اقش پەن ساۋد ارابياسى دونالد ترامپتىڭ تاياۋ شىعىسقا جاساعان رەسمي ساپارى اياسىندا جالپى قۇنى 600 ميلليارد اقش دوللارىن قۇرايتىن بىرقاتار كەلىسىمگە قول قويدى, دەپ جازادى Egemen.kz DW اقپاراتتىق اگەنتتىگىنە سىلتەمە جاساپ.
اق ءۇي تاراتقان مالىمەتكە سايكەس, كەلىسىمدەردىڭ ىشىندە قۇنى 142 ميلليارد دوللارعا باعالانعان قورعانىس ونىمدەرىن ساتۋ تۋرالى تاريحي كەلىسىم بار. بۇل اقش تاريحىنداعى ەڭ ءىرى اسكەري-ونەركاسىپتىك مامىلە رەتىندە سيپاتتالىپ وتىر.
مامىلە شەڭبەرىندە ساۋد ارابياسىنا امەريكالىق ونداعان قورعانىس كومپانياسىنىڭ قاتىسۋىمەن زاماناۋي اسكەري تەحنيكا مەن قىزمەتتەر جەتكىزىلەدى. ولاردىڭ قاتارىندا اۋە شابۋىلىنا قارسى جانە زىمىرانعا قارسى قورعانىس جۇيەلەرى, اسكەري-اۋە كۇشتەرى مەن عارىشتى يگەرۋ سالالارى, تەڭىز جانە شەكارا قاۋىپسىزدىگى, سونداي-اق اقپاراتتىق-كوممۋنيكاتسيالىق جۇيەلەردى دامىتۋ باعىتتارى قامتىلعان.
سونىمەن قاتار, كەلىسىم اياسىندا ساۋد ارابياسىنىڭ قارۋلى كۇشتەرىنىڭ الەۋەتىن ارتتىرۋعا باعىتتالعان كەشەندى وقۋ-جاتتىعۋ باعدارلامالارى قاراستىرىلعان. بۇل باعدارلاما اسكەري اكادەميالار مەن اسكەري-مەديتسينالىق قىزمەتتەردىڭ بازاسىن كۇشەيتۋدى دە قامتيدى.
اق ءۇي تاراتقان قوسىمشا اقپاراتقا سايكەس, بۇل مامىلە ەر-ريادتىڭ اقش ەكونوميكاسىنا 600 ميلليارد دوللار ينۆەستيتسيا سالۋ جونىندەگى ستراتەگيالىق جوسپارىنىڭ ءبىر بولىگى سانالادى. ساۋد ارابياسى تاراپىنان جۇزەگە اسىرىلاتىن ينۆەستيتسيالار جاساندى ينتەللەكتكە نەگىزدەلگەن دەرەكتەردى وڭدەۋ ورتالىقتارىن قۇرۋعا باعىتتالادى. اتاپ ايتقاندا, DataVolt كومپانياسى امەريكا اۋماعىندا داتا-ورتالىقتار مەن ەنەرگەتيكالىق ينفراقۇرىلىم سالۋعا 20 ميلليارد دوللار ينۆەستيتسيا سالماق.
ءوز كەزەگىندە امەريكالىق تەحنولوگيالىق الپاۋىتتار — Google, Oracle, Salesforce جانە Uber — ەكى ەل اراسىنداعى يننوۆاتسيالىق ىنتىماقتاستىق اياسىندا 80 ميلليارد دوللاردى قۇرايتىن ينۆەستيتسيالىق جوبالارعا قاتىسادى. بۇل قاراجات نەگىزىنەن ترانسفورماتسيالىق تەحنولوگيالاردى دامىتۋعا جۇمسالماق.
سونداي-اق, كەلىسىم شەڭبەرىندە ساۋد ارابياسىنىڭ AviLease كومپانياسى Boeing اۋە كەمەلەرىن ساتىپ الۋ ماقساتىندا 4,8 ميلليارد دوللارلىق كەلىسىم جاساسقانى ءمالىم بولدى.