شىمكەنتتىڭ 24 جاستاعى تۇرعىنى فەرۋزا راحيموۆا العاشقى جۇكتىلىگىندە ۇشەم — ەكى ۇل مەن ءبىر قىزدى دۇنيەگە اكەلدى, دەپ حابارلايدى Egemen.kz.
نارەستەلەر جۇكتىلىكتىڭ 31-اپتاسىندا, ياعني مەرزىمىنەن بۇرىن دۇنيەگە كەلگەن. باستاپقىدا ولاردىڭ جاعدايى اۋىر بولىپ, جاڭا تۋعان شاقالاقتار ءبىراز ۋاقىت تىنىس الۋ اپپاراتىنىڭ كومەگىنە مۇقتاج بولدى. سابيلەر جانساقتاۋ بولىمىندە دارىگەرلەردىڭ ءجىتى باقىلاۋىندا جاتتى.
دەگەنمەن, دارىگەرلەردىڭ بىلىكتى كومەگىنىڭ ارقاسىندا سابيلەر ءومىر ءۇشىن كۇرەستى جەڭىپ شىقتى. قازىر ولار انا سۇتىمەن قورەكتەنىپ, سالماق قوسىپ كەلەدى. اناسى مەن ۇشەمدەردىڭ جاعدايى جاقسى. قۋانىشقا كەنەلگەن وتباسى ۇشەمگە مۇستافا, مۇسا, حاديا دەپ ەسىم بەرگەن.
ايتا كەتەيىك, شىمكەنت قالاسىندا تۋ كورسەتكىشى جىل ساناپ ارتىپ كەلەدى. 2025 جىلدىڭ باسىنان بەرى مۇندا 12 648 ءسابي دۇنيەگە كەلگەن. ولاردىڭ ىشىندە 149 ەگىز جانە ءۇش ۇشەم تىركەلگەن.