مادەنيەت جانە اقپارات مينيسترلىگىنە قاراستى مادەني مەكەمەلەردە بالالار ءۇشىن قولجەتىمدى بولۋدىڭ ءتۇرلى جولدارى مەن مۇمكىندىكتەرى قاراستىرىلعان. سونىڭ ءبىرى – 2017 جىلدان بەرى مينيسترلىكتىڭ بۇيرىعىمەن (مادەنيەت جانە سپورت ءمينيسترىنىڭ 2017 جىلعى 19 مامىرداعى № 142 بۇيرىعى) رەسپۋبليكالىق دەڭگەيدەگى مۋزەيلەر مەن مۋزەي-قورىقتارعا ءار ايدىڭ 3-ءشى جەكسەنبىسىندە بارلىق ساناتتاعى ازاماتتار ءۇشىن, كانيكۋل كۇندەرى مەكتەپ جاسىنداعى بالالار ءۇشىن كىرۋ تەگىن. بۇل تۋرالى كوپشىلىك ءالى كۇنگە دەيىن بىلە بەرمەيدى. وسى ورايدا سالا مينيسترلىگىنە جانە قر ۇلتتىق مۋزەيگە ساۋالدار جولداپ, ءمان-جايدى تولىعىراق بىلگەن ەدىك, دەپ جازادى Egemen.kz.
دەمالىس كەزەڭدەرىندە بالالار كەز-كەلگەن مۋزەيگە تەگىن كىرە الادى
ايتا كەتكەن ءجون, مينيسترلىكتىڭ بۇيرىعىنا سايكەس مەكتەپ وقۋشىلارى ءۇشىن كۇزگى, قىسقى, كوكتەمگى, جازعى دەمالىس كەزەڭدەرىندە رەسپۋبليكالىق مۋزەيلەر مەن مۋزەي-قورىقتاردىڭ كەز-كەلگەنىنە كىرۋ تەگىن.
بۇگىندە مينيسترلىك جەرگىلىكتى دەڭگەيدەگى اكىمدىكتەرگە مۋزەيلەر مەن مۋزەي-قورىقتاردا جازعى دەمالىس كەزەڭىندە بالالارعا تەگىن كىرۋدى قامتاماسىز ەتۋ تۋرالى ۇسىنىس ەنگىزدى, بۇل باعىتتاعى جۇمىستار مينيسترلىكتىڭ باقىلاۋىندا تۇر.
تەاترعا تەگىن كىرۋ ءبىلىم مەكەمەلەرىنىڭ تەاترعا الدىن-الا جىبەرگەن رەسمي حاتىنىڭ نەگىزىندە جۇزەگە اسىرىلادى. بۇل رەتتە بالالاردىڭ سپەكتاكلگە كىرۋى قويىلىمنىڭ جاس شەكتەۋىنە بايلانىستى, 16 جاسقا تولماعان بالالار قاسىندا ەرەسەك ادام بولماسا, تەاتر سپەكتاكلىنە كىرە المايدى. وسىعان وراي, تەاتر ۇيىمدارىنا وقۋشىلاردىڭ تەگىن كىرۋى ولاردىڭ تىكەلەي رەپەرتۋارلىق جوسپارىنا سايكەس ۇيىمداستىرىلادى.
سول سەكىلدى وتاندىق مۋزەيلەرگە دە جازعى دەمالىس كەزىندە كىشى جاستاعى بالالار اتا-اناسىمەن نەمەسە وزگە دە قامقورشىلارىمەن (تاربيەشى, مۇعالىم) بىرگە كەلۋى شارت. اتا-انا, سىنىپ جەتەكشىسىمەن كەلگەن جاعدايدا ۇلكەندەردىڭ مۋزەيگە كىرۋ اقىسى پرەيسكۋرانت بويىنشا تولەنەدى.
ستاتيستيكالىق دەرەكتەر
2024 جىلدىڭ ستاتيستيكاسىنا سۇيەنسەك, مادەنيەت جانە اقپارات مينيسترلىگىنە باعىنىستى ەلورداداعى رەسپۋبليكالىق ءۇش تەاتردا 3 958 بالاعا تەگىن قويىلىم كورسەتىلگەن. سونىڭ ىشىندە, «استانا بالەت» تەاترىندا 260 قايىرىمدىلىق اكتسياسى, قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىندا 1 384, «استانا وپەرا» مەملەكەتتىك وپەرا جانە بالەت تەاترىندا 2 314 بالاعا تەگىن قويىلىم ۇيىمداستىرىلعان. استانا قالاسىنىڭ اكىمدىگىنە قاراستى تەاترلاردا دا مۇمكىندىگى شەكتەۋلى جاندار مەن كوپبالالى وتباسىلارعا ارنالعان قايىرىمدىلىق اكتسيالارى مەن مەملەكەتتىك مەرەكەلەردى قوسا العاندا 11 081 بالاعا تەگىن سپەكتاكل كورسەتىلگەن.
اتالعان باعىتتاعى جۇمىس بيىل دا جالعاسىپ, ەلوردالىق ءۇش رەسپۋبليكالىق تەاتردا 1 205 بالاعا تەگىن قويىلىم جاسالىپ, قالا اكىمدىگىنە قاراستى تەاترلاردا 5 651 بالا ءۇشىن تەگىن قويىلىم كورسەتىلگەن.
مينيسترلىك جۇرگىزەتىن ستاتيستيكالىق دەرەكتەر بويىنشا قر-نىڭ ۇلتتىق مۋزەيى مەن «بوزوق» مەملەكەتتىك تاريحي-مادەني مۋزەي-قورىعىنا 2017 جىلدان بەرى توقسان ارالىق جانە جازعى دەمالىستا 700 مىڭعا جۋىق وقۋشىلار تەگىن كىرگەن.
«بوزوق» مەملەكەتتىك تاريحي-مادەني مۋزەي-قورىعى جىل سايىن جازعى دەمالىس كەزەڭىندە «جاس ارحەولوگ» اتتى جازعى مەكتەبى, «شولپى تاعۋ», «اتقا مىنگىزۋ», «قىمىزمۇرىندىق» ت.ب. سەكىلدى ەتنوگرافيالىق مەيرامدار مەن فەستيۆالدەردى وتكىزىپ كەلەدى. قر-نىڭ ۇلتتىق مۋزەيىندە «سۋرەت جانە كەسكىندەمە» اتتى مۋزەيلىك دارىستەر سەرياسى, قولونەر شەبەرلەرىنىڭ شەبەرلىك سىنىپتارى بالالار اراسىندا سۇرانىسقا يە دەپ ايتۋعا بولادى.
ۇلتتىق مۋزەيدەگى «كەسكىندەمە جانە گرافيكا» ۇيىرمەسى
قر ۇلتتىق مۋزەيىنىڭ 7-16 جاس ارالىعىنداعى مەكتەپ وقۋشىلارىنا ارنالعان «كەسكىندەمە جانە گرافيكا» ۇيىرمەسى بەينەلەۋ ونەر, گرافيكا, ءمۇسىن ونەرىنە باۋلۋدى كوزدەيدى. 2015 جىلى جۇمىسىن باستاعان ۇيىرمەگە قر ديزاينەرلەر وداعىنىڭ مۇشەسى, قازاق ۇلتتىق ونەر ۋنيۆەرسيتەتىنىڭ ءمۇسىن جانە كەسكىندەمە كافەدراسىنىڭ وقىتۋشىسى بايبوسىنوۆ مۇحتار قايرات ۇلى جەتەكشىلىك ەتەدى.
جىل سايىن 1 ماۋسىم – بالالاردى قورعاۋ كۇنى مەرەكەسىنە وراي اتالعان ۇيىرمە جىلدىق جۇمىس قورىتىندىسى مەن مۋزەيدەگى شەبەرلىك ساعاتتارىندا جاسالعان ۇزدىك جۇمىستاردىڭ ناتيجەسى رەتىندە «Balavision» اتتى سۋرەت كورمەسىن ۇيىمداستىرادى. وسى ۋاقىتقا دەيىن 15-كە جۋىق كورمە وتكىزىلىپ, ۇيىرمەگە قاتىسۋشى وقۋشىلار جىل بويى ەرەكشە قىزىعۋشىلىق تانىتىپ, ءوز بويلارىنداعى شىعارماشىلىق قابىلەتتەرىن ارتتىرا تۇسكەن. بيىل 1 ماۋسىمدا وسكەلەڭ ۇرپاق اراسىندا ەكوساۋاتتىلىقتى دامىتۋ ماقساتىندا ۇيىمداستىرىلعان «Balavision-2025: ادام جانە تابيعات» كورمەسىندە 20 جاس سۋرەتشىنىڭ ءارتۇرلى تەحنيكادا ورىندالعان 40-تان استام تۋىندىلارى كوپشىلىك نازارىنا ۇسىنىلعان.
اتالعان ۇيىرمە جۇمىسىنان كۇتىلەتىن ناتيجە – وقۋشىلار كوركەمسۋرەت تۋىندىلارى مەن نەگىزگى ستيلدىك باعىتتاردى اجىراتىپ, بەينەلەۋ قۇرالدارىن ەركىن پايدالانىپ, سۇلبا مەن كومپوزيتسيالىق ەسكيزدەر جاساۋدى مەڭگەرەدى. جالپى بۇگىنگە دەيىن ۇيىرمەگە 400-گە جۋىق بالا قاتىسقان.
ءار ايدىڭ ءۇشىنشى جەكسەنبىسىندە مۋزەيگە كىرۋ تەگىن
قر ۇلتتىق مۋزەيىنىڭ ەكسكۋرسيالىق جۇمىستار, مۋزەي پەداگوگيكاسى جانە ەكسپوزيتسيالىق زالداردى ساقتاۋ قىزمەتىنىڭ ەكسكۋرسيالىق قىزمەت كورسەتۋ ءبولىمىنىڭ مالىمەتىنشە, ءار ايدىڭ ءۇشىنشى جەكسەنبىسى – مۋزەيگە تەگىن كىرۋ تاجىريبەسى 2017 جىلدان باستاپ تۇراقتى تۇردە ىسكە اسىرىلىپ, كەلۋشىلەر سانى ايتارلىقتاي ارتقان. 2017 جىلدان 2024 جىلعا دەيىنگى ارالىقتا شامامەن 120 مىڭ 560 ادام ۇلتتىق مۋزەيگە تەگىن كىرگەن, ال 2025 جىل باستالعالى بۇل كورسەتكىش 6 106 ادامدى قۇراپ وتىر. بۇل مالىمەتتەر مۋزەيدىڭ كەڭ اۋديتوريانى قامتيتىن مادەني پلاتفورما رەتىندە قىزمەت اتقاراتىنىن كورسەتەدى.
ايتا كەتكەن ءجون, اتالعان باستاما – مۋزەيلەردىڭ كوپشىلىك ءۇشىن قولجەتىمدى بولۋىنا وڭ ىقپال ەتىپ, قوعامدا تاريحي-مادەني مۇراعا دەگەن قىزىعۋشىلىقتى ارتتىرۋعا زور ۇلەس قوستى.
تۇيىندەي ايتقاندا, اتالعان كۇن ازاماتتارعا ءوز مادەني مۇراسىمەن ەركىن تانىسۋعا مۇمكىندىك بەرەدى جانە ازاماتتاردىڭ تاريحي-مادەني ساناسىن قالىپتاستىرۋ تۇرعىسىندا ماڭىزدى ءرول اتقارادى.
ايتا كەتەلىك, مينيسترلىككە قاراستى رەسپۋبليكالىق تەاترلاردا بارلىق ساناتتاعى ازاماتتار ءۇشىن دۇنيەجۇزىلىك تەاتر كۇنى, رەسپۋبليكا كۇنى, ءبىلىم كۇنى, تاۋەلسىزدىك كۇنى, بالالاردى قورعاۋ كۇنى كىرۋ تەگىن.