ءماجىلىس دەپۋتاتتارى «2009 جىلعى 9 ماۋسىمداعى ەۋرازيالىق تۇراقتاندىرۋ جانە دامۋ قورىن قۇرۋ تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن قارادى, دەپ جازادى Egemen.kz.
اتالعان حالىقارالىق شارتتىڭ ماقساتى – ەۋرازيالىق تۇراقتاندىرۋ جانە دامۋ قورىن (ەتدق) دەربەس حالىقارالىق ۇيىم رەتىندە قايتا قۇرۋ. بۇل وزگەرىستەر قوردىڭ قازىرگى مارتەبەسىن كەڭەيتۋگە, ونى ەۋرازيالىق كەڭىستىكتەگى نەعۇرلىم ءتيىمدى جانە ىقپالدى قارجى قۇرالىنا اينالدىرۋعا باعىتتالعان.
قارجى جانە بيۋدجەت كوميتەتى دايىنداعان قورىتىندىدا كورسەتىلگەندەي, زاڭ جوباسى ۇكىمەتتىڭ 2024 جىلعى 28 قازانداعى №896 قاۋلىسىنا سايكەس ماجىلىسكە ەنگىزىلگەن. قوردىڭ قۇرامىنا قازاقستاننان بولەك بەلارۋس, قىرعىزستان, رەسەي, تاجىكستان جانە ارمەنيا مەملەكەتتەرى كىرەدى. ال ونىڭ قاراجاتىن باسقارۋ مىندەتى ەۋرازيالىق دامۋ بانكىنە جۇكتەلگەن.
جاڭا حاتتاما اياسىندا ەتدق-نى ەۋرازيالىق دامۋ بانكىنەن ينستيتۋتسيونالدى تۇردە ءبولىپ شىعارۋ كوزدەلگەن. بۇل شارا, ەڭ الدىمەن, سانكتسيالىق تاۋەكەلدەردى ازايتۋعا جانە قاتىسۋشى ەلدەر اراسىنداعى ىنتىماقتاستىقتى كەڭەيتۋگە مۇمكىندىك بەرەدى. سونداي-اق, حاتتامادا ۇلتتىق ۆاليۋتالارمەن ەسەپ ايىرىسۋ مەحانيزمىن ەنگىزۋ, تەحنيكالىق كومەك كورسەتۋ, تراست-قورلار ارقىلى قارجى ءبولۋ سىندى جاڭا قۇرالداردى پايدالانۋ قاراستىرىلعان.
بۇگىندە قور قارجىلىق جانە ينۆەستيتسيالىق كرەديتتەر مەن گرانتتار بەرۋ ارقىلى قاتىسۋشى مەملەكەتتەردىڭ ەكونوميكالىق تۇراقتىلىعىن قامتاماسىز ەتۋگە باعىتتالعان. الداعى وزگەرىستەر وسى قۇرالداردى تولىقتىرىپ, قور قىزمەتىنىڭ تيىمدىلىگىن ارتتىرادى.
كوميتەت ءوز قورىتىندىسىندا زاڭ جوباسىن قابىلداپ, ونى پارلامەنت ءماجىلىسىنىڭ جالپى وتىرىسىنىڭ قاراۋىنا ۇسىنۋدى ءجون دەپ تاپتى. قۇجاتتى ماجىلىستەگى بارلىق كوميتەتتەر قولداپ وتىر.
بۇل حاتتامانىڭ راتيفيكاتسياسى قازاقستاننىڭ وڭىرلىك قارجىلىق قۇرىلىمدارمەن بايلانىسىن نىعايتىپ قانا قويماي, ۇلتتىق مۇددەنى قورعاۋعا باعىتتالعان جاڭا تەتىكتەردى ىسكە اسىرۋعا جول اشادى. ەۋرازيالىق كەڭىستىكتەگى ەكونوميكالىق ىقپالداستىقتىڭ جاڭا كەزەڭى باستالعالى تۇر.