كولەڭكەلى ەكونوميكاعا قارسى كۇرەس جىل وتكەن سايىن قارقىن العانىنا قاراماستان, ەبىن تاپقاندار زاڭسىز تاۋار اينالىمىن جالعاستىرۋىن تىيار ەمەس. اكتسيزدەلەتىن تاۋار ءونىمىنىڭ زاڭسىز اينالىمى ءالى دە بولسا ءجيى كەزدەسەدى. قۇزىرلى ورگان قىزمەتكەرلەرى كولەڭكەلى كاسىپپەن اينالىسقانداردى قولدان كەلگەنشە جازاعا تارتىپ جاتىر.
ەكونوميكالىق تەرگەپ-تەكسەرۋ دەپارتەمەنتىنىڭ جامبىل وبلىسى بويىنشا دەپارتامەنتى باسشىسىنىڭ ورىنباسارى نۇربول راحمەتوۆتىڭ ايتۋىنشا, كولەڭكەلى ەكونوميكاعا قارسى كۇرەس ۇكىمەتتىڭ قاۋلىسىنا سايكەس 2023–2025 جىلدارعا ارنالعان كەشەندى جوسپار نەگىزىندە ىسكە اسىرىلادى. جالپى العاندا زاڭسىز تاۋار اينالىمىن توقتاتۋ ماقساتىندا ءوڭىر بويىنشا بىرقاتار جۇمىس اتقارىلعان. قولعا الىنعان جۇيەلى جۇمىستىڭ ناتيجەسىندە كورسەتكىشتەر وزگەرگەنىمەن, وڭاي ولجاعا قۇنىققانداردىڭ ءالى دە بولسا سيرەيتىنگە ۇقسامايدى.
«اكتسيزدەلەتىن ونىمدەردىڭ زاڭسىز اينالىمى – ءوڭىردىڭ وزەكتى ماسەلەسى. وبلىستا جانار-جاعارماي ماتەريالدارىن كورشىلەس قىرعىز رەسپۋبليكاسىنا زاڭسىز شىعارۋمەن كۇرەس ىلكى ساتكە دە توقتاعان ەمەس. بۇل ماسەلەنى شەشۋ ءۇشىن «پەرەتوك» جەدەل-پروفيلاكتيكالىق ءىس-شاراسىن وتكىزۋ الگوريتمى ازىرلەنگەن. قولعا العان جۇمىستىڭ ناتيجەسىندە جانار-جاعارماي ماتەريالدارىنىڭ كورشى ەلگە شىعارىلۋى 65 پايىزعا ازايدى. وسى باعىتتاعى جۇمىس الداعى ۋاقىتتا دا جالعاسادى», دەيدى دەپارتامەنت باسشىسىنىڭ ورىنباسارى.
ن.راحمەتوۆتىڭ ايتۋىنشا, وتكەن جىلى ءوڭىر بويىنشا 5 ملرد تەڭگەدەن اساتىن اكتسيزدىك ونىمدەردىڭ زاڭسىز اينالىمى بويىنشا 22 قىلمىستىق ءىس تىركەلگەن. ال اكتسيز سوماسى 2 ملرد تەڭگەنى قۇراعان. 7 ملن قوراپ تەمەكى زاڭسىز اينالىمنان تاركىلەنگەن. وسىلايشا, كولەڭكەلى كاسىپپەن اينالىسقاندارعا توسقاۋىل قويىلعان.
«وسى جىلدىڭ العاشقى توقسانىندا دا بىرنەشە زاڭسىزدىق انىقتالدى. ناقتىراق ايتساق, 6 قىلمىستىق ءىس تىركەلدى. ناتيجەسىندە, جالپى قۇنى 540 ملن تەڭگەدەن اساتىن 626 مىڭ قوراپ تەمەكى مەن 40 مىڭ ليتر سپيرت تاركىلەندى», دەيدى ن.راحمەتوۆ.
قالاي دەسەك تە, زاڭسىز تاۋار اينالىمىنا قارسى كۇرەس كۇشەيىپ تۇرعانى داۋسىز. ايتسە دە, قۇنىققان ازاماتتار وڭاي تابىس تابۋ ءۇشىن ءالى دە بولسا زاڭدى بەلدەن باسۋعا بەكىنىپ وتىرعانى قايران قالدىرادى. بىرنەشە جىل بۇرىن كورشى ەلدىڭ تۇرعىندارى قازاق جانارمايىنا قاتتى قىزىعاتىنىن, قورداي ارقىلى ءوز ەلىنە تاسىمالداپ, ۇستەمە باعامەن ساتاتىنىن جازعان ەدىك. بىرەر جىل بۇرىن مۇناي ونىمدەرىن تاسىمالداۋدا ەلىمىز بويىنشا 300-گە جۋىق زاڭ بۇزۋشىلىق انىقتالىپ, 90 مىڭ توننا جانارماي تاركىلەنگەن ەدى. قازىر جانارمايدىڭ زاڭسىز شىعارىلىمى 65 پايىزعا ازايعان. دەسە دە, زاڭسىزدىق ءالى دە ورىن الىپ وتىرعانى قىنجىلتادى.
جامبىل وبلىسى