پارلامەنت سەناتىنىڭ توراعاسى ماۋلەن اشىمباەۆ استانا حالىقارالىق فورۋمىنا كەلگەن ەۋروپا كەڭەسىنىڭ باس حاتشىسى الەن بەرسەمەن كەزدەستى.
كەزدەسۋدە ماۋلەن اشىمباەۆ ەۋروپا كەڭەسى بۇكىل الەمدە ادام قۇقىقتارىن, دەموكراتيا جانە زاڭ ۇستەمدىگىن قامتاماسىز ەتۋ جولىندا ماڭىزدى ءرول اتقارىپ وتىرعانىن اتاپ ءوتتى. سونداي-اق پالاتا سپيكەرى قازاقستان پارلامەنتى مەن ەكپا اراسىندا ىنتىماقتاستىق ورناعالى بەرى وتكەن 20 جىلدا كوپتەگەن باعىت بويىنشا تىعىز جانە ءتيىمدى ءوزارا ءىس-قيمىل جولعا قويىلعانىن تىلگە تيەك ەتتى.
سۇحبات كەزىندە تاراپتار دەموكراتيالىق جاڭعىرۋ جانە ادىلەتتى قازاقستان قالىپتاستىرۋ بارىسىندا قازاقستان مەن ەۋروپا كەڭەسىنىڭ بىرلەسكەن جۇمىسىنداعى وزەكتى ماسەلەلەردى دە تالقىلادى. ماۋلەن اشىمباەۆ مەملەكەت باسشىسىنىڭ باستاماسىمەن ىسكە اسىرىلىپ جاتقان رەفورمالاردىڭ ماڭىزىنا جانە پالاتانىڭ ولاردى زاڭنامالىق تۇرعىدان قامتاماسىز ەتۋ جولىنداعى قىزمەتىنە توقتالدى. بۇل رەتتە ەلدىڭ ساياسي جۇيەسىن دەموكراتيالاندىرۋ جانە ادام قۇقىقتارىن قورعاۋ, گەندەرلىك تەڭدىك جۇيەسىن نىعايتۋ, وتباسىنداعى زورلىق-زومبىلىققا قارسى كۇرەس, بيلىك تارماقتارى اراسىنداعى, سونداي-اق ورتالىق پەن وڭىرلەر اراسىنداعى وكىلەتتىكتەر مەن جاۋاپكەرشىلىكتىڭ تەپە-تەڭدىگىن قامتاماسىز ەتۋ باعىتتارىندا جۇرگىزىلىپ جاتقان جۇمىستار كەڭىنەن ءسوز بولدى.
«قازاقستان پرەزيدەنتى قاسىم-جومارت توقاەۆتىڭ باستاماسىمەن ادىلەتتى قازاقستان قۇرۋ تۇجىرىمداماسىن ىسكە اسىرۋ اياسىندا اۋقىمدى جانە جان-جاقتى رەفورمالار جۇرگىزىلىپ جاتىر. ولاردىڭ ماقساتى – زاڭ ۇستەمدىگىن نىعايتۋ, ادام قۇقىقتارىن قورعاۋ, بيلىك تارماقتارى اراسىندا وكىلەتتىكتەردىڭ تەڭگەرىمدى ءبولىنۋىن قامتاماسىز ەتۋ جانە ورتالىق پەن ايماقتىق بيلىك ورگاندارى اراسىنداعى ۇيلەستىرۋدى كۇشەيتۋ. 2022 جىلى سۋپەرپرەزيدەنتتىك جۇيەدەن كۇشتى پارلامەنتى مەن ەسەپ بەرەتىن ۇكىمەتى بار پرەزيدەنتتىك رەسپۋبليكاعا كوشۋگە ارنالعان كونستيتۋتسيالىق تۇزەتۋلەر قابىلداندى. ونى قازاقستاندىقتار جالپىۇلتتىق رەفەرەندۋمدا قولدادى. وسى ساياسي جانە ەكونوميكالىق رەفورمالاردىڭ ىسكە اسىرىلۋىن زاڭنامالىق تۇرعىدان قامتاماسىز ەتۋ پارلامەنت قىزمەتىنىڭ نەگىزگى باسىمدىعى ەكەنىن اتاپ وتكەن ءجون», دەدى سەنات توراعاسى.
سونىمەن قاتار كەزدەسۋدە قازىرگى سىن-قاتەرلەر جاعدايىندا رۋحاني ديپلوماتيانى ىلگەرىلەتۋدىڭ ماڭىزىنا باسا ءمان بەرىلدى. وسىعان بايلانىستى ەۋروپا كەڭەسىنىڭ باس حاتشىسىنا بيىل قىركۇيەكتە وتەتىن الەمدىك جانە ءداستۇرلى دىندەر كوشباسشىلارىنىڭ
VIII سەزىنە دايىندىق بارىسى جانە بۇل باعىتتاعى باسقا دا جوبالار تۋرالى مالىمەتتەر بەرىلدى.
ءوز كەزەگىندە الەن بەرسە قازاقستاننىڭ ەۋروپا كەڭەسىمەن ىنتىماقتاستىعىن ودان ءارى نىعايتۋعا جانە ماڭىزدى باستامالاردى بىرلەسىپ ىسكە اسىرۋعا مۇددەلى ەكەنىن جەتكىزدى.