استانا ماڭىنداعى جولامان اەرودرومىندا اپاتقا ۇشىراعان جەڭىل موتورلى ۇشاق «اۆياتسيالىق وقۋ ورتالىعىنىڭ» مەنشىگى ەمەس. بۇل تۋرالى ورتالىقتىڭ ءباسپاسوز قىزمەتى رەسمي مالىمدەمە جاسادى, دەپ حابارلايدى Egemen.kz.
وقۋ ورتالىعىنىڭ مالىمەتىنشە, UP LA 161 ۇلگىسىندەگى اۋە كەمەسى ولارعا تيەسىلى ەمەس, تەك ساقتاۋ ءۇشىن اەرودروم اۋماعىندا ورنالاسقان. ۇشاقتىڭ ناقتى يەسى — ا.ك. كاسەنوۆ ەسىمدى جەكە تۇلعا.
«اپاتقا ۇشىراعان ۇشاق ءبىزدىڭ بالانسىمىزدا جوق جانە ونى ورتالىق ەشقاشان پايدالانباعان. ول تەك كەلىسىم بويىنشا ءبىزدىڭ الاڭدا ساقتاۋلى تۇرعان», دەلىنگەن مالىمدەمەدە.
ايتا كەتەيىك, ۇشۋ پيلوتتىڭ جەكە شەشىمىمەن جۇزەگە اسقان. ول رەيسكە دايىندىقتى, بريفينگ پەن ءوتىنىم ءراسىمىن ءوزى جۇرگىزگەن, ال بۇل ۇشۋ وقۋ ورتالىعىنىڭ وقۋ پروتسەسىنە ەشقانداي قاتىسى بولماعان.
ۇشاقتا بولعان ەكىنشى ادام ورتالىقتىڭ قىزمەتكەرى بولعان. الايدا, ول بۇل رەيسكە قىزمەتتىك تاپسىرمامەن ەمەس, جەكە باستاماسىمەن قاتىسقانى حابارلاندى.
«ۇشۋ ۇشاق يەسىنىڭ باستاماسىمەن جۇزەگە اسىرىلدى جانە ءبىزدىڭ كومپانيانىڭ وپەراتسيالىق قىزمەتىنە قاتىسى جوق. قازا تاپقانداردىڭ جاقىندارىنا قايعىرىپ, شىن جۇرەكتەن كوڭىل ايتامىز», دەدى ورتالىق وكىلدەرى.
ەستەرىڭىزگە سالا كەتەيىك, وقيعا 22 ماۋسىم كۇنى وقۋ-جاتتىعۋ ماقساتىندا جاسالعان رەيس كەزىندە بولعان. ۇشاقتاعى ەكى ادامنىڭ ەكەۋى دە وقيعا ورنىندا قازا تاپقان. قازىر كولىك مينيسترلىگى ارنايى كوميسسيا قۇرىپ, اپاتتىڭ سەبەپتەرىن انىقتاپ جاتىر.