2024 جىلى ەل بويىنشا شامامەن 158 مىڭ گەكتار جەرگە (ونىڭ 130 مىڭ گەكتارى وڭتۇستىك وڭىرلەرگە تيەسىلى) سۋ ۇنەمدەۋ تەحنولوگيالارى ەنگىزىلگەن. ال بيىلعى جىل باستالعالى بەرى 85 مىڭ گەكتار (ونىڭ ىشىندە وڭتۇستىك وڭىرلەردە 59 مىڭ گەكتارعا جۋىق) جەرگە سۋ ۇنەمدەۋ تەحنولوگيالارى ورناتىلىپ, ونىڭ ىشىندە 15,5 مىڭ گەكتارعا جاڭبىرلاتىپ سۋارۋ جانە 29,4 مىڭ گەكتارعا تامشىلاتىپ سۋارۋ جۇيەلەرى قولدانىلعان, ال 14,1 مىڭ گەكتار جەر لازەرلىك قۇرىلعىمەن تەگىستەلگەن, دەپ حابارلايدى Egemen.kz.
قازىرگى ۋاقىتتا قازاقستاندا جاڭبىرلاتىپ جانە تامشىلاتىپ سۋارۋ قوندىرعىلارىن شىعاراتىن ءتورت وتاندىق زاۋىت جۇمىس ىستەيدى. ولار تۇركىستان وبلىسىندا جانە استانا, الماتى قالالارىندا ورنالاسقان.
بيىل تۇركىستان وبلىسىندا تامشىلاتىپ سۋارۋ جابدىقتارىن شىعاراتىن ءۇش زاۋىت اشۋ جوسپارلانىپ وتىر.
«بىلتىر مينيسترلىگىمىز فەرمەرلەردىڭ سۋ ۇنەمدەۋ تەحنولوگيالارىن ساتىپ الۋى مەن ورناتۋىنا كەتكەن شىعىننىڭ وتەماقىسىن 30%-عا ارتتىردى. سونىمەن قاتار سۋارمالى سۋعا سارالانعان سۋبسيديالار ەنگىزىلدى. سۋ ۇنەمدەۋ جۇيەلەرىن قولداناتىن شارۋالار ءۇشىن سۋبسيديا كولەمى 60%-دان 85%-عا دەيىن ۇلعايتىلدى. مۇنداي تەحنولوگيالاردى قولدانۋ سۋارمالى سۋدى 30%-عا دەيىن ۇنەمدەۋگە مۇمكىندىك بەرەدى», دەدى سالا مينيسترلىگىنە قاراستى سۋ ۇنەمدەۋ تەحنولوگيالارىن دامىتۋ دەپارتامەنتىنىڭ ديرەكتورى بەرىكبول ماندىباەۆ.