قر عىلىم جانە جوعارى ءبىلىم ءمينيسترى ساياسات نۇربەك ۇلتتىق بىرىڭعاي تەستىلەۋدەن 140 بالل جيناعان جانىبەك ءابىلحاندى قۇتتىقتادى, دەپ حابارلايدى Egemen.kz.
ۇلتتىق بىرىڭعاي تەستىلەۋدە ەڭ جوعارى ناتيجە كورسەتكەن تالاپكەر تۇركىستان وبلىسى, ورداباسى اۋدانىنداعى مەكتەپتىڭ تۇلەگى بولدى. عىلىم جانە جوعارى ءبىلىم ءمينيسترى ساياسات نۇربەك تالاپكەر جانىبەك ءابىلحاندى جەتىستىگىمەن قۇتتىقتاپ, اتا-اناسىنا العىس ءبىلدىردى. كەزدەسۋ بارىسىندا مينيستر وعان العىس حات پەن ەستەلىك سىيلىق تابىستادى.
كەزدەسۋ اياسىندا ساياسات نۇربەك ەلىمىزدەگى جوعارى ءبىلىم بەرۋ سالاسىنىڭ مۇمكىندىكتەرىنە, سونداي-اق قازاقستاندا اشىلعان شەتەلدىك ۋنيۆەرسيتەتتەردىڭ الەۋەتىنە توقتالدى.
ء«بىز قاراپايىم اۋىل مەكتەبىنىڭ تۇلەگى ەڭ جوعارى بالل جيناعانىنا ەرەكشە قۋانامىز. مەملەكەت تاراپىنان ونىڭ ءبىلىمىن ءارى قاراي دامىتۋىنا تولىق قولداۋ كورسەتىلەدى. بۇگىندە قازاقستان وڭىرلىك اكادەميالىق حاب رەتىندە قالىپتاسىپ كەلەدى. ەلدە قۇرىلعان ءبىلىم بەرۋ ەكوجۇيەسى حالىقارالىق سەرىكتەستەردىڭ قىزىعۋشىلىعىن ارتتىرىپ جاتىر. جەتەكشى شەتەلدىك ۋنيۆەرسيتەتتەرمەن بىرلەسە وتىرىپ, جاڭا ءبىلىم بەرۋ باعدارلامالارى جۇزەگە اسىرىلۋدا. بۇل جەتىستىكتەر قازاقستاننىڭ ءبىلىم بەرۋ جۇيەسىنىڭ حالىقارالىق دەڭگەيدە مويىندالعانىن كورسەتەدى», دەدى مينيستر.
ايتا كەتەيىك, جانىبەك ءابىلحان 19 مامىر كۇنى شىمكەنت قالاسىنداعى ايماقتىق تەستىلەۋ ورتالىعىندا «ماتەماتيكا–ينفورماتيكا» پاندەر كومبيناتسياسى بويىنشا سىناق تاپسىرىپ, ەڭ جوعارى كورسەتكىشكە قول جەتكىزدى. بۇل — ونىڭ استاناعا العاش كەلۋى. ول ەلورداداعى بىرنەشە جوعارى وقۋ ورنىن ارالاپ, وقۋ ينفراقۇرىلىمىمەن تانىستى.