمگى اباتتاندىرۋ جانە سانيتارلىق تازالىق ايلىعى اياسىندا باستالعان «TazaLike», «تازا اۋلا» «تازا قالا», «ۇلگىلى اۋلا» بايقاۋلارى وڭىردە تۇراقتى تۇردە وتكىزىلىپ جاتىر. بايقاۋ اياسىندا ۇزدىك شىققاندار ارنايى ماراپاتتارعا يە بولدى.
جالپى, جىل باسىنان بەرى جامبىل وبلىسىندا 803,8 مىڭ شاقىرىم كانالدار مەن ارىق جۇيەلەرى تازارتىلدى. سونىمەن قاتار 79,2 مىڭ تۇرعىن ءۇي اۋلالارى مەن 2,7 مىڭ شاقىرىم كوشەدە تازالىق جۇمىسى جۇرگىزىلدى. ءوڭىر بويىنشا 6,1 مىڭ توننا قوقىس شىعارىلىپ, 286,9 مىڭ كوشەت وتىرعىزىلدى. 641,1 مىڭ شارشى مەتر ساياباق پەن گۇلزار اۋماعى تازارتىلدى.
«تازا قازاقستان» ەكولوگيالىق اكتسياسى اياسىندا «جاسىل الەمدى بىرگە قۇرايىق» تاقىرىبىمەن ەكولوگيالىق اكتسيا ۇيىمداستىرىلعان بولاتىن. وعان ءوڭىر باسشىسى ە.قاراشوكەەۆ باستاعان لاۋازىمدى تۇلعالار قاتىستى. اكتسياعا وبلىس اۋماعىنداعى 248 مەكتەپتەن 10 375 وقۋشى لايىقتى ۇلەس قوستى. وقۋشىلار ءتۇرلى تاقىرىپتاعى بايقاۋلاردا باق سىنادى. ۇزدىك شىققان وزاتتار ءوڭىر باسشىسىنىڭ قولىنان ارنايى باعالى سىيلىقتارعا يە بولدى. ءبىر سوزبەن ايتقاندا, جامبىل وبلىسىندا «تازا قازاقستان» ەكولوگيالىق ناۋقانى اياسىندا قولعا الىنعان وركەندى ىستەر ىلكى ساتكە دە توقتاعان ەمەس. الداعى ۋاقىتتا دا اۋقىمدى جۇمىس اتقارىلماق.
جامبىل وبلىسى