ءۇشىنشى مەگاپوليستە وتكەن جارىسقا جۇزدەگەن سپورتشى قاتىستى. قالانىڭ ءال-فارابي الاڭىنان جارىس جولىن باستاعان ۆەلوشاباندوزدار قازاقستان-وزبەكستان شەكاراسىنداعى جىبەك جولى كەدەن بەكەتىندە مارە سىزىعىن كەستى, دەپ حابارلايدى Egemen.kz.
مارافوننىڭ ارا قاشىقتىعى 125 شاقىرىم جولدى قۇرادى. ۆەلوسيپەد تىزگىندەگەن اۋەسقوي سپورتشىلاردى جول پوليتسياسى باستاپ ءجۇردى. سونىمەن بىرگە جەدەل جاردەم قىزمەتى سپورتشىلاردىڭ دەنساۋلىعىن باقىلاپ تۇردى.
ۆەلومارافون مەگاپوليسكە ارنايى ءىس-ساپارمەن كەلگەن «اتامەكەن» ۇلتتىق كاسىپكەرلەر پالاتاسىنىڭ تورالقا توراعاسى, قازاقستان ۆەلوسپورت فەدەراتسياسىنىڭ پرەزيدەنتى رايىمبەك باتالوۆتىڭ قاتىسۋىمەن اشىلدى. ەلىمىزدىڭ ۆەلوسپورت جەتەكشىسى كەلەسى جىلدان باستاپ بۇل مارافون حالىقارالىق دەڭگەيدە وتەتىنىن مالىمدەدى.
«شىمكەنت-تاشكەنت ۆەلومارافونى مەگاپوليستىڭ جىل سايىن وتەتىن ءداستۇرلى سپورتتىق جارىسقا اينالدى. اتالعان سپورتتىق ءىس-شارانى ۇيىمداستىرۋعا قولداۋ كورسەتكەن قالالىق اكىمدىككە, شاھاردىڭ ۆەلوسپورت فەدەراتسياسىنا جانە دەمەۋشىلەرگە ايتار العىسىم شەكسىز. ۆەلوجارىس تەك سپورت ەمەس, سپورتتىق مادەنيەت. سالاماتتى ءومىر سالتى. ءبىز وسى سپورت ءتۇرىن وركەندەتىپ, ناسيحاتتاۋ ارقىلى حالىقتىڭ دەنساۋلىعىن كۇشەيتەمىز, جاستاردىڭ ۆەلوسپورتقا قىزىعۋشىلىعىن ارتتىرامىز. ال بۇگىنگى جارىستان تۇسكەن قاراجاتتىڭ ءبىر بولىگى قايىرىمدىلىق رەتىندە بالالار ۇيىنە اۋدارىلادى. ۆەلوبايگەنى ۇيىمداستىرۋعا اتسالىسقان بارشا ازاماتقا فەدەراتسيا اتىنان تاعى دا راحمەت ايتامىن» دەدى ر.باتالوۆ.
جارىستىڭ اشىلۋ راسىمىندە ءسوز العان قالا اكىمىنىڭ ورىنباسارى سارسەن قۇرانبەك تە بۇگىنگى تاڭدا مەملەكەت تاراپىنان سپورتتى دامىتۋعا بارىنشا قولداۋ كورسەتىلىپ جاتقانىن مالىمدەدى. سونىڭ ناتيجەسىندە حالىقارالىق دەڭگەيدەگى ءتۇرلى جارىستاردا شىمكەنتتىك ورەندەر جۇلدەلى ورىنداردان كورىنىپ ءجۇر. وليمپيادا ويىندارىنا قاتىساتىن ۇلتتىق قۇراما ساپىندا دا مەگاپوليس سپورتشىلارى جەتەرلىك. سونىمەن بىرگە شىمقالانىڭ وزىندە ءارتۇرلى دارەجەدەگى سپورتتىق بايگەلەر ۇيىمداستىرىلىپ تۇرادى. ال مەملەكەتتىك قولداۋدىڭ ناتيجەسىندە وسى كۇندە شاھاردا كوپتەگەن سپورتتىق ۇيىرمەلەر اشىلعان. وندا جۇزدەگەن بالا ساباقتان تىس ۋاقىتتا سپورتپەن شۇعىلدانىپ, بولاشاق چەمپيون بولۋعا ۇمتىلىپ باعۋدا. مۇنىڭ ءبارى مەگاپوليستىڭ سپورتتىق الەۋەتىنىڭ جوعارى ەكەنىن بايقاتادى جانە سالاماتتى قازاقستاننىڭ قالىپتاسۋىنا زور ۇلەس قوسىپ جاتىر دەگەن وي ايتتى قالا اكىمىنىڭ ورىنباسارى س.قۇرانبەك.
ارنايى ءىس-ساپار بارىسىندا «اتامەكەن» ۇلتتىق كاسىپكەرلەر پالاتاسىنىڭ تورالقا توراعاسى, قازاقستان ۆەلوسپورت فەدەراتسياسىنىڭ پرەزيدەنتى رايىمبەك باتالوۆ قازاقستاننىڭ جەڭىل اتلەتيكا فەدەراتسياسىنىڭ ۆيتسە-پرەزيدەنتى ولگا رىپاكوۆامەن بىرگە قالا اكىمى عابيت سىزدىقبەكوۆپەن كەزدەسىپ, مەگاپوليستە ۆەلوسپورت پەن جەڭىل اتلەتيكا سپورتىن دامىتۋ جايىندا ماسەلە قوزعادى. سونداي-اق الەمدىك «Gran Fondo» شوسسەلىك ۆەلوسايىسىن شىمكەنت قالاسىندا وتكىزۋ مۇمكىندىگىن سارالادى. ويتكەنى بۇل جارىسقا شاھاردىڭ ينفراقۇرىلىمى تولىق سايكەس كەلەدى. جالپى شىمكەنت حالىقارالىق سايىستاردى ۇيىمداستىرۋعا تاجىريبەسى بار قالا. سونىڭ ءبىر ايعاعى بىلتىر وتكەن الەمدىك شاحمات سايىسى. ەلىمىزدىڭ شاحمات فەدەراتسياسى بۇل دودانى وتكىزۋگە ارنايى ءۇشىنشى مەگاپوليستى تاڭداعان. سول سەكىلدى حالىقارالىق مارافون مەن ۆەلوجارىستاردى شىمكەنتتە ۇيىمداستىرۋعا تولىق مۇمكىندىك بار. قالا اكىمدىگى تاراپىنان قوناقتارمەن بولعان كەزدەسۋدە وسىنداي وي ايتىلدى.
شىمكەنت