قارجى نارىعىندا سەنىمدى تۇتىنۋشى بولۋدىڭ ءبىر شارتى – نەسيە تاريحىنىڭ وڭ بولۋى. كەيىنگى كەزدەرى اۆتوسالوندار مەن ءتۇرلى ساۋدا ورىندارىنىڭ تاراپىنان «نەسيە تاريحىڭىز جاقسى بولسا, كولىك نەمەسە تاۋاردى شىعارىپ بەرەمىز» دەگەن جارنامالار ءجيى كەزدەسەدى, دەپ حابارلايدى Egemen.kz.
مۇنداي جاعدايدا ازاماتتار ءۇشىن ءوز نەسيە تاريحىن الدىن الا تەكسەرۋ ماڭىزدى بولا تۇسەدى. نەسيە تاريحى – بۇل جەكە نەمەسە زاڭدى تۇلعانىڭ اتىنا راسىمدەلگەن بارلىق نەسيە مەن قارىزدار جونىندەگى مالىمەتتەردى, ولاردىڭ تولەنۋ مەرزىمدەرى مەن ءتارتىبىن قامتيتىن رەسمي قۇجات. ياعني, بانكتەر مەن قارجى ۇيىمدارى قارىز بەرمەس بۇرىن, ءسىزدىڭ وسى تاريحىڭىزدى مۇقيات زەرتتەيدى. سەبەبى وندا ءسىزدىڭ بۇرىنعى تولەم ءتارتىبىڭىز, مەرزىمىن وتكىزۋ فاكتىلەرى, تولىق تولەم تۋرالى دەرەكتەر ساقتالادى.
ءار ازامات ءوز نەسيە تاريحىن جىلىنا ءبىر رەت تەگىن تەكسەرە الادى. قايتادان سۇراتۋ اقىلى نەگىزدە جۇرگىزىلەدى. بۇل مۇمكىندىك قازاقستان رەسپۋبليكاسىنىڭ زاڭناماسىندا بەكىتىلگەن.
نەسيە تاريحى ەسەبىن الۋ بىرنەشە ءتاسىل ارقىلى جۇزەگە اسادى. ازاماتتار ونى ءبىرىنشى كرەديتتىك بيۋرونىڭ رەسمي سايتى نەمەسە ءموبيلدى قوسىمشاسى ارقىلى سۇراتا الادى. سونىمەن قاتار eGov.kz ەلەكتروندى ۇكىمەت پورتالى ارقىلى, حالىققا قىزمەت كورسەتۋ ورتالىقتارىندا, «قازپوشتا» بولىمشەلەرىندە جانە ءبىرىنشى كرەديتتىك بيۋرونىڭ كەڭسەسىندە دە الۋعا بولادى. بۇعان قوسا مەملەكەتتىك كرەديتتىك بيۋرو ارقىلى دا ەسەپ قولجەتىمدى.
«ەگەر ءسىز ءوزىڭىزدىڭ كرەديتتىك ەسەبىڭىزدە دايەكسىز دەرەكتەردى – مىسالى, وتەلگەن قارىز نەمەسە تولىق تولەنگەن كرەديت بويىنشا تولەم مەرزىمىن كەشىكتىرۋ تۋرالى جازبانى بايقاساڭىز, مىندەتتى تۇردە ءتيىستى بانككە نەمەسە مقۇ-عا حابارلاسىڭىز. شاعىمدارىڭىزدى ءتيىستى قۇجاتتارمەن راستاڭىز», دەپ تۇسىندىرەدى قارجى نارىعىن رەتتەۋ جانە دامىتۋ اگەنتتىگى.