سىرداريا سۋى ورتاق كەلىسىممەن ۇلەستىرىلەدى

وزبەكستانداعى حالىقارالىق فورۋمعا 30-دان استام ەلدەن ساراپشى, كاسىپكەر, مەملەكەتتىك ورگان وكىلدەرى, ەنەرگەتيكا سالاسىنىڭ ماماندارى قاتىستى. سەسسيالار مەن پانەلدىك تالقىلاۋلاردا 90-عا تارتا سپيكەر ءسوز سويلەدى. ءىس-شارا اياسىندا جاڭارتىلاتىن ەنەرگيا كوزدەرى, ەنەرگيا تيىمدىلىگى, ايماقتىق ىنتىماقتاستىق جانە بولاشاق ەنەرگەتيكالىق شەشىمدەر سىندى ماڭىزدى ماسەلەلەر قارالدى. وسىلايشا, فورۋم قاتىسۋشىلارى سالانىڭ دامۋ كەلەشەگىن تالقىلاپ, تاجىريبە الماسۋعا مۇمكىندىك الدى.

ەلىمىزدىڭ ەنەرگەتيكا ءمينيسترى ەرلان اقكەنجەنوۆ «وزبەكستاننىڭ ەنەرگەتيكالىق اپتالىعى» (CAEx) كورمەسىنىڭ جۇمىسىنا ارنايى قاتىستى. وندا قازاقستاندىق كوم­پانيالاردىڭ ستەندتەرىنە نازار اۋدارىپ, ولاردىڭ سالانى دامىتۋعا جانە يننوۆاتسيالىق جوبالاردى ىسكە اسىرۋعا قوسقان ۇلەسىن اتاپ ءوتىپ, ەنەرگەتيكا سالاسىنداعى زاماناۋي تەحنولوگيالار مەن ازىرلەمەلەرمەن تانىستى.

تاشكەنتتەگى حالىقارالىق ەنەرگەتي­كالىق فورۋم اياسىندا ە.اقكەنجەنوۆ وڭىرلىك ىنتىماقتاستىقتى نىعايتۋعا باعىت­تالعان بىرقاتار ماڭىزدى كەزدەسۋ وتكىزدى. قازاقستان, وزبەكستان جانە قىرعىزستاننىڭ ەنەرگەتيكالىق جانە سۋ رەسۋرس­تارىنا جەتەكشىلىك ەتە­تىن مينيسترلەردىڭ جوسپار­لى ۇشجاقتى كەزدەسۋى ۇيىمداس­تىرىلىپ, ونىڭ قورىتىندىسى بويىنشا ەنەرگەتيكالىق نىساندار جۇمىسىنىڭ كەلىسىل­گەن رەجىمدەرىن جانە الداعى ۆەگەتاتسيالىق كەزەڭگە سىرداريا وزەنى باسسەينىندە سۋ ءبولۋ ءتارتىبىن ايقىندايتىن حاتتاماعا قول قويىلدى.

بۇل سۋ رەسۋرستارىن تەڭگەرىم­دى پايدا­لانۋ­دى جانە ورتالىق ازيا­نىڭ ەنەرگيا جۇيە­لەرىنىڭ تۇراق­تى جۇمىسىن قامتاما­سىز ەتۋگە باعىت­تالعان ءۇش ەلدىڭ تۇراق­تى ىنتى­ماقتاستىعى شەڭ­بەرىندەگى ماڭىزدى قادام بولدى. مۇنداي رەجىمدەردى ءار ۆەگەتاتسيا­لىق كەزەڭگە دەيىن تالقى­لاۋ جانە كەلىسۋ ەلدەر­دىڭ قازىر­گى گيدرو­لوگيا­لىق جاع­دا­يىن جانە سۋ مەن ەنەر­گەتي­كالىق رە­سۋرستارعا دەگەن قا­جەت­تىلىكتەرىن ەسكەرۋگە مۇمكىندىك بەرەدى.

– ءبىز ەنەرگەتيكاداعى تەحنو­لوگيالىق جاڭالىقتاردى قاداعالاپ, وندىرۋشىلەرىمىزگە قولداۋ كورسەتۋ­دى جالعاس­تىرا­مىز. بۇل سەكتوردى جاڭعىرتۋ جانە وڭىرلىك ارىپتەس­تىگىمىزدى نىعايتۋ ءۇشىن ماڭىزدى, – دەدى ە.اقكەنجەنوۆ.