اۋعانستانداعى جاعداي – ورتالىق ازياداعى ەلەۋلى ماسەلە. شەكارالىق ماسەلەلەر ءار كەز قيىندىق تۋدىرادى. مەن – وسى ايماقتىڭ تۋماسى بولعاندىقتان وڭىردەگى جاعدايدى جاقسى بىلەمىن. قازىرگى قىزمەتىم – اۋعانستانعا قاتىستى.
بۇگىن دجوردجا مەلوني حانىم ايماقتاعى 5 ەلدىڭ مەملەكەت باسشىلارىمەن كەزدەستى. سونداي-اق ەۋروپا ەلدەرىنىڭ جەتەكشىلەرىمەن دە جۇزدەسۋلەر بولدى. وسى كەزدەسۋلەر ورتالىق ازياداعى بىرقاتار ماسەلەنى دۇرىس شەشۋگە كومەكتەسىپ, وڭتايلى شەشىمدەرگە باستايدى دەپ سەنەمىن. قارىم-قاتىناس جيىلەگەن سايىن جاعداي دا دۇرىستالا بەرەدى.
قازىر اۋعان حالقىنىڭ سانى 40 ميلليونعا جەتتى. جۇمىسسىزدىق ماسەلەسى ۋشىعىپ تۇر. بۇل پروبلەما تەزىرەك شەشىمىن تاپپاسا ايماق قيىن جاعدايدا قالادى. ايتكەنمەن, قازىر اۋعانستاندا قولعا الىنعان باعدارلامالار بار. سونىڭ ءبىرى – ترانساۋعاندىق جول. ول قىرعىزستان مەن وزبەكستاندى توتە بايلانىستىرىپ, اۋعانستان ارقىلى پاكىستانعا الىپ شىعادى. بۇل باعىتپەن قازاقستان دا پاكىستاننىڭ تەڭىز پورتتارىنا شىعا الار ەدى. ۇزاقمەرزىمدى ينۆەستيتسيا سانالاتىن وسى جوبا اۋعان جاستارىنىڭ اراسىنداعى جۇمىسسىزدىق ماسەلەسىن ءبىرشاما جەڭىلدەتتى.
وسىنداي كۇردەلى ماسەلەلەردى تالقىلاۋعا مۇمكىندىك تۋدىرعان فورۋم ايماقتىڭ بەيبىت دامۋىنا كوپ سەپتىگىن تيگىزەدى دەپ سانايمىن.
روزا وتۋنباەۆا,
بۇۇ باس حاتشىسىنىڭ اۋعانستان بويىنشا ارنايى وكىلى جانە بۇۇ-نىڭ اۋعانستانعا كومەك كورسەتۋ ميسسياسىنىڭ باسشىسى