مۇگەدەكتىگى بار ادامداردىڭ زاڭدى قۇقىقتارىن قامتاماسىز ەتۋ جانە ولار ءۇشىن قولجەتىمدى ورتانى قالىپتاستىرۋ ماقساتىندا اقمولا وبلىسىندا 1037 الەۋمەتتىك ينفراقۇرىلىم نىسانى تولىق بەيىمدەلدى, دەپ جازادى Egemen.kz اقپارات اگەنتتىگى.
قازىرگى ۋاقىتتا قازاقستان رەسپۋبليكاسىندا 2025-2030 جىلدارعا ارنالعان ينكليۋزيۆتى ساياسات تۇجىرىمداماسى, «امانات» پارتياسىنىڭ 2023-2027 جىلدارعا ارنالعان جول كارتاسى جانە مەملەكەت باسشىسىنىڭ تاپسىرماسى بويىنشا ازىرلەنگەن «حالىقپەن بىرگە» جوباسى ىسكە اسىرىلۋدا.
«Amanat» پارتياسىنىڭ جول كارتاسىندا 2023-2027 جىلدار ارالىعىندا ينتەراكتيۆتى قولجەتىمدىلىك كارتاسىنا (بۇدان ءارى – كارتا) ەنگىزىلگەن 42 مىڭنان استام نىساندى بەيىمدەۋ بويىنشا جۇمىس كوزدەلگەن. جىل سايىن وسىنداي وبەكتىلەردىڭ 20%-ى بەيىمدەلۋى ءتيىس. وسىلايشا, 2023 جىلى – كارتاداعى وبەكتىلەردىڭ 20%, 2024 جىلى – 40%, 2025 جىلى – 60%, 2026 جىلى – 80%, 2027 جىلى – 100%-ى بەيىمدەلەدى. قازىرگى ۋاقىتتا ەل بويىنشا 23206 نىسان تولىقتاي بەيىمدەلگەن.
بۇگىنگى تاڭدا اقمولا وبلىسىندا 1037 نىسان بەيىمدەلدى. 2025 جىلدىڭ سوڭىنا دەيىن تاعى 176 نىساندى بەيىمدەۋ جوسپارلانۋدا.
بەيىمدەلگەن نىسانداردىڭ جالپى سانىنان مۇگەدەكتىگى بار ادامداردىڭ بارلىق ساناتتارى ءۇشىن قولجەتىمدىلەرى:
- دەنساۋلىق ساقتاۋ وبەكتىلەرى– 152;
- ءبىلىم بەرۋ نىساندارى – 520;
- مادەنيەت نىساندارى– 48;
- مەملەكەتتىك جانە كۆازيمەملەكەتتىك ۇيىمدار – 266;
- سپورت نىساندارى – 41;
- الەۋمەتتىك قورعاۋ وبەكتىلەرى – 10.
ءبىرىنشى توپتاعى مۇگەدەكتىگى بار كوكشەتاۋ قالاسىنىڭ تۇرعىنى رامازان مۇقاتاەۆ: «جالپى قالا بويىنشا مۇگەدەكتىگى بار ادامدار ءۇشىن جاعداي جاقسارىپ, بارلىق مۇمكىندىكتەر قاراستىرىلۋدا. نىسان يەلەرى ولاردى قۇرىلىس نورمالارىنا سايكەستەندىرۋگە تىرىسادى. كوپتەگەن كاسىپكەرلەر مەن مەملەكەتتىك ورگاندار شاعىمدار مەن ۇسىنىستاردى ەسكەرە وتىرىپ, كىرۋ توپتارىن اياقتايدى. ساۋدا ورتالىقتارىنىڭ قولجەتىمدىلىگىن قامتاماسىز ەتۋ ماڭىزدى, ەندى ولارعا مۇگەدەكتىگى بار ادامدار, اسىرەسە كرەسلو-اربالارمەن قوزعالاتىندار كەدەرگىسىز بارا الادى. مىسالى, ءبىزدىڭ قالاداعى "ريو" ساۋدا ورتالىعى. م. عابدۋللين اتىنداعى مۇراجايدىڭ قولجەتىمدىلىك دەڭگەيىنە جانە كوشپەلى كورمەلەردى ۇيىمداستىرۋ مۇمكىندىكتەرىنە تاڭ قالدىم», – دەپ ويىمەن ءبولىستى.
بۇدان باسقا, اقمولا وبلىسى بويىنشا حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ دەپارتامەنتى 2025 جىلدىڭ باسىنان باستاپ پروفيلاكتيكالىق باقىلاۋ شەڭبەرىندە 10 جانە جوسپاردان تىس باقىلاۋ شەڭبەرىندە 2 تەكسەرۋ جۇرگىزدى. تەكسەرۋ قورىتىندىسى بويىنشا انىقتالعان بۇزۋشىلىقتاردى جويۋ تۋرالى 9 نۇسقاما ەنگىزىلدى.
وبەكتىلەردىڭ مەنشىك يەلەرىنە پروفيلاكتيكالىق باقىلاۋ جۇرگىزۋ كەزىندە بۇزۋشىلىقتار العاش رەت انىقتالعان كەزدە ولاردى اكىمشىلىك جاۋاپكەرشىلىككە تارتپاي, ولاردى جويۋ تۋرالى نۇسقامالار عانا ەنگىزىلەتىنىن اتاپ ءوتۋ قاجەت.نۇسقاما بەلگىلەنگەن مەرزىمدە ورىندالماعان جاعدايدا ايىپپۇل سالىناتىن بولادى.