اكە – وتباسىنىڭ اسىراۋشىسى, قامقورشىسى ءارى تىرەگى سانالاتىنى ءمالىم. قازاق حالقى اكەنى اسقار تاۋعا تەڭەيدى. ال قازىرگى ۋاقىتتا «وتباسى قۇندىلىعىندا» اكەنىڭ ءرولى قانداي؟ وسى ورايدا رەسپۋبليكالىق «اكەلەر وداعى» قوعامدىق بىرلەستىگىنىڭ توراعا ورىنباسارى, اتالعان بىرلەستىكتىڭ استانا قالاسى بويىنشا فيليال توراعاسى, قالا اكىمدىگىنىڭ جاسوسپىرىمدەردىڭ قۇقىعىن قورعاۋ كوميسسياسىنىڭ مۇشەسى, «بالا تولاعاي» فەدەراتسياسىنىڭ پرەزيدەنتى بەكدايىر كۇزەمبايمەن اڭگىمەلەسكەن ەدىك.
بەكدايىر نىعمەت ۇلىنىڭ كوزقاراسىنشا, «اكە دەگەن ۇلى ۇعىمعا» داق تۇسىرمەۋ كەز كەلگەن ەر-ازاماتتىڭ مىندەتى بولۋى كەرەك.
ء«بىزدىڭ بالا كۇنىمىزدە قانداي دا ءبىر ماسەلە بولسا, انالارىمىز اكەلەرىڭ بىلەدى, اكەلەرىڭ شەشەدى دەپ وتىراتىن... اكەنىڭ قادىرىن انالارىمىز بىزگە سولاي ءسىڭىردى. «اكەلەرىڭدى سىيلاڭدار, ول سەندەر ءۇشىن كۇندىز-ءتۇنى ەڭبەك ەتىپ ءجۇر» دەيتىن. قازىر وي تارازىسىنا سالا كەلە, بۇل سوزدە قانشاما ءمان-ماعىنا, ءتالىم بار ەكەنىن ۇعىندىق», دەدى بەكدايىر كۇزەمباي.
ونىڭ ايتۋىنشا, ايەل ادام مەن بالالار جاۋاپكەرشىلىگى مول اكەنى قۇرمەت تۇتادى. «ەر ازىعى تۇزدە», دەپ جاتادى, دەگەنمەن, ناعىز اكە نان تابۋمەن عانا شەكتەلمەي, بالاعا دا كوڭىل ءبولۋى كەرەك.
«قازىر زامانا تالابى, ۋاقىت ولشەمى, ادامداردىڭ كوزقاراسى وزگەرگەنىن ەشكىم تەرىسكە شىعارا المايدى. اكە مەيىرىمىنە بولەنبەگەن بالا – ەلىن, ۇلتىن سۇيەتىن ازامات بولا الا ما؟ سول ءۇشىن اكە تۇزدە ءجۇرىپ, ءۇيدىڭ دە جايىن ويلاعانى ءجون», دەيدى ب.كۇزەمباي.
ول كەيبىر بالالاردىڭ ءتۇزۋ جولدان تايۋ سەبەپتەرىنە دە توقتالدى.
«بالانىڭ قالىپتاسۋىنا اتا-اناسى, تۋىستارى, دوستارى, ۇستازدارى, ءبىر سوزبەن ايتقاندا ورتاسى اسەر ەتەتىنى بەسەنەدەن بەلگىلى. بالا وسىلاردىڭ قايسىسىمەن كوبىرەك ۋاقىت وتكىزىپ, قايسىسىن ۇلگى تۇتسا سوعان مىنەز-قۇلقى ۇقساپ كەتەدى ەكەن. «دوستارى كىمدەر, قورشاعان ورتاسى قانداي» دەگەن ويمەن اكەلەر (انالار دا) بالالارىمەن قانشالىقتى اشىق سىرلاسادى, ماسەلە وسىندا؟ مىنە بۇل ويلاناتىن ماسەلە. مەنىڭ ەستۋىم بويىنشا, اتا-انا بالاسىن كۇنىنە كەمىندە ون ەكى رەت قۇشاقتاپ, جاقسى كورەتىنىن ايتۋى كەرەك ەكەن. ال ءبىز قازىر قاندايمىز؟ «ابايدىڭ شىققان بيىگى, قۇنانبايدىڭ يىعى» دەيتىن اۋىزشا ايتىلىپ جۇرگەن ونەگەلى ءسوز بار, بالاسىنىڭ عۇلاما, عالىم بولماسا دا, ەڭ باستىسى ادام بولۋىن ويلاعان اكە اۋەلى ءوزى مىقتى بولۋى قاجەت», دەدى بەكدايىر نىعمەت ۇلى.
«اكەلەر وداعى» وكىلىنىڭ ايتۋىنشا, مىقتى اكە دەگەنىمىز – جاۋاپكەرشىلىكتى موينىنا الىپ, السىزگە سەس كورسەتپەيتىن, قيىندىق كەلسە قورعان بولا بىلەتىن, وتباسىن ساقتاۋ ءۇشىن جاۋعا دا, داۋعا دا قارسى تۇرا الاتىن ادام.
«قازىر ءبىز ادامعا وتە قاجەت قۇندىلىقتاردىڭ ءبىرى – مەيىرىمنەن ايىرىلىپ بارا جاتىرمىز. ادامنان مەيىرىم كەتسە, جۇرەگى تاسقا, كوڭىلى لايعا اينالادى. اكەگە دە كەرەگى – مەيىرىم. مەيىرىمدى اكە وزگەگە دە, وزىنە دە قيانات جاسامايدى. اكەسى (اناسى دا) بالاسىنا دۇرىس تاربيە بەرۋ ءۇشىن ءوزى ۇلگىلى بولسا, اتا-اناسىنا قاراپ, بالاسى بوي تۇزەيتىنى انىق», دەيدى «اكەلەر وداعىنىڭ» وكىلى بەكدايىر كۇزەمباي.