جازعى دەمالىس كەزىندە سۋداعى قاۋىپسىزدىك ماسەلەلەرى ءبىرىنشى ورىنعا شىعادى. جازاتايىم وقيعالاردىڭ الدىن الۋ جانە سۋ ايدىندارىندا ءتارتىپتى قامتاماسىز ەتۋ ماقساتىندا تجم شىعىس قازاقستان مەن اباي وبلىستارىندا قاۋىپسىزدىك شارالارىن كۇشەيتۋدە, دەپ جازادى Egemen.kz.
ءشۇلبى سۋ قويماسىنىڭ جاعالاۋىندا ءۇش جاڭا قۇتقارۋ بەكەتى اشىلدى. ولاردىڭ بارلىعى تولىق جابدىقتالعان: بەينەباقىلاۋ جۇيەلەرى ورناتىلعان, قۇتقارۋ جانە ءجۇزۋ قۇرالدارى بار, مەديتسينالىق پۋنكتتەر جابدىقتالعان. بۇل ىقتيمال وقيعالارعا جەدەل دەن قويۋعا جانە دەمالۋشىلارعا ۋاقتىلى كومەك كورسەتۋگە مۇمكىندىك بەرەدى.
سالتاناتتى اشىلۋ راسىمىندە اباي وبلىسى تجد باستىعى ماناربەك شاپاعاتوۆ تجد بازاسىندا ارنايى دايارلىقتان وتكەن 10 ازاماتتىق قۇتقارۋشىعا سەرتيفيكاتتار تابىس ەتتى. سونداي-اق ءىس-شارا اياسىندا كورمە جاتتىعۋى ءوتتى: دايىندالعان قۇتقارۋشىلار سۋعا باتىپ بارا جاتقان ادامدى قۇتقارۋ بويىنشا ءىس-قيمىلدارىن كورسەتىپ, كاسىبي دايىندىقتىڭ جوعارى دەڭگەيىن راستادى.
شىعىس قازاقستان وبلىسىندا دا قوسىمشا شارالار قابىلداندى. نوۆوسترويكا اۋىلىنداعى بۇقتىرما سۋ قويماسىنىڭ سامارا جاعالاۋىندا تاعى ءبىر قۇتقارۋ بەكەتى جۇمىسىن باستادى. شقو تجد ءورت سوندىرۋشىلەرى مەن جەدەل-قۇتقارۋ جاساعىنىڭ قىزمەتكەرلەرى شومىلۋ ماۋسىمى بويى كەزەكشىلىكتە بولادى.
بەكەت قۇتقارۋ جابدىقتارىمەن, سونىڭ ىشىندە ءجۇزۋ قۇرالدارىمەن جانە ءورت ءسوندىرۋ ماشيناسىمەن جابدىقتالعان. ۇزىندىعى شامامەن 110 كم جاعالاۋدى پاترۋلدەۋ قايىقتارمەن جۇزەگە اسىرىلادى. سونداي-اق دەمالۋشىلار اراسىندا دا, دەمالىس بازالارىنىڭ يەلەرى تاراپىنان دا ءورت قاۋىپسىزدىگى ەرەجەلەرىنىڭ ساقتالۋىنا مونيتورينگ جۇرگىزىلەدى. دەمالۋشىلارمەن ۇنەمى نۇسقاۋلىقتار وتكىزىلىپ, سۋدا جانە جاعالاۋ ايماعىندا قاۋىپسىزدىك تۋرالى جادىنامالار تاراتىلادى.
«باستى مىندەت – سۋداعى جازاتايىم وقيعالاردىڭ جانە جاعالاۋدا ورنالاسقان وبەكتىلەردەگى ورتتەردىڭ الدىن الۋ. وتكەن ماۋسىمدا جەدەل ارەكەتتىڭ ارقاسىندا ءورت سوندىرۋشىلەر ءورتتىڭ دەمالىس ورىندارىنا تارالۋىنا جول بەرمەدى. ءجۇزۋ قۇرالدارىنداعى كەزەكشىلىك جىلدام ارەكەت ەتۋگە جانە كومەك كورسەتۋگە مۇمكىندىك بەرەدى», – دەپ شقو تجد باستىعىنىڭ ورىنباسارى يسحار ساۆازوۆ اتاپ ءوتتى.
سونىمەن قاتار شومىلۋ ماۋسىمى باستالعانعا دەيىن تج قىزمەتىنىڭ قىزمەتكەرلەرى ازاماتتاردىڭ قاۋىپسىزدىگىن قامتاماسىز ەتۋ بويىنشا قاجەتتى شارالار تىزبەسى بار جەكە دەمالىس ايماقتارىنىڭ يەلەرىنە ۇسىنىس حاتتار تابىس ەتتى.
سۋ ايدىندارىندا قاۋىپسىزدىكتى قامتاماسىز ەتۋ جونىندەگى جۇمىس ەرەكشە باقىلاۋدا جانە جاز ماۋسىمى بويى جالعاساتىن بولادى.