ەكسپورتتىق اكسەلەراتسيا باعدارلاماسى 2020 جىلدان 2024 جىلعا دەيىنگى العاشقى بەس جىلدا ىسكە اسىرىلىپ, شيكىزاتتىق ەمەس سەكتورداعى 557 قازاقستاندىق كاسىپورىنعا سىرتقى نارىقتارعا شىعۋعا قولداۋ كورسەتتى. 2025 جىلى باعدارلاما اۋقىمىن كەڭەيتىپ, سكورينگتىك مودەل ارقىلى ىرىكتەۋدەن وتكەن وڭدەۋ ونەركاسىبى مەن قىزمەت كورسەتۋشى سەكتورداعى تاعى 120 كاسىپورىندى قامتىدى, دەپ جازادى Egemen.kz.
«قازاقستان ەكسپورتىنىڭ كولەمى 3,1%-عا ارتىپ, 80 ملرد اقش دوللارىنان استى. ونىڭ ىشىندە وڭدەلگەن ءونىم ەكسپورتى 28,8 ملرد دوللارعا جەتتى. وسى كەزەڭدە قىزمەتتەر ەكسپورتىنىڭ كولەمى دە 10,8%-عا ءوسىپ, 11,8 ملرد دوللاردى قۇرادى. بۇل جاي عانا ساندار ەمەس. بۇل – ءونىمىمىز بەن يدەيامىزدى حالىقارالىق دەڭگەيدە ىلگەرىلەتىپ جاتقان مىڭداعان كاسىپكەردىڭ ەڭبەگىنىڭ ناتيجەسى. بۇل – قازاقستاندىق ونىمدەر مەن قىزمەتتەردىڭ حالىقارالىق نارىقتا سۇرانىسقا يە ەكەنىنىڭ دالەلى», – دەدى قر ساۋدا جانە ينتەگراتسيا ۆيتسە-ءمينيسترى اسەت نۋسۋپوۆ ەكسپورتتاۋشىلار فورۋمىندا.
مەملەكەت باسشىسىنىڭ تاپسىرماسىمەن قولعا الىنعان جانە قر ساۋدا جانە ينتەگراتسيا مينيسترلىگى مەن «QazTrade» اق بىرلەسىپ ىسكە اسىرىپ وتىرعان ەكسپورتتىق اكسەلەراتسيا باعدارلاماسى ەكسپورتقا باعىتتالعان بيزنەستى قولداۋدىڭ جانە وتاندىق ونىمدەردى شەتەلدىك نارىقتارعا ىلگەرىلەتۋدىڭ نەگىزگى قۇرالىنا اينالدى. 2024 جىلدىڭ وزىندە باعدارلامانىڭ 47 قاتىسۋشى كومپانياسى ەكسپورتقا شىقتى نەمەسە سىرتقى ساۋدا كەلىسىمشارتتارىن جاساستى, تاعى 18-ءى كەلىسىمدەر ساتىسىندا, ال 46 كومپانيا الەۋەتتى شەتەلدىك سەرىكتەستەرمەن كەلىسسوزدەر جۇرگىزىپ جاتىر.
باعدارلاما تەگىن نەگىزدە جۇزەگە اسىرىلادى جانە ەكسپورتتىق الەۋەتتى باعالاۋدان باستاپ ناقتى نارىقتارعا شىعۋ, كەلىسسوز جۇرگىزۋ جانە ەكسپورتتىق كەلىسىمشارتتار جاساسۋعا دەيىن كەشەندى قولداۋ ۇسىنادى. 2025 جىلى 18 اقپان مەن 31 ناۋرىز ارالىعىندا وتىنىمدەردى قابىلداۋ كەزەڭىندە ەلىمىزدىڭ بارلىق وڭىرلەرىن قامتىعان 33 ءتۇسىندىرۋ شاراسى – Road show فورماتىندا وتكىزىلدى. 800-دەن استام كومپانيا اقپاراتتاندىرىلىپ, 1200-دەن استام وندىرۋشىگە شاقىرۋ جولداندى. ناتيجەسىندە 264 ءوتىنىم كەلىپ ءتۇستى, ونىڭ ىشىندە 52-ءسى – قىزمەت جەتكىزۋشىلەردەن. ۆەريفيكاتسيا اياقتالعان سوڭ, كاسىپورىندار باسىم نارىقتارعا ءبولىندى: رەسەي, قىتاي, ءباا, وزبەكستان, ساۋد ارابياسى, يتاليا جانە پاكىستان.
2025 جىلدىڭ ماۋسىم ايىنان باستاپ وقۋ باعدارلاماسى باستالدى, سونىمەن قاتار شەتەلدىك ساتىپ الۋشىلاردى ىزدەۋ جانە قاتىسۋشىلارعا كەڭەس بەرۋ جۇمىستارى قاتار جۇرگىزىلۋدە. ءاربىر ەل بويىنشا سىرتقى نارىققا شىعۋ ۇدەرىسىنە سۇيەمەلدەۋ جۇرگىزەتىن حالىقارالىق ساراپشىلار بەكىتىلدى. ىرىكتەۋ ناتيجەسىندە 120 نەگىزگى قاتىسۋشى جانە 20 رەزەرۆتەگى كومپانيادان تۇراتىن پۋل جاساقتالىپ, ولارمەن جەكە كەلىسىمشارتتار جاسالاتىن بولادى.
سالالىق قاۋىمداستىقتارمەن ىنتىماقتاستىق اياسىندا جۇيەلى كەدەرگىلەردى جويۋعا ەرەكشە نازار اۋدارىلۋدا. 2020–2025 جىلدار ارالىعىندا باعدارلاما تۇراقتى ناتيجەلىلىك كورسەتىپ وتىر: قاتىسۋشىلار قاتارىندا تاماق, جەڭىل, حيميا, ماشينا جاساۋ ونەركاسىبى جانە قىزمەت كورسەتۋ سەكتورىنىڭ كاسىپورىندارى بار. 2020 جىلى باعدارلاما تەك قىتاي باعىتىنا باعىتتالسا, 2025 جىلى ماقساتتى نارىقتار گەوگرافياسى ون ءبىر ەلگە دەيىن كەڭەيدى. ولاردىڭ قاتارىندا تاياۋ شىعىس, تمد, ەۋروپا جانە ازيانىڭ نەگىزگى نارىقتارى بار.
ەكسپورتتىق اكسەلەراتسيا باعدارلاماسى قازاقستاندىق شيكىزاتتىق ەمەس ەكسپورتتى ىلگەرىلەتۋدىڭ ناقتى تەتىگى بولا وتىرىپ, كاسىپكەرلەرگە وقىپ-ۇيرەنۋ, دايىندالۋ عانا ەمەس, حالىقارالىق سەرىكتەستەرمەن ناقتى كەلىسىمشارتتار جاساۋ مۇمكىندىگىن دە ۇسىنىپ وتىر.