جارىققا ۇمتىلعان جانارلار

جۋردا وسىنداي قاتەردىڭ الدىن الۋ ماقساتىندا اتالمىش مەديتسينالىق مەكەمە AYALA قايىرىمدىلىق قورى مەن شىعىستۇستىمەت كومپانياسىنىڭ قولداۋىمەن زاماناۋي وفتالموسكوپ قۇرىلعىسىمەن جابدىقتالدى. بۇل ەندى قالادا جاڭا تۋعان سابيلەردىڭ كورۋ قابىلەتىن تەسەرۋگە مۇمكىندىك بەردى. قازىردىڭ وزىندە 500-دەن استام نارەستەنىڭ كوزدەرى تەكسەرىلگەن.

جاڭا تۋعان سابيلەردىڭ كوزىن تەكسەرۋ – كوپ جەردە كۇن تارتىبىنەن تىس قالىپ جاتاتىن ماسەلە. ال سەمەيدەگى پەريناتالدىق ورتالىق بۇل باعىتتى جولعا قويۋعا تىرىسىپ كەلەدى. قازىر مۇندا كوزدىڭ ىشكى تور قابىعىن تولىق زەرتتەۋگە مۇمكىندىك بەرەتىن وفتالموسكوپ قۇرىلعىسى جۇمىس ىستەپ تۇر. ول پەريناتالدىق ورتالىق جانىنداعى كاتامنەز كابينەتىنە قويىلعان. ياعني بالا ۇيىنە شىققاننان كەيىن دە باقىلاۋ جالعاسادى.

– بۇرىن بۇل قۇرىلعى بولماعان كەزدە اتا-انالار سابيلەرىن وبلىس ورتالىعىنان سىرتقا اپارۋعا ءماجبۇر بولاتىن. ەندى تەكسەرۋ دە, ەم دە وسىندا جاسالادى. قازىردىڭ وزىندە 500-دەن استام بالا تەكسەرۋدەن ءوتتى, – دەيدى كاتامنەز كابينەتىندەگى دارىگەرلەر.

دەمەۋشىلەر شالا تۋعان بالالاردا ءجيى كەزدەسەتىن رەتينوپاتيانىڭ اگرەسسيۆتى ءتۇرىن ەمدەۋگە قاجەتتى «لۋتسەنتيس» پرەپاراتىنىڭ 15 امپۋلاسىن ساتىپ الۋعا دا قارجى ءبولىپ وتىر.

– اباي وبلىسىندا دۇنيەگە كەلگەن نارەستەلەردىڭ دەنساۋلىعىن ساقتاۋعا جانە ولاردى كورۋ مۇمكىندىگىن جاقسارتۋعا ۇلەس قوسقانىمىزعا قۋانىشتىمىز. بالالار دەنساۋلىعىن قورعاۋعا باعىتتالعان جوبالار – ەلىمىزدىڭ تۇراقتى دامۋىنا قولداۋ كورسەتەتىن الەۋمەتتىك باستامالارىمىزدىڭ ماڭىزدى ءبىر بولىگى, – دەيدى كومپانيا وكىلى ۆياچەسلاۆ ياكۋپوۆ.

2022 جىلدان بەرى جۇزەگە اسىپ كەلە جاتقان «الەمدى كورەمىن» جوباسى اياسىندا AYALA قورى ەلىمىزدەگى 23 مەديتسينالىق مەكەمەگە 12 رەتينالدى كامەرا, 6 لازەرلىك قۇرىلعى, 17 وفتالموسكوپ جانە 163 امپۋلا «لۋتسەنتيس» پرەپاراتىن تابىستادى. ناتيجەسىندە قازاقستاندا شالا تۋعان نارەستەلەر اراسىنداعى كورۋ قابىلەتىنىڭ جوعالۋ كورسەتكىشى ايتارلىقتاي تومەندەدى.

اباي وبلىسى