اتىراۋدا جازۋشىلار وداعىنىڭ «جۇمىسشى ماماندىعى جانە قازاقستان جازۋشىلارىنىڭ شىعارمالارى» اتتى كوشپەلى پلەنۋمى ءوتتى. وعان شىعارماشىلىق وداق پەن وبلىس باسشىلارى, استانا, الماتى قالالارىنان, قىزىلوردا, اقتوبە, ماڭعىستاۋ جانە باتىس قازاقستان وبلىسىنان قالامگەرلەر قاتىستى.
مەملەكەتتىك كەڭەسشى ەرلان قارين «كوشپەلى پلەنۋمنىڭ كوتەرىپ وتىرعان ماسەلەسى – ەڭبەك ادامىنىڭ مارتەبەسىن بيىكتەتۋ. قالام يەلەرى ماڭداي تەرىن توگىپ, ادال ەڭبەك ەتىپ جۇرگەن جۇمىسشىلاردىڭ بەينەسىن كوركەم شىعارمالار ارقىلى جاڭعىرتۋى قاجەت. قالام مەن ەڭبەكتىڭ تاندەمى ارقىلى ءبىز ءوز ءداۋىرىمىزدىڭ شىنايى كەلبەتىن جاساپ, بولاشاق ۇرپاققا ونەگە بولار اسىل قازىنا قالدىرامىز», دەپ ارنايى حات جولدادى.
مۇنايلى وڭىردە العاش رەت وتكەن پلەنۋمدا ەل رۋحانياتىنا ۇلەس قوسقان جەرگىلىكتى قالامگەرلەرگە «قازاقستاننىڭ قۇرمەتتى جازۋشىسى» اتاعى بەرىلدى. بۇل اتاققا يە بولعانداردىڭ ءبىرى – قازاقستاننىڭ ەڭبەك ەرى ءىليا جاقانوۆ. تانىمال ونەر قايراتكەرى قازاقتىڭ حالىق اندەرى مەن كومپوزيتورلارىنىڭ شىعارماشىلىعىن زەرتتەپ كەلەدى. حالىق اندەرىنىڭ شىعۋ تاريحىنان بىرنەشە كىتاپ جازدى.
سونداي-اق «ادەبيەت – اردىڭ ءىسى» قاعيداتىن باعدار تۇتقان اتىراۋلىق قالامگەرلەر, اقىن جۇمەكەن ناجىمەدەنوۆتىڭ شىعارماشىلىعىن زەرتتەۋشى, فيلولوگيا عىلىمدارىنىڭ دوكتورى قادىر ءجۇسىپ, جەرگىلىكتى ولكەتانۋشى تولەگەن جاڭاباەۆ, ايتىسكەر ءجانيبا قاراساەۆا اتالعان اتاققا يە بولدى. قۇرمەتتى اتاقتى قازاقستان جازۋشىلار وداعىنىڭ باسقارما توراعاسى مەرەكە قۇلكەنوۆ تاپسىردى.
بۇل پلەنۋمدا ء«سوز – سىباعا» ادەبي اۋكتسيونى ءوتتى. اۋكتسيوندا الدىمەن قالامگەرلەر مەن مەتسەناتتار تانىستىرىلدى. مەتسەناتتار وزدەرى تاڭداعان اۆتورلاردىڭ كىتابىن شىعارىپ بەرۋگە دەمەۋشىلىك جاساعالى وتىر. ولاردىڭ اراسىندا «قۇرمەت», «پاراسات», «بارىس» وردەندەرىنىڭ يەگەرى توكەن جۇماعۇلوۆ, قازاقستاننىڭ ەڭبەك ەرى ۆلاديمير روزمەتوۆ, «قۇرمەت» وردەنىنىڭ يەگەرى مۇرات سارمانوۆ سەكىلدى كاسىپكەرلەر مەن بالجىگىتوۆتەر, قارشەگەنوۆتەر اۋلەتتەرىنىڭ وكىلدەرى بار.
ماسەلەن, مۇرات سارمانوۆ جەرگىلىكتى قالامگەرلەر تولەگەن جاڭاباەۆ, قاليوللا ىزەكەنوۆ, جاڭاي امانتۋرلين, نازاربەك قوسشيەۆ پەن اسانتەمىر قارشىعا ۇلىنىڭ كىتاپتارىن شىعارۋعا دەمەۋشىلىك جاساعان. ول ەندى جەرگىلىكتى اقىن, حالىقارالىق «الاش» ادەبي سىيلىعىنىڭ لاۋرەاتى گۇلزادا نيەتقاليەۆانى اۆتور رەتىندە تاڭدادى.
قالامگەرلەر باسقوسۋىندا رۋحتى جىرىمەن ەل جادىندا قالعان داۋىلپاز اقىن ماحامبەت اتىنداعى حالىقارالىق سىيلىقتىڭ جاڭا يەگەرلەرىنىڭ اتى اتالدى. سىيلىق يەگەرىنىڭ ءبىرى – اقىن, مەملەكەتتىك سىيلىقتىڭ لاۋرەاتى يرانبەك ورازباەۆ, ەكىنشىسى – ادەبيەت سىنشىسى, قازاقستاننىڭ ەڭبەك سىڭىرگەن قايراتكەرى ءاليا بوپەجانوۆا. ولاردىڭ ارقايسىسىنا حالىقارالىق سىيلىقتىڭ كۋالىگى مەن 2 ملن تەڭگەنىڭ سەرتيفيكاتى تابىستالدى.
اتىراۋ وبلىسى