جاراقاتتان بولاتىن ءولىم سانى تومەندەدى

ماماننىڭ ايتۋىنشا, جاراقاتتان بولاتىن ءولىم دەڭگەيىنىڭ ەڭ ايتارلىقتاي تومەندەۋى اقمولا, قوستاناي, سولتۇستىك قازاقستان وبلىستارىندا جانە الماتى قالاسىندا تىركەلىپ وتىر – بۇل وڭىرلەردە كورسەتكىش 23%-دان 38%-عا دەيىن تومەندەگەن.

2024 جىلى ەلىمىزدە 2,5 ميلليوننان استام ادام تراۆماتولوگيالىق كومەككە جۇگىنگەن. ونىڭ ىشىندە 240 مىڭ ناۋقاس ستاتسيونارلىق جاعدايدا ەمدەلسە, 130 مىڭنان استام وپەراتسيا جاسالعان. سولاردىڭ 1 556-سى جوعارى تەحنولوگيالىق ەم-شارالار ساناتىنا جاتادى.

دەگەنمەن, سوڭعى ۋاقىتتا جول-كولىك وقيعالارى سالدارىنان بولاتىن جاراقاتتار كوبەيىپ, مامانداردىڭ الاڭداۋشىلىعىن تۋعىزىپ وتىر. 2024 جىلى ەلىمىزدە 31 مىڭنان استام جول اپاتى تىركەلگەن. بۇل – الدىڭعى جىلمەن سالىستىرعاندا ەكى ەسەگە جۋىق كوپ. جول اپاتتارىنىڭ جارتىسىنان استامى الماتى قالاسى مەن وبلىسىندا, جامبىل, اقتوبە وبلىستارىندا, استانا مەن شىمكەنت قالالارىندا بولعان.

جىل قورىتىندىسىنا سايكەس جول اپاتتارى سالدارىنان 40 مىڭنان استام ادام زارداپ شەكسە, 2 452 ادام كوز جۇمعان.

وسى رەتتە ەلىمىزدىڭ جەدەل مەديتسينالىق كومەگى دامىعان مەملەكەتتەرمەن دەڭگەيلەس قىزمەت كورسەتىپ وتىرعانى اتاپ ءوتىلدى. ماسەلەن, 2024 جىلى جەدەل جاردەم وقيعا ورنىنا قالالاردا ورتا ەسەپپەن 8 مينۋتتا, اۋىلدىق جەرلەردە 9 مينۋتتا جەتكەن. زارداپ شەككەندەر ورتاشا ەسەپپەن 35 مينۋتتا اۋرۋحاناعا جەتكىزىلگەن. بۇل – مەديتسينادا «التىن ساعات» دەپ اتالاتىن كەزەڭ, ياعني ءومىر مەن ءولىم اراسىنداعى شەشۋشى ۋاقىت.

اكادەميك باتپەنوۆ اتىنداعى ۇلتتىق ورتالىق – ەلىمىزدەگى تراۆماتولوگيالىق كومەكتىڭ فلاگمانى سانالادى. 2024 جىلى ورتالىقتا 11 مىڭنان استام وپەراتسيا جاسالسا, سونىڭ ىشىندە 1 720 بۋىن ەندوپروتەزدەۋ, 1 500 ومىرتقا حيرۋرگياسى جانە 2 مىڭنان استام ارتروسكوپيالىق ارالاسۋ جۇرگىزىلگەن. بۇعان قوسا, وتكەن جىلى دياگنوستيكا مەن ەمدەۋدىڭ 20 جاڭا ءادىسى ەنگىزىلىپ, 11 پاتەنت الىنعان. 42 عىلىمي ماقالا, ونىڭ ىشىندە حالىقارالىق رەتسەنزيالاناتىن باسىلىمداردا جاريالانعان.

تەلەمەديتسينا باعىتىندا دا وڭ ناتيجەلەر بايقالادى – ورتالىق ماماندارى ەلىمىزدىڭ ءار تۇكپىرىنەن 183 ناۋقاسقا ساراپتامالىق كەڭەس بەرگەن. سونىمەن قاتار, ورتالىق كادر دايارلاۋ ىسىندە جەتەكشى ورىنعا يە. 2024 جىلى 15 رەزيدەنت وقۋدى اياقتاسا, 110 وڭىرلىك مامان قايتا دايارلىقتان وتكەن.

ءباسپاسوز جيىنى بارىسىندا ولجاس بەكاريسوۆ جاراقاتتىڭ الدىن الۋ شارالارىن كۇشەيتۋ, شۇعىل كومەكتى جاڭعىرتۋ جانە ەرتە وڭالتۋ جۇيەسىن دامىتۋ قاجەتتىگىن العا تارتتى. سونىمەن قاتار, جول-كولىك جاراقاتىن ازايتۋ ماقساتىندا ءتيىستى ۆەدومستۆولار اراسىنداعى ءوزارا ءىس-قيمىلدى كۇشەيتۋدىڭ ماڭىزدىلىعىن اتاپ ءوتتى.