ەلوردادا جەڭىستىڭ 80 جىلدىعىنا ارنالعان فوتوكورمە اشىلدى. ءىس-شارانى «Kazinform» حالىقارالىق اقپاراتتىق اگەنتتىگى «قازاقستان تەمىر جولى» ۇلتتىق كومپانياسىمەن بىرلەسىپ ۇيىمداستىرىپ وتىر.
ءبىر عاسىردان اسا ۋاقىت بويى اقپارات ايدىنىندا قىزمەت ەتىپ كەلە جاتقان اگەنتتىك كورمەدە ەكىنشى دۇنيەجۇزىلىك سوعىس كەزىندەگى قازاقستان كورىنىسىن, جان اياماي جۇمىس ىستەگەن تىلداعى وتانداستارىمىزدىڭ ەڭبەگىن, بەينەتىن بەينەلەيتىن بىرەگەي مۇراعات فوتوسۋرەتتەرىن كورەرمەن نازارىنا ۇسىندى. كورمەگە قويىلعان فوتوسۋرەتتەردىڭ كەيىپكەرلەرى – ساربازدار, جۇمىسشىلار, دارىگەرلەر, عالىمدار. ولاردىڭ قاتارىندا اتى اڭىزعا اينالعان ۇشقىش, ەكى مارتە كەڭەس وداعىنىڭ باتىرى تالعات بيگەلدينوۆ, كەڭەس وداعىنىڭ باتىرى, اتاقتى مەرگەن ءاليا مولداعۇلوۆا, باتىل پۋلەمەتشى مانشۇك مامەتوۆا, گەنەرال-مايور يۆان پانفيلوۆ, كەڭەس وداعىنىڭ باتىرى باۋىرجان مومىش ۇلى جانە تاعى باسقالار بار.
ۇيىمداستىرۋشىلاردىڭ دەرەگىنە سۇيەنسەك, وسى ساتتەردەن تۇسىرىلگەن كوپتەگەن سۋرەت اۆتورلارىنىڭ ەسىمدەرى, وكىنىشكە قاراي, بەلگىسىز. ساقتالعان ەسىمدەردىڭ اراسىندا ۆ.گرەبنەۆ, يۋ.رەدكين, گالكين بار. اۆتورىن انىقتاۋ جۇمىسى جالعاسىپ جاتىر. «بارلىعى مايدان ءۇشىن, ءبارى جەڭىس ءۇشىن!» ۇرانى سول سىندارلى ۋاقىتتاعى قازاق جۇرتىنىڭ ءومىر سالتىنا ەنىپ, بىرلىك پەن باتىلدىق كەزەڭىنە اينالدى. سونىڭ ناتيجەسى بولار, جاۋعا قارسى اتىلعان ون وقتىڭ توعىزى قازاقستان زاۋىتتارىندا قۇيىلعان. مايدانعا 1500 ۆاگون ازىق-ت ۇلىك, كيىم-كەشەك جىبەرىلدى. جەڭىل ونەركاسىپ كاسىپورىندارى 2 ميلليون جاۋىنگەر مەن وفيتسەردى كيىم-كەشەكپەن قامتاماسىز ەتتى. 78 اۋرۋحانادا جارالىلار ەمدەلگەن. تەك قورعانىس قورىنا ەلىمىز 4 ميلليون رۋبلدەن اسا ۇلەس قوسىپتى. ال 1945 جىلى ستۋدەنتتەردىڭ قاراجاتىنا سالىنعان تانك كولونناسى بەرلينگە شابۋىل جاساۋعا قاتىستى.
فوتوكورمە «نۇرلى جول» ۆوكزالىنىڭ ورتالىق كۇتۋ زالىندا ءوتىپ جاتىر.