قازاقستاندىق ونەر يەسى دينارا بيسەنوۆا شىعارماشىلىق ورتادا دينارا كايرگوجا ەسىمىمەن كەڭىنەن تانىمال. ونى قازاقستاندىقتار, اسىرەسە مۋزىكاسۇيەر قاۋىم ءانشى, كومپوزيتور, پروديۋسەر, ۆوكال پەداگوگى رەتىندە تانيدى.
بۇگىندە دينارا كايرگوجا زاماناۋي ەسترادالىق باعىتتا تىڭ جوبالارىمەن كوزگە ءتۇسىپ ءجۇر. ونىڭ كوپقىرلى شىعارماشىلىق جولى ەلىمىزدىڭ مۋزىكا يندۋسترياسىنىڭ دامۋىنا ەلەۋلى ۇلەس قوسۋدا.
قازاقستان كومپوزيتورلار وداعىنىڭ مۇشەسى دينارانىڭ جاس ۇرپاقتى شىعارماشىلىققا باۋلۋدا ەڭبەگى وراسان. 2003-2008 جىلدارى دينارا كايرگوجا الماتى قالاسىنداعى №5 وقۋشىلار ۇيىندە بالالاردىڭ ەسترادالىق ستۋدياسىن باسقارىپ, جاس تالانتتاردىڭ ساحناعا شىعۋىنا جول اشىپ بەردى. وسى كەزەڭدە ول بالالاردى تەك ۆوكالعا عانا ەمەس, ساحنالىق مادەنيەت پەن اكتەرلىك شەبەرلىككە دە باۋلي وتىرىپ, بولاشاق ارتىستەردىڭ كاسىبي وسۋىنە نەگىز قالادى.
«دينارانىڭ مەكتەبىنەن وتكەنىمىزدى اركەز ماقتان تۇتامىز ءارى مۋزىكا الەمىندەگى وسىنداي ءىرى تۇلعادان ءدارىس العانىمىزعا قۋانىشتىمىز. بۇل - كەز كەلگەن جانعا بەرىلمەيتىن مۇمكىندىك. ۇستازىمىزدىڭ تاعىلىمى, تاربيەسى ءبىزدى كيەلى ساحنامەن تابىستىردى», - دەيدى ونەر يەسىنىڭ شاكىرتەرىنىڭ ءبىرى روزا جومارتقىزى.
ونەر زەرتتەۋشىلەرى دينارانىڭ كومپوزيتورلىق قىرىن دا جوعارى باعالاپ ءجۇر. ول 2009-2013 جىلدارى بىرقاتار اۆتورلىق اندەرىن جارىققا شىعاردى. «ەلىم مەنىڭ», ء«ان جۇمباق», «قىز قىلىعى» اتتى تەلەۆيزيالىق جوبالارعا ارنايى شاقىرىلىپ, تىڭدارماندارىنا وزگەشە قىرىنان كورىندى. ءارى رەپەرتۋارىنداعى جاڭا اندەرىن كوپشىلىك نازارىنا ۇسىنىپ, ۇلتتىق مۋزىكالىق مۇراعا وزىندىك ۇلەسىن قوسىپ كەلەدى. سونىمەن قاتار رەسپۋبليكالىق دەڭگەيدەگى بايقاۋلاردىڭ قازىلار القاسىنىڭ قۇرامىندا بولىپ, جاس ورىنداۋشىلارعا كاسىبي باعىت-باعدار بەرۋدەن شارشاعان ەمەس.
دينارا كايرگوجا جەرلەستەرىنىڭ ارنايى شاقىرتۋىمەن كوكشەتاۋ قالاسىندا ءوزىنىڭ اۆتورلىق ۆوكال ستۋدياسىن دا اشتى. بۇل باستاما ءبىر جاعىنان جەكە كاسىپكەرلىك جوبا بولسا, ەكىنشى جاعىنان وڭىردەگى شىعارماشىلىق دامۋعا سەرپىن بەرگەن ماڭىزدى مادەني ورتالىققا اينالدى.
ءبىز ديناراعا حابارلاسىپ, وسى ورتالىق تۋرالى سۇراعانىمىزدا مۇندا ءارتۇرلى جاس شاماسىنداعى شاكىرتتەر ۆوكالدان عانا ەمەس, ساحنا مادەنيەتى, مۋزىكالىق ينتەرپرەتاتسيا, شىعارماشىلىق ەركىندىك تۇرعىسىنان كەشەندى ءبىلىم الاتىنىن ايتتى.
«بۇل ونەر ورتالىعىن اشۋداعى ءبىر ماقساتىم, اقان سەرى, ءبىرجان سالداردى قازاققا بەرگەن تۋعان جەرىمدە ونەر دۇلدۇلدەرىنىڭ ساباقتاستىعىن ۇزىلمەگەندىگىن كورسەتۋ ەدى. سول ماقساتقا جەتتىم دەگەن دە ويدامىن. مۇنىڭ باعاسىن حالىق بەرەدى, ال حالىقتىڭ باعاسى جوعارى», - دەيدى د.كايرگوجا.ونىڭ بۇل باعىتتاعى جوبالارىنىڭ قاتارىنا ۋكراينالىق فۋد-ماستەر جەلىسىنىڭ جارنامالىق بەينەجازباسىنا تۇسكەن ءرولىن دە قوسۋىمىز كەرەك. «بۇل جوبانىڭ ىرىكتەۋىندە ۋكراين قىزى مەن مەنىڭ ونەرىم قازىلار القاسىنىڭ نازارىن اۋداردى. ناتيجەسىندە ۋكراينالىق كومپانيانىڭ جارناماسىن ۋكراين قىزى رەسەي ايماعىنا جاساسا, مەنىڭ بەينەجازبام قازاقستان, وزبەكستان, قىرعىزستان ەلدەرىندەگى تۇتىنۋشىلارعا باعىتتالدى», - دەيدى دينارا كايرگوجا.
مۋزىكالىق ورتادا دينارا كايرگوجا – تەك ءانشى ەمەس, وتاندىق ەستراداداعى ىقپالدى تۇلعا, جاڭا بۋىندى قالىپتاستىرۋشى پەداگوگ, ونەر ارقىلى تاربيەلەۋدىڭ زاماناۋي مودەلىن ۇسىنعان كاسىبي مامان.