«شىمكەنت – سامارا» تاس جولىندا پوليتسەيلەر Land Rover كولىگىن توقتاتىپ, جولاۋشىلاردىڭ بىرىنەن 400-دەن استام دوزاعا تەڭ سينتەتيكالىق ەسىرتكى تاركىلەدى. بۇل تۋرالى ىشكى ىستەر مينيسترلىگىنىڭ رەسمي ينتەرنەت-رەسۋرسى حابارلادى, دەپ جازادى Egemen.kz.
تۇركىستان وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى جۇرگىزگەن رەيد كەزىندە جامبىل وبلىسىنىڭ تۇرعىنى ۇستالدى. تەكسەرۋ بارىسىندا ونىڭ جانىنان ەسىرتكىگە ۇقساس زات سالىنعان 30 تۇيىنشەك تابىلعان. جەدەل ساراپتاما ولاردىڭ سينتەتيكالىق ەسىرتكى ەكەنىن كورسەتتى. ساراپشىلاردىڭ مالىمەتىنشە, تاركىلەنگەن زاتتىڭ سالماعى 400-دەن استام ءبىر رەتتىك دوزاعا سايكەس كەلەدى.
قازىرگى ۋاقىتتا اتالعان دەرەك بويىنشا تەرگەۋ امالدارى جۇرگىزىلۋدە. ۇستالعان ازاماتتىڭ ەسىرتكىنى قايدان العانى جانە ونى قايدا جەتكىزبەك بولعانى انىقتالىپ وتىر.