قازاقستاندا 2025 جىلدىڭ 1 شىلدەسىنەن باستاپ اۆتوجول جانە اۋەجاي ينفراقۇرىلىمىندا پايدالانىلاتىن اسفالتوبەتون قوسپالارىنىڭ ساپاسىنا قويىلاتىن جاڭارتىلعان تالاپتار كۇشىنە ەنەدى. وزگەرىستەر قر ست 1225-2019 «جول, اۋەجاي اسفالتبەتون قوسپالارى جانە اسفالتبەتون. تەحنيكالىق شارتتار» ۇلتتىق ستاندارتىنا ەنگىزىلدى. بۇل قادام جول جامىلعىسىنىڭ سەنىمدىلىگىن ارتتىرۋعا جانە ونى پايدالانۋ كەزىندەگى تاۋەكەلدەردى ازايتۋعا باعىتتالعان, دەپ حابارلايدى Egemen.kz.
كولىك مينيسترلىگىنىڭ حابارلاۋىنشا, جاڭارتىلعان ستاندارتتى «قازاقستان جول عىلىمي-زەرتتەۋ ينستيتۋتى» (قازجولعزي) ماماندارى ازىرلەدى. وزگەرىستەر جۇرگىزىلگەن زەرتحانالىق سىناقتار مەن عىلىمي زەرتتەۋلەر نەگىزىندە ينستيتۋت عالىمدارى مەن ماماندارىنىڭ قاتىسۋىمەن, جولداردىڭ ناقتى پايدالانۋ جاعدايلارى مەن حالىقارالىق تالاپتار ەسكەرىلە وتىرىپ جۇزەگە اسىرىلدى.
ايتا كەتەيىك, ستاندارتتان رەسمي تۇردە قايتا قالىپتاستىرىلعان اسفالتوبەتون سىنامالارىنىڭ سۋمەن قانىعۋ كورسەتكىشى الىنىپ تاستالعان.
«بۇل شەشىم زەرتحانالىق زەرتتەۋلەردىڭ ناتيجەسىنە نەگىزدەلگەن. زەرتتەۋلەر كورسەتكەندەي, اسفالتبەتون سىنامالارىن قايتا قالىپتاستىرۋ كەزىندە ماتەريال قۇرىلىمىنا اسەر ەتەتىن ءىرى شاعىل تاستىڭ قارقىندى ۇگىلۋى بايقالادى, ستاندارتتى تىعىزداۋ كەزىندە بۇل كورسەتكىش 18%-عا دەيىن جەتۋى مۇمكىن. مۇنداي جاعداي سىناق ناتيجەلەرىنىڭ جانە سۋمەن قانىعۋ كورسەتكىشىنىن بۇرمالانۋىنا اسەر ەتۋى مۇمكىن», دەپ مالىمدەدى «قازجولعزي».
ستاندارتتى جاڭارتۋ ساپانى باقىلاۋدىڭ وبەكتيۆتى جۇيەسىنە كوشۋ جانە جول قۇرىلىسىن ءتيىمدى ەتۋدىڭ ماڭىزدى قادامى بولىپ تابىلادى. بۇل مەردىگەرلەر مەن وندىرۋشىلەر ءۇشىن كەلەسى مۇمكىندىكتەردى بەرەدى:
ناقتى جاعدايلارعا بەيىمدەلگەن زاماناۋي باقىلاۋ ادىستەرىن ەنگىزۋ; سىناقتاردىڭ بۇرمالانۋ قاۋپىن ازايتۋ; تەحنيكالىق تالاپتاردىڭ تۇسىنىكتىلىگى مەن بولجامدىلىعى; جول جامىلعىسىنىڭ سەنىمدىلىگىن ارتتىرۋ ەسەبىنەن شىعىنداردى ازايتۋ.«سونىمەن قاتار, ستاندارت كەلەسى قوسىمشا وزگەرىستەردى قامتىدى: قوسپانى توسەۋ تەمپەراتۋرالىق رەجيمىن قايتا قاراۋ; تىعىزداۋ كوەففيتسيەنتى بويىنشا ناقتىلاۋ; تاس ماتەريالدىڭ بيتۋممەن ىلىنىسۋىنە قويىلاتىن تالاپتاردى ناقتىلاۋ; قوسپالاردى اۋەايلاقتاردا, قالالىق كوشەلەردە جانە ونەركاسىپتىك نىسانداردا قولدانۋ اياسىن كەڭەيتۋ», دەلىنگەن حابارلامادا.
مامانداردىڭ ايتۋىنشا, مۇنداي نورماتيۆتەردى ازىرلەۋ مەن قايتا قاراۋ ءۇشىن مىندەتتى تۇردە بەيىندى عىلىمي ينستيتۋتتاردىڭ قاتىسۋى, اسپاپتىق سىناقتار مەن كەشەندى زەرتتەۋلەر قاجەت. وسىنداي ءتاسىل حالىقارالىق تالاپتارعا سايكەستىكتى قامتاماسىز ەتىپ قانا قويماي, قازاقستانداعى ناقتى كليماتتىق جانە پايدالانۋ جاعدايلارىن دا تولىق ەسكەرۋگە مۇمكىندىك بەرەدى.